EFESUS 6 - Allah Wene Fano Wene Hupla Inane

Yenggerugwi ineisugwi inagaisawi inom logolik inobabut hilingiti logogun wene

¹ Hit yenggerugwi hinobabut he, ninoe Yesus Kristus hinom hundik logolik, hineisugwi hinagaisawi, inane hologo hilingiti logogun andi nen he, a'nogoat hilingiti logoino o.

² Wene Allah nen komotninafikhe wene esin atak isikhe menere yi: ”Hiren hineisugwi, hinagaisawi, agaugwerinafi logolik he, inane hologo hilingiti logoino o,” iluk yagaisasikhesik he,

³ ”A'nogo hilingiti logoumo, kweangma yoma hinebe fano logolik, hineluk uanhogo logoguno,” iluk, yagaisasikhe.

⁴ Nen, hit inesugwi nen ogo re, yi mene ti mene faget hinagainafuri ina'mage lagainogo iluk hilingitubo. Athe, Tuhan nen komotninafik, ninendawinggen sebelhik, ikherek andi hak, hiren hinagainafuri a'nogoat hilingisogo inebe kulinafi logoino o.

Inamingmingengge mene inogogwi inomen, inobabut hilingiti logogun wene

⁵ Hit afuni inamingmingengge mene nen he, Kristus ane hologo hinendawinggen misigat hinailorogo logolik hilingiti lagep hak, hinogogwi kaindek inane hologo agaukhogo hilinginafi logoino.

⁶ Iren kwelakhinarek werek kwelek enek afuni mene inendawimo fanorogo hilingiti logogup. We, hinendawimo nen he, ”Kristus amingmingengge logolik, Allah endawimo amolo anggikherek mene andiat hilingiti logouwok,” iluk, hinendawimo ebet fulugen hilingiti logoino.

⁷ hinendawimo nen he, ”An afuni mene nek inawe a'ma welagi fuk. We, nineisena Tuhan awe a'ma welagi,” iluk, hinendawimo anggiluk hogo hilingiti logoino o.

⁸ Hinobabut fano hilingiti logogun halok, hineisena Tuhan nen hit hinamingmingengge mene inom, hit hinale'ma welagep mene hinomat, hinebe lombok onggo wokhisagaino.

⁹ Nen, hit hinogogwi kaindegen ogo re, hinamingmingengge mene faget he, a'nogoat hilingiti logoino. ”Hoasigin,” iluk inabisakwe sagal-fagalhogo hilingiti logogup. Hinendawimo nen he, ”An namingmingengge mene ninomat he, nineisena Tuhan pogoroba mene a'nogo nen, nit faget he, At andi kain. Nen, at andi kembu, iluk, ikherek lek. Ninom higithogoat hilingninaferek,” iluk, hinendawimo eberek logoino o.

At Iblis ninom weim yafi logouwogen iluk yi mene ti mene ninagap oba labesugun wene

¹⁰ Wurep oba re, wene yi yagahisak. Hineisena Tuhan hinom hundik logolik he, at omame hokho a'nogoba, hinomame hilingla'luk logoino.

¹¹ At Iblis obabut lagoksek mene a'nogo nen weagethinabigeluk wagunem, weim yabuogeluk sing itarek hak, hit hinebe mendegat logouwogeluk he, at Allah nen yi mene ti mene wo'nisikherek mene andi mondogat hinagap oba laberogo logoino o.

¹² Nit weim hak yafi lago andi re, afuni mene ninom yafi lago fuk. Lego. Athe, kain mene, inane werek mene, o mum oba kweangma yoma ferinarek welagaikharek mene, munggwarengge inobabut weak mene pogoroba honggolek kweangma honggolek were'ma ninom yafi lago.

¹³ Halok he, weak mene nen weagethinabi wagunem weim hinoba harorogo mendegat logolik yabuogeluk, sing itarek andi hak Allah nen ekhe mene-ekhe mene wo'nisikherek andi mene i'no o.

¹⁴ Hinom yabubagaigen ikfuluk mendek logogun he, ebe re yi, mul pagaluk isu hak, wene ebe wene andiat itik, hinamik oba labesu hak, Allah endawimo amolo mene nek hilingitarek andi mene itik,

¹⁵ hineisok sepatu isu hak, Allah nen ninebe lambukhogo ninobagaikherek iluk, fano wene andi waluk louwogeluk, inobabut, ”Io. An lagain,” iluk agarek andi mene itik, ino.

¹⁶ Tok pisingerisugunem ponghogo loageluk, e sabelek inenggimo waluk lagaikharek hak, inendawinggen Allahba himbirik welagaikharek andi mene hundik-handigat waluk nikhi logoino. Waluk nugunem, Iblis obabut weak mene a'nogo nen endu tok wurep oba hunogo pisinget hisugunem, hinendawinggen Allahba himbirik logogun andiba elok nagulhi logogun aro.

¹⁷ Inunggul oa'ma inoasinogo iluk, inunggul asu haro mene salharek hak, Allah nen telninaferek mene andiat wanimbik salino. A'nogo salimbik he, weim yabuogeluk karok inenggimo waluk lagaikharek hak, Allah ane, Areagun en wo'nisikherek andi mene waluk laga logoino o.

¹⁸ A'nogo mondogat hilingiti logolik he, Allah nen lebethisoageluk samban ikhi logoino. At Areagun hinendawimo logolik hinendawimo kagaligin hagat, hundik-handik samban oba Allah ayonggo figik, kino yagatik, ugu mondogat logoino. A'nogo ikhi logolik he, hinendawimo puk agi'lek, hinobabut hebelek mondok logoino. A'nogo logolik he, Allah againafuri mondogat faget samban Allah ayonggo fikhi logoino aro.

¹⁹ Ayonggo a'nogo fikhi logolik, an nen fano wene Allah endawimo hinago welagaikhe mene andi, aren yaganetu kwelek, nane fakhogo yagaisikhi logoigen he, hiren ayonggo fikhi logoino aro.

²⁰ Wene andi yagaisikhi logouwageluk at Kristus nen nayonggo fuluk laknobagai wagaikhemo an wagirik yagaisikhi lagi andi faget nenggi hele warogo nobagagama welagi. A'nogo logolik, an nailo lek hogo fano wene andi yagaisikhi logou higithogoat yagaisikhi logoigen, samban ikhi logoino aro.

Wurep kobokhogo hai warinafikhe wene

²¹ Wene an nebe yoma welagi mene inom, hilingiti lagi mene inom, hit hinelurogo, ninagailak Tikhikus nendawi a'nogo nen, Tuhan faget endawinggen hombunhogo hilingitu welagarek mene a'nogo nen mondogat yagahisa wesigin andi.

²² Nit ya logolik hilingiti lago mene hinelu a'luk he, hinendawinggen sebelogo logobagaigeluk hinoba lakfei wagi andi.

²³ Nineisena Tuhan Allah inom, ninoe Yesus Kristus inom, emberegenat, hit nerugwi nagaila'lak Allah againafuri mondogat fano lambukhogo hinobagagik, afuni inendawirogo welagaikharek mene andi wokhisigik, inendawinggen at oba himbirik welagaikharek mene andi inomat wokhisigik, uago.

²⁴ Hit he hinoe Yesus Kristus kobokhogo herakfigi'lek hinendawi hundik logogun mene halok hinebe mondogat he, hineisena Allah obabut fano a'nogo nen fethinarek logouwago.