EFESUS 4 - Allah Wene Fano Wene Hupla Inane

Nit Yesus enggi eisok hak ninom hundik welagorek meneat he, ninobabut hunogo tomok wo'nisikherek wene

¹ An neisena Tuhan faget nenggi hele warogo nobagagama logolik he, hit wene ekhe komothinabik. Nerugwi nagaila'lak. Hit hinobabut he, at Allah nen hinayonggo fesikhe higithogoat hilingiti logoino o.

² Hit-hit nendawi-hendawirogo leberisigik, hundik-handik hinendawinggen sebel fakhaluk welagik, hinobabut enago welagik, hinafe morogo welagik, ikhi logoino o.

³ Allah Areagun nen ninebe misigat mene hunogo ninobagaikhemo logolik, inebe fano lambulogo welagaikharek andi mene esinet fikhi logoino o.

⁴ Allah nen hinayonggo fikhi logolik he, ”An nen fanothinabigino,” iluk, abok misigat mene yagahisasikhe hak, at ebe misigat mene hinom hunetik, Areagun misigat mene wanhik, isigip andi.

⁵ Tuhan ebe misigaro. Ninendawinggen at oba himbiret fogorek mene andi misigat. Ninebe ima pelakninafarek mene misigat.

⁶ Ninebe mondogat nineisena Allah misigaro. At Tuhan ebe alegat esin po ya welagarek. Nit mondogaren yi mene ti mene hilingitorek andi, ebe arenat hilingiterego. At ebe nit mondogat ninendawimo welagarek.

⁷ Mene re, at Kristus nen sumbutnisikherek higithogoat, Allah obabut fano nen, yabu hunogo tomok hilingiti logouwageluk ninobabut lombok wo'nisasikhe.

⁸ Andi nenat, Allah nen mel iluk isikhe: ”At ebe pogot halianggen oba po'lima lagaigeluk, at inom weak mene inenggi hele warogo fisaluk woginarek lagasikhesik he, fano mene ekhe afuni onggo lek sumburogo pelagisa wagaikhe,” iluk isikhemo lisu palogo fesukwa andi.

⁹ ”At ebe lagasikhe,” iluk isikhe andi ebe re, at ebe kweang a'ma pisikhesigen lagasikhe, iluk u hak isikhe andi.

¹⁰ At ebe kweangma inom, pogoroba inom, o yi awi ti awi mondogat inom, logoigeluk he, kweangma pi wagaikhesik he, hobuk ambotkwe pogot halianggen oba po'lima lagasikhe andi.

^11-12 Nen, sumburogo pelagisa wagaikhe andi ebe re, nit Allah againafuri ninebe mondogat Kristus ebe hangge were'ma, o wutarek hak wurogo ninobagagunem, ninebe mondogat Allah faget hilingiti logouwageluk he, ninebe lombok ninayonggo fuluk menninobagalik lagaikhe andi. It ekhe Allah ane waluk loageluk inayonggo figik, it ekhe Allah ane yagaisikhi logouwageluk inayonggo figik, it ekhe fano wene afuni endakwe mene faget yagaisilik loageluk inayonggo figik, it ekhe Allah againafuri kwelaginarek logolik wene yagaisikhi logouwageluk inayonggo figik, ninebe lombok a'nogo ninayonggo fesikhe andi.

¹³ A'nogo hilingiti logombik, ninendawinggen at oba eberogoat himbirik logolik he, ninebe misigat mene hangge hilinglagik, Allah amlogo andi ebe furogo ninelu agik, at Kristus yi mene ti mene faget endawinggen katokhogo wurik mondok welagarek hak, nit ninendawinggen a'nogoat wurik agik, ugun andi.

¹⁴ A'nogo hilingiti logolik, ninobabut yenggerugwi inobabut sogoien i ha'labu funhogo lagik-wagik hilingitarek andi hak, nit a'nogo hilingiti logouwagen iluk, it afuni ekhe inobabut lagoksek mene nen ineranen meneat he, eberogoat hangge lalninabuogeluk, wene hunogo wene hobugalep yaganisa weri'lagwi andi inane holugun lek.

¹⁵ Meneat he, ninobabut inaluendek inobabut hanggeat wanhi logogun. Afuni inebe ninendawirogo logolik, wene eberogoat mene nek igik, yi mene ti mene faget hilingiti logolik Kristus endawinggen katokhogo wurik mene logolik hilingiti lagaikhe hak hilingitik ikhi logolik, at obabut wanhi logouwogo.

¹⁶ Ninebe ninenggi nineisok ninoba hundik welagarek mene ekhe mondogat ninomanggen oba hundik fano logolik, hunogo tomok hilingisu mene hilingitunem, ninebe fano welagorek andi hak, nit ninoe Kristus ebe ninom hundik logolik, ninobabut lombok hilingiti logogun mene higithogoat hilingiti logogun halok, afuni inalue aga logolik inendawinggen wurik agarek hak, afuni ekhe inebe ninendawirogo hilingiti logolik, ninebe Kristus ebe hangge ninomame asimbik logogun andi.

At Kristus ninom hundik logolik, ninobabut ket hunogoat hilingiti logogun wene

¹⁷ An nineisena Tuhan ninom hundik logolik, aren yagahisa hak wene yi komorogo yagahisak. It afuni endakwe mene inobabut hilingiri'lagwi andi hak, hit hinobabut a'nogo hilingiti logogubo. It andi, we tulemat mene oba ebeti logolik he,

¹⁸ inendawimo mumat werek. Inendawinggen helep hangge abirengge nen he, fano wene inonggorat logolik, Allah nen afuni inelugerinaferek mene a'nogo inom hundik lek it ekhe mene welagaikharek andi.

¹⁹ It inobabut he, ”Weak hilingiti lago,” iluk, inailorogo welagaikharek lek. Iren ikhi logolik, ”Nit he, weak hilingirikhi logogun,” iluk, yi weak ti weak inenggali legat hokhorogo hilingiri'lagwi andi.

²⁰ Meneat he, at Kristus nen, ”Hit weak a'nogo hilingiti logoino,” iluk, yagahisigi'lek.

²¹ Hit at abok holhigipsik hinom hundik logolik, ebe wene Yesus hilingitikhe wene andi, yagahisasukwama wanhigip anggigi.

²² Attak he, hinendawimo yi namolo ti namolo anggikhi lagagip andi nen he, lalhinafunem he, hinebe alomat lakhikhi lagagip andi nen he, hinobabut attak mene andi herakfisano o.

²³ Andi herakfisaluk, hinendawinggen inom, hinendawimo ebeti lagep mene andi inom, Allah nen hinobabut ket mene hilinghinafi logouwago.

²⁴ Hinebe eberogoat, at Allah nen onggwarek faget fakhaluk, aren he, hinobabut higithogo hilingiti logouwageluk, at obabut hangge ket mene hilinghinafe mene andi, su labetarek hagat labeti logoino o.

²⁵ Nit mondogat ninebe at Kristus enggi eisok hangge ninom hundik welago andi nen he, ineranen agarek mene andi herakfisaluk he, hinerugwi hinagaila'lak hinom hinane eberogoat mene nek ikhi logoino o.

^26-27 Hina'mage lagaikhe halok, weak hilingitup. Hina'mage lagaluk were'ma, Iblis nen hinendawimo kagalinogo iluk, o mo eil oan ubukhogo kwigi'lek werek kwelek, sagalogo leget feino o.

²⁸ Hit ekhe nen yogot wanhi lagep mene halok, hobuk a'nogo wanhi'lek logolik, it inenggi lek mene leberisikhi logouwogeluk, hinonggwarek yabu hinenggi omamerogo wanhi logoino o.

²⁹ Weneane uogeluk halok he, weak mene ikhi logogubo. Wene fano mene ugunem it ekhe inendawinggen oan mene inesanggo holugun mene andi Allah nen fanorinafunem, inendawinggen wurik asuageluk, wene fano mene nek ikhi logoino o.

³⁰ Allah nen hobuk hinebe fanothinabigeluk attagat Areagun wokhisasikhemo hinendawimo werek andi nen endawimo weagetfugubo.

³¹ Inane haro weak igik, ina'makwe het-pet igik, ina'mage lagaluk, inane uarek-puarek wene palhik, ineranhogo inabok weak palhik, agarek mene andi herakfisikhi logolik he, weagerinafarek mene inom mondogat herakfisikhi logoino o.

³² Herakfisaluk he, hit-hit hinobabut enago lioksek logolik he, hit weak hilingiti lagagip mene at Kristus nen sebelogo legetfesikhe mene, Allah nen legetfisasikhe andi hak, hinerugwi hinagaila'lak ekhe nen weagethinafu halok he, wene andi legetfisikhi logoino o.