EFESUS 3 - Allah Wene Fano Wene Hupla Inane

Wene Allah endawimo hinago welagaikhe mene Paulus nen afuni endakwe mene yagaisoageluk ayonggo fesikhe wene

¹ Andi nen he, an Paulus hit afuni endakwe mene Kristus Yesus nen telhinabuageluk, at faget nenggi hele warogo nobagagama welagi.

² Afuni nen he, ”Allah obabut fano a'nogo nen, it afuni o Efesus mene fano asuageluk, at Paulus ayonggo fesikhemo fano wene yagaisilik nikho,” iluk ugunem hinesanggo arat holhigip anggigi.

³ Wene at Allah endawimo hinago welagaikhe mene andi, an fakhogo yaganetikhe, iluk lisu katokhogo palogo yagahisasigi andi.

⁴ Hiren wene andi enu salhi logolik he, ”Wene Kristus faget hinago welagaikhe mene andi, at Paulus elu agasik werego,” iluk enegat futfogoin andi.

⁵ Fageat he, wene andi afuni ekhe fakhogo yagaisigi'le'ma, inonggorat welagaukwama re, yogondagen Allah Areagun en, it ap Allah againafuri Yesus nen inayonggo fuluk lakfisasikhe mene omanogo inom, Allah ane yagaisili'lagwi mene omanogo inom, fakhogo yagaisasikhemo inelu agaukwa andi, wene ebe re, yi'nogo.

⁶ Fano wene andiba, it afuni endakwe mene inom, Yahudi mene inom, inom higithogoat eisewerek hilinglagik, Kristus ebe misigat mene ninom higithogo hunogo ninobagagik, ikhemo welago. Wene fageat Allah nen, ”Yi'nogo hilinghinabigin,” iluk, abok yaganisasikhe a'nogoba, ”Afuni endakwe mene Kristus Yesus inom hundik were'ma, fano wene andiba ninom higithogo hilingninabigin,” iluk, ninelu aga andi.

⁷ An afuni inamingmingengge hak logolik, wene andi sumburisikhi logouwageluk, Allah obabut fano nen omamerogo hilingninaferek higithogoat nayonggo fesikhe andi.

⁸ Allah againafuri mene mondogat inenuwerek werek kwelegat he, an nenu lek, elo'lek mene, at Allah obabut fano nen, fano wene pilingisogo u elo'lek mene, Kristus nen wogisikherek a'nogo afuni endakwe mene yagaisilik nikhi logouwageluk nayonggo fesikhesik neabu andi wo'netikhemo welagi.

^9-10 At Allah yi mene ti mene mondogat elalhikhe mene a'nogo nen anggikhi logolik, ebe yi'nogo hilinglasigin, iluk, wene endawimo hinago welagaikhe mene, afuni mondogat weinamhogo yagaisilik nikhi logouwageluk nayonggo fesikhe andi. Nen, it ap malaikat pogoroba kwe yonggo nikharek mene omanogo inogogwi kaindek inom, inane hologo welagaikharek mene inom, nit Allah againafuri nen he, ”At Allah yi mene ti mene faget endawimo mondok wenggelek,” iluk he, yagaisugunem yogondak ya inelu asuageluk, fagearen wene andi Allah endawimo hinago mondok welagaikhe.

¹¹ Eroba nen, at Allah nen a'nogo hilingninabigeluk endawimo anggasikhe mene andi, at Tuhan Kristus Yesus nen hilingisuageluk lakfei wagaikhemo, ebe hilingitikhe andi.

¹² Nit ninendawinggen at oba eberogoat himbiret fuluk, at ninom hundik logolik, ninailo lekhogo ninendawinggen hambukhogo Allah oba kugun andi.

¹³ Andi nen he, an yogondak ya hit faget weagetnabi'lagwi andi nen hinendawimo puk agi'lek logogun halok, fogethinabugun andi nen, komothinafi lagi o.

At Paulus nen Allah ayonggo figik, ebe fogeratik, isikhe wene

¹⁴ Andi nenat, an neisena Allah eilhanem neindep awi yagaisogo ayonggo fikhi lagi.

¹⁵ It pogoroba welagaikharek mene inom, nit kweangma yoma welagorek mene inom, ninebe mondogat ninobabut lombok Arenat wo'nisikherek andi.

¹⁶ At Allah yi mene ti mene mondok fano mene enggi werek iluk u hak, fogeratu welagaikharek a'nogo nen, Areagun oba hinomamerogo hinendawinggen wuriget hinabuageluk ayonggo fikhi lagiat.

¹⁷ Hinendawinggen at Kristus oba himbiret foumo, at ebe hinendawimo awi wurogo were'ma re, yi mene ti mene awi yatunem omanggen yatik, o tik ninghogo watik, agarek hak, hinobabut he, afuni ekhe inebe inendawirogo welagaikharek andi meneba hinomanggen yakfuluk ninghogo logobagaigen iluk, Allah ayonggo fikhi lagi aro.

^18-19 Afuni nen o wusuogeluk, huli uankwe yiba, horokwe yiba, tik pelabugun yiba, timuk liabugun yiba, iluk walhagarek meneat he, ninebe Kristus nen endawirogo welagarek andi mene, huli yiba, iluk walha re, elo'lego. Hokho aro. Walha elo'lek meneat he, Allah againafuri ekhe mondogat hinom higithogo futfobagaigen, Allah nen hinendawinggen wuriget fugunem, at ebe abirengge hinendawimo mondok peterogo logouwageluk ayonggo fikhi lagi aro.

²⁰ At Allah at fogerati logouwok. At ebe ninendawimo logolik omamerogo hilingninaferek andi re, mondok hokho andi nen he, niren ninendawimo ebetik, kino yagatik, ogorek mene higithogo hilingiti'lek, aren he ekhe inom mangorogo hilingninobagaikherek andi.

²¹ Nit Allah againafuri andogorek mene mondogat Kristus Yesus ninom hundik logolik ninebe ekhe hobuk mene ket ta'larik lagu kwelek, Allah eberogoat fogeratu mondok logouwok, iluk, ”Amin,” igi andi.