ESTER 1 - Allah Wene Fano Wene Hupla Inane

Hun raja Ahasyweros nen wene wulafikhe mene he ratu Wasti nen ane oak sagalhikhe wene

^1-2 O Susan andi re it afuni Persia mene inaiba kota sili hokho mene were'ma at Ahasyweros ebe raja mendek logolik melalinafu welagaikhe. Nen, aren melalinafi lagaikhe kwe andoma o sili propinsi omanogo ebe 127 nen hilingi'mo re o ebe re India huli nen he o Sudan huli andomaba hilingik welagaikhe.

³ A'nogo hilingi'mo re at raja Ahasyweros a'nogo melalinafu werek kwelek enek he tahun henaganek meneba were'ma re, aren it agoromi pegawai inom, it ogogwi kaindek-kaindek inom, omanogo inayonggo fesikhesik inobaget seni hokho mene isatikhe. A'nogo isatikhemo re it ap o Persia mene inom, Media mene inom oba andoma tentara inogogwi panglima inom, gubernur inom, o propinsi lombok omanogo nen ap yabu legoma hilingitarek inap inom, ogo kabogesi wagaukwaat.

⁴ A'nogo kabogesi wagaukwama re, tugi falfaligen inukhogo a'nogo re at raja nen angge yi mene ti mene awiloba werek engge omanogo inom, awi kerajaan andiba obabut fano mondok hilingik welagaikhe mene omanogo inom, andungdang hilingik welagaikhe mene omanogo inom.

⁵ A'nogo hilingitukwasik raja nen he afuni we mene o Susan oba andoma werek mene it inenggi werek mene inom, inenggi lek mene faget inom seni nekhengge isatikheat. Seni andi re at raja ebe were'ma o silimo omanogo isatunemen enek he minggu misik inukhogo isatukwa.

⁶ A'nogo isati logolik he, hun raja awi silimo omanogo re su kain lenan mene eil heiselek mene inom, kut mene inom, meneba hulirogo hele yo lenan eil sakhorek meneba homak fesukwasik he su kain andi wurep kwe re yo kwelakfugunggwe no perak meneba anggwe folelhigik hilingi'mo kwelakhigik fesukwasik he helep mendek mene re enu pualam meneba mendekma porogo fesukwa. A'nogo hilingfuluk su andi a'ma re hu'lagungge emas mene inom, perak mene inom, ohulumo re helep enu pualam eil kut mene inom, nogogungge eil mep mene inom, Wurili mutiara amulit weak mene inom, helep pirus eil heiselek mene inom talfesukwa.

⁷ A'nogo hilingitukwasik at raja nen he anggur agaiwak emas mene eil amu-amu meneba hinakhigik hokho-pokhorogo fougetukwa.

⁸ A'nogo hilingiti logolik he, ap pok omanogo faget he i nunggu mene palfigi'lek wogisigik, inane nen nani iluk mel yagaisigi'lek inendawimo nen anggaluk inendawimo anggugu hak hilingirigik, hilingitu welagaukwa. Andi faget he, at raja nen afuni at onggwarek aiba yabu hilingiti lagaukwa mene omanogo inoba ikhi logolik he, ap pok andoma re it inonggwarek lombogen nunggu aple inendawimo anggogoin hakhogo nek wogisano o, isikhe.

⁹ Nen, a'nogo hilingitu kwelek he, at raja agwe ratu Wasti a'nogo nen ogore it hemi at onggwarek awiloba werek mene omanogo inobaget seni isatikheat.

¹⁰ A'nogo isatikhesik linggene sabirenggeba re, at raja a'nogo i nasikhesik he agaiyek mondok agaikhe. Andiba re aren it ap inouwali waganek logolik at onggwarek faget yabu hilingitu mene inebe sabiren aremnogo wolinafikhe. It andem inenu re: Hun Mehuman inom, Bizta inom, Harbona inom, Bigta inom, Abagta inom, Zetar inom, Karkas inom, andem.

¹¹ A'nogo wolinafikhemo wagaukwama re, aren he at agwe ratu Wasti andi re mondok eil alili pugunsek mene hilingi'mo re, at he andi ebe hilingik aple a'nogo it ap pok mene inom, yi kain ti kain wagaukwa mene omanogo inom inugisageluk he, it yagaisikhi logolik he, ”He Wasti andi unggulmo mahkota ap raja nen pugetarek mene andi puget fuluk an nelokhoma waluk fei we'ni o,” iluk yagaisasikhe.

¹² A'nogo yagaisasikhemo nen he, it ap inouwali waganek inap aremnogo nen wene at raja nen miminginafikhe mene a'nogo raja agwe ratu Wasti a'nogoba yagatukwama nen he, he a'nogo nen nabit isikhemo re, raja a'nogo a'mage hokho mene lagasikhe.

¹³ A'nogo hilingitukwasik he, at raja etokhogo wene it afuni andoma nen hilingiti logouwageluk melalek mene taganhogo hilingitu halok it ap wene mulik inelu inap inoba ninggi'nogo iluk heinok woginafi lagaikhemo a'luk he, wene he a'nogo nen hilingitikhe mene a'nogo faget ninggi'nogo hilingisigin iluk wene komo yaganesuageluk ap wene komo yagasugun mene omanogo wolinafikhe.

¹⁴ Hun aren it ap wene komo wene ugu inap we sambul ogo wolinafu nek welagaikhe mene re, hun Karsena inom, Setar inom, Admata inom, Tarsis inom, Meres inom, Marsena inom, Memukan inom. It ap andem he o Media inom Persia inom andoma nen ineabu ap raja nen melalinafi lagaikheba andoma yabu legoma logolik hilingiti lagaukwa inap.

¹⁵ It ap andem wagaukwama raja nen ap inebe sabiren aremnogo inoba ikhi logolik he, ”An nen it namingmingengge inoba ikhi logolik he, he Wasti andi an nambit wesuakhogo hondosi lani iluk lakfisigi. Oba nen he at wagu aple nabit iluk kamo ikhe. Andi nen he, wene melalek werek meneba re at andi re niren ninggi'nogo hilingisu hak nogo?” iluk yagaisasikhe.

¹⁶ A'nogo isikhemo, at Memukan nen raja inom it ap kaindek-kaindek omanogo inom inoba ikhi logolik he, ”He andi nen a'nogo hilingite mene andi re, we neisena hat enek at ratu Wasti nen sebelogo hobagaikhe fuk, at he neisena hagoromi pegawai abirengge inom, andi nen ap mene nek mondogat neisena haren melalinafi lagen oba oma werek mene inom sebelogo ninobagaikhe o.

¹⁷ Andi re, at ratu andi nen hilingite mene andi it hemi mondogaren inelu asimbik he, it inaguni lombok omanogo sebelogo fisikhi logogun. Iren ikhi logolik he, Neisena haren he, he Wasti andi an nambit wesuageluk yagaten oba nen he at ebe wagi'lek kamo ikhe.

¹⁸ Enggere, it ap kaindek-kaindek inagagwi o Mediaba inom, Persia ba inom werek mene omanogo inagagwi nen wene andi faget inesanggo holik laga logolik he, eberogo nen at yogondak iren inaguni inoba yagaisilik logoinat. Iren a'nogo hilingisugun andiba, ambisangma re it inagagwi nen he inaguni nen yagaisugu mene a'nogo inane sagalogo herak figik, nen it inaguni nen inagagwi wenagisigik, hilingiti logogun.

¹⁹ A'nogo hilingik enggere, nineisena haren ratu Wasti andi re, An nambit wesi nogo, iluk wene tekhogo inogen iluk niren yagaheto. Nen we haren tegesigin mene andi re wene ero melalek o Persia inom, Media inom oba were'ma aben ogo wokha re mondok elo'lek mene logogin. A'nogo hilingfembik he, he Wasti obali'mo re hemi ekhe amu mene at higit mene re lek oba nen mondok fano mene fogoin.

²⁰ Nen wene haren tegesigin mene andi, o kweangma esanggo-esanggo a'lima ogo wene andi higithogo nek hilingiti logogunmo re it afuni inenu lombogen he it inenggi werek mene nen ogo, lek mene nen ogo, re it inaguni inalong anggaluk sebe uluk logogun,” iluk yagaisasikhe.

²¹ A'nogo isikhemo re, at Memukan nen wene isikhe mene a'nogo re, at raja inom it ap kaindek-kaindek omanogo inomen he fano anggasukwama at raja nen he wene isikhe mene a'nogo weak-weak higithogoat hilingitikhe.

²² A'nogo hilingiti logolik he, at raja nen o kerajaan andiba Propinsi omanogo mondogat aneba inom, lisuba inom inane unggut ikhi lagaukwa higithogo palhigik wulabik lagaikhe. Wene melalek wilafikhe mene andi re, ane yi'nogo palogo wulafikhe, ”It ap misik ekhe eisok erokwe meneba andoma nen he we it ap inaguni nek inunggul hakhogo logogun, nen it a'nogo logolik iren enek wene yi'nogo hilingisugun iluk tegeti logogun,” iluk wulafikhe.