ESTER 10 - Allah Wene Fano Wene Hupla Inane

Hun Ahasyweros inom Mordekhai inom, inanggiluk welagaikhe wene

¹ Raja Ahasyweros nen he afuni nen yabu ane omameba yagaisugu kwelek hilingisuageluk yagaisasikhe mene andi re it afuni o i laut elankwe werek mene omanogo inoba nek yagaisikhi lagaikhe re lek. Meneat he it afuni tomkwe welagaikharek mene ogo hilingisuageluk yagaisasikheat.

² Nen raja Ahasyweros nen wene esin mene hunikhogo hilingiti lagaikhe mene inom, hunikhogo hilingiti lagaikhe mene inom, nen aren Mordekhai yabu lego mene hilingiti logouwageluk menfesikhe mene inom, andoma mondogat he buku ap raja-raja Media inom Persia inomen hilingiti lagaukwa mene palek welagaikhe mene a'nogoba palogo fesukwa.

³ Hun Mordekhai unggulenu Yahudi mene a'nogo re raja Ahasyweros onggwarek a'ma logolik yabu lego mene andi hilingiti lagaikhe. A'nogo hilingitunem he afuni at unggulenu mene nen he at oba inagaiyek logolik he agaugetfuluk legeisogo fikhi lagaukwa. Nen at Mordekhai nen he afuni at unggulenu mene a'nogo inebe inom, it inambisangma nen tagomangge mene inom, inagap telek logolik inebe fani-fanorogo logouwageluk hilinginafi lagaikhe.