ESTER 4 - Allah Wene Fano Wene Hupla Inane

At Mordekhai en he Ester en lebetninabuageluk kinotikhe wene

¹ A'nogo hilingitukwa mene a'nogo at Mordekhai nen holhikhesik he, aren fong warogo iluk he asu tiliphogo herak fisasikhesik su pelagi asu liagaisogo re, wul unggulmo yugul fesikhesik he at ebe o kota bene omanogo laga logolik ane hokhoba le arik laga lagaikhe.

² A'nogo lagaikhesik he at ebe hun raja awi wuri'mo kwi laguba solombonma omanogo asi lagaikhesik he, it ap su pelagi su laberek mene re andoma kwi lagaikharek le'ma re at ebe solombonma omanogo kamo i lagaikhe.

³ Nen at hilingitikhe mene andi higithogo re, wene melalek hun raja nen a'nogo menfesikhemo re, afuni Yahudi mene o propinsi abirengge omanogo nen ogo le agaukwa. Le a'nogo aga logolik he, iren sumburu inambe heang welagik, nen nenahalok hilingninabugun nogo iluk igik, hilingitu kwelek, afuni it mene fenakwe hokhorogo re inasu pelagi su lebetfesukwasik, wul oba wengik welagaukwa.

⁴ A'nogo hilingitukwama re, at Mordekhai nen hilingitikhe mene a'nogo faget, it helime silerik mene inom, ap inouwali waganek logolik yabu enogo ratu Ester obaget hilingiti logouwageluk fisasukwa mene omanogo inom, at Ester yagasi lagaukwama nen he Ester endawinggen mondok heiselhikhe. A'nogo hilingitikhesik at Ester en hun Mordekhai asu pelagi su omanogo obali'mo iluk su lakfisa wagaikheba nen he Mordekhai nen wanhu aple abiren herakfisasikhe.

⁵ Andi nen he, he Ester en hun Hatah, ap misik ekhe ouwali waganek logolik yabu at Ester obaget hilingiti logouwageluk raja nen menfesikhe mene a'nogo woletikhesik yagati logolik he, ”Haren hun Mordekhai andi nen nenahalok hilingite, nen ninggi'nogo hilinglagama,” iluk heinok wani lan iluk mimingisogo lakfesikhe.

⁶ A'nogo lakfesikhemo re, at Hatah a'nogo hun Mordekhai were'ma o kota kweang wagane'ma nen kwe raja aiba kwi lagaikharek meneba omanogo were'ma ambit lagaikhe.

⁷ Lagaikhemo re, Mordekhai nen he hun Hatah ba re wene agaikhe mene omanogo inom, nen at Haman nen uang perak mene hun raja nen auang fakhikherek oba kwelabugun iluk isukwa mene omanogo inom, nen a'nogo hilingfuluk he afuni Yahudi mene pinggi inoasugun iluk isukwa mene omanogo inom tindelogo yagatikhe.

⁸ A'nogo yagatikhemo re at Mordekhai nen he, hun raja nen lisu palek o Susan nen wulafikhe mene, suesingga palek andiba afuni Yahudi mene mondogat leget fisouwogeluk palogo wulafikhe mene a'nogo kumut higik, palhukwa mene inom, hun Hatah wogetikhe. Wogetikhesik he Mordekhai nen hun Hatah ba ikhi logolik he, ”surat arire Ester woge'luk he wene andi faget at furogo yaga'no, nen at Ester en ogore hun raja ambit kwi laluk afuni at unggulenu mene andoma faget endawit ninabuageluk, kino uakhogo yaga'no.” iluk yagatikhe.

⁹ A'nogo yagatikhemo re, at Hatah a'nogo Ester ambit lagaikhesik he, wene Mordekhai nen yaga'no iluk isikhe mene omanogo yagasi lagaikhe.

¹⁰ Oba nen he, he Ester en nekhengge at yonggo lakfei waga logolik he wene yi'nogo ino iluk isikhe,

¹¹ ”We ap misik en ogo hemi nen ogore hun raja nen enu uluk woletu le'ma nen, raja awi elonggoma meneba elokhoma andoma kwi lagu mene re unggum inoba fuluk pinggi inoatu nogo iluk wene melalek andi hilingiti logouwageluk lenggalek were'ma, at raja wene komotarek inap oba nen he afuni we mene o propinsi oma mondogat oba re abirengge nen wene andi faget inelurek. Oba nen he we kwe misik enek wene melalek werek mene andiba nen se asu mene selek werek mene andi re, at raja nen andomuk emas mene a'nogo inoba watfugu halok nen a'nogo agu halok enek he ap andi agap telasu hago. Oba nen he tugi misik inukhogo yiba re at raja nen ogo ekhe wolniili'lago lek.” iluk lakfesikhe.

¹² A'nogo lakfesikhemo re, at Hatah nen he wene Ester en isikhe mene a'nogo Mordekhai yagasi lagaikhe.

¹³ A'nogo yagatikhemo at Mordekhai nen he wene he Ester faget iluk yi'nogo lakfesikhe, ”Hat hebe hun raja aiba welagen andiba re, afuni Yahudi mene mondoget inoati logolik an he elok nagap telasigin iluk angga fuk!

¹⁴ Afuni Yahudi mene re yi'nogo ti'nogo iluk umo nen he hiling-hiling ogo inagap tela hagaro. Oba nen he, hat he yogondak hilingik welagen andem hakhogo nek hane legengge welagen hama nen he, hat hebe wa'lasumo re, hat heisena ambisangma nen tagomangge mene a'nogo mondogat kofok i lagain. Oba nen he hat hebe hun raja agwe asuageluk wokhafe andi re it afuni a'nogo hilingi'mo arem haren ekhe hilingisuageluk wenak hafe logou andi re sa elurek?” iluk lakfesihke.

¹⁵ A'nogo lakfesikhemo re at Ester en wene yi'nogo iluk hun Mordekhai oba lakfesikhe,

¹⁶ ”Afuni Yahudi mene o Susan oba werek mene andoma kaboget fisaluk, hit he linggene henagan andem oba re an nobaget sumburu inom, i inom ninggi'lek heang logoino. Nen an ogore an inom it helime silerik an nobaget yabu hilingiri'lagwi mene oma inom ogore ninambe heang logogun aro. A'nogo hilingisimbik enek he, wene melalek oak sagal fuluk oba nen he an nebe raja were'ma kwi lagain. Wene andi faget an wa'lasigin halok andi re, wa'lasigin he fano nek!” iluk lakfesikhe.

¹⁷ A'nogo isikhemo re, at Mordekhai a'nogo lagaikhesik he, at Ester en yi'nogo ino ti'nogo ino iluk yagatikhe mene omanogo mondogat hilingisi lagaikhe.