ESTER 3 - Allah Wene Fano Wene Hupla Inane

Hun Haman nen afuni Yahudi mene warogo legabet inabigin iluk weim abok wilafikhe wene

¹ A'nogo hilingitukwaba nen inenggi ekhe welagaukwasigen raja Ahasyweros nen hun enu Haman andi eabu perdana menteri andi logouwageluk menfesikhe. Haman andi re hun Hamedata amlogo, hun Agag andi ambisangma tagomangge mene.

² A'nogo menfesikhesik he raja nen he agoromi pegawai inoba yagaisikhi logolik he hun Haman andi agaugetfuluk legeisogo fikhi logolik he hinelokhe pelabek kweangma sagaumhogo legeisogo fikhi logogun o iluk yagaisasikhe. A'nogo yagaisasikemo re afuni mondogaren he at ane isikhe mene a'nogo higithogo hilingiti lagaukwaba nen he at Mordekhai nek he a'nogo hilingiti lagaikhe lek.

³ A'nogo hilingitu legen he it ap pegawai hun raja aiba yabu hilingitu mene omanogo nen heinok wokhikhi logolik he, ’Hat he nenahalok hun raja ane sagalogo fikhi lagen?’

⁴ iluk yagati logolik he ekhe sambul ekhe sambul he wene melalek werek mene higithogo hilingisuageluk mimingiti lagaukwa, oba nen he iren ugu mene a'nogo holhi'legengge hilingiti lagaikhe. Aren ikhi logolik he, ”An he ap Yahudi mene welagimo re, an nen ap meneba a'ma sebe uluk apne wanu lek hak.” iluk ikhi lagaikhe. A'nogo ikhi lagaikhemo re, aren ugu mene a'nogo re it fena omanogo nen he hun Haman nen Mordekhai ba ninggi'nogo hilingfagain iluk he at Haman yagasi laga lagaukwa.

⁵ A'nogo yagasi lagaukwama re, at Mordekhai nen at Haman oba a'ma sebe uluk legeisogo figi'lek hilingiti lagaikhe mene a'nogo elu agaikhesik he Haman mondok a'mage lagasikhe.

⁶ Nen at Haman nen holhunemen he at Mordekhai andi re Yahudi agun iluk elu agaikhesik he, at Haman nen he Mordekhai unggum oba fagain iluk wene isikhe, oba nen he at Mordekhai faget enek he lek, athe it afuni Yahudi mene abirengge o Persia kweang andiba werek mene mondogat leget fisagain iluk wene palhukwa.

⁷ At Ahasyweros a'nogo raja were'ma nen enek he tahun nesanggo meneba asi lagaikhemo werek kwelek he, tugi iren wenati lagaukwa mene enu Nisan andiba re, Haman nen he, linggene inom tugi inom higitsek mene re ki sambul at endawinggenma anggikhe aple andi hilingisuageluk he inelu asuageluk, enegengge waleti lagaukwa mene enu, ”Purim” andi hilingisuageluk yagaisasikhe. A'nogo isikhemo re tanggal 13 tugi nesanggo meneba, tugi iren wenati lagaukwa mene re enu Adar andiba hilingisugun iluk isukwa.

⁸ A'nogo isukwasik at Haman nen raja yagati logolik he, ”Neisena, afuni inunggulenu hunik mene ekhe o kweang yiba nen o propinsi ariba abirengge andoma sagarek werek. It inetokhogo inombawi nen wene melalek hilingiti lagaukwa mene omanogo hilingiri'lagwi mene andoma re afuni inunggulenu amu mene inom higitsek lek, irogo amurek. A'nogo hilingik logolik he, iren wene melalek kerajaan yiba werek mene omanogo higithogo hilingiri'lagwi lek. Enggere, neisena haren he it andi inendawimo nen anggaluk hilingiri'lagwi mene andoma hilingiti logouwageluk herak fisagun.

⁹ Nen neisena haren hendawinggen enggin hafu lek halok he, it afuni andi inebe mondogat leget fisoageluk wene melalogo wilabin. Nen neisena haren ambi an hamingmingengge wene hoba igi mene andi fano anggaluk hilingitu halok he, an hamingmingengge nen he neisena haren mene hangge yi mene ti mene fikhi lagen mene omanogoba perak mene re 340.000 kilogram en kwelakhesi wesigin.” iluk yagatikhe.

¹⁰ A'nogo isikhemo re, at raja nen he at enggimo helep senggan enggi segelet oba kwelabek welagaikhe mene a'nogo nonggologo re, wene melalek palogo wilafu mene a'nogo enegengge obuluk taget fouwageluk he, hun Haman afuni Yahudi mene inaselei hokho mene a'nogo wogetikhe.

¹¹ A'nogo wogetikhesik at raja nen Haman oba ikhi logolik he, ”Afuni inunggulenu andi mene inom, uang inom he hat henggimo fikhi lagi enggere haren a'nogo hilingisigin fano anggagain mene andi nek hilingi'no.” iluk yagatikhe.

^12-13 A'nogo yagatikhemo re, tanggal 13 tugi misik oba werek kwelek he at Haman nen he it ap raja obaget lisu palharek inap omanogo wolinafikhe. Wolinafikhesik he, iren hun raja nen hilingisuageluk yagatikhe mene omanogo higithogo nek lisu paluageluk yagaisasukwa. Palfuluk he iren he afuni o yi awi ti awi inaneba agaumhogo palhik, nen lisu palhi logolik eil amu-amu it kerajaan andi a'ma werek mene nen palhu mene omanogo higithogo palhik, hilingisuageluk isukwa. A'nogo isukwama re surat a'nogo at raja Ahasyweros enu palhukwasik he, enegengge re hun andi enggi helep senggan oba taget fesukwasik weak-weak it ap inenu werek omanogo inom, gubernur inom, ap kaindek-kaindek inom, o propinsi omanogo abirengge inobaget lakfesukwa. Nen surat palogo lakfesikhe mene andiba re ane yi'nogo palek welagaikhe, ”Tugi Adar andiba tanggal 13 oba re, afuni Yahudi mene inebe yaman mene inom, souge mene inom, hemi inom yenggerugwi magendek mene inom, inendawirinafi'legengge, pinggi inoasimbik he inangge mondogat telogoin.

¹⁴ Nen wene melalek andi re o propinsi mondogat andoma bene afuni abirengge nen linggene enek werek mene andi faget fik-fouk sek logouwageluk hemi mondogaren linggene enek werek mene andi faget fik-fouk hilingik logouwageluk sagarik lano,” iluk palek welagaikhe.

¹⁵ A'nogo isukwama re it ap yonggo lakfisagarek mene omanogo nen he lisu palek a'nogo waluk weak-weak o kerajaan andiba nen propinsi omanogo mondogat ebene waluk lagaukwa. Nen at raja nen amingmingengge oba re wene melalek a'nogo re o Susan it afuni Persia mene inawi eroma andoma inom fagetukwa. A'nogo hilingitukwasik he at raja inom Haman inom he, hu'lagaukwasik i anggur amusu ninggi logolik hurek welagaukwa, oba nen he o Susan oba andoma nek he wene a'nogo faget youk kwelakfesukwasik hilingiti lagaukwa.