EFESUS 2 - Allah Wene Fano Wene Hupla Inane

Warek hangge were'ma, nineluget ninafikhe wene

¹ Hit attak he, Allah ane sagalogo fuluk weak hilingiti lagagip andi nen, hinendawinggen faget hinebe warek hangge welagagip.

² Andi sambul he, afuni yoma inobabut inetogat logolik hilingitarek hak hilingiti lagagip. A'nogo hilingiti logolik, munggwarengge inobabut weak mene inoe kain pogot abel manggwe yoma eisewerek logolik, afuni Allah ane inabiren inesanggo holharek lek mene inendawimo kwisikhesik yogondak inendawimo kagalhoat welagarek mene a'nogo ane hologo welagagip andi.

³ Attagat nit mondogat it hilingiri'lagwi hagat hilingiti lagagu. Ninobabut afuni inobabut inetogat logolik hilingitarek hak hilingiti logolik, ninoba aigage lagagunem weak hilingitik, ninendawimo anggaluk weak hilingitik, ikhi lagagu. Andem sambul he, afuni inobabut inetogat logolik hilingitarek ninom higirat were'ma, Allah a'mage lagaluk he, weagetninabigeluk welagaikhe.

⁴ A'nogo welagaikhe meneat he, hobuk at obabut fano enago mondogen, hokhorogoat endawitninafikhe.

⁵ Nit weak hilingiti lagagu andiba, ninendawinggen faget ninebe warek hangge were'ma, Allah obabut fano enago nen Kristus ninom hunogo ninobagasikhesik ninomat nineluget ninafikhe. Mene re, hirat At obabut fano nenat telhinafikhe andi.

⁶ Nineluget ninafikhemo re, nit Kristus Yesus ninom hundik were'ma, hobuk at ninom pogoroba kain logolik it ekhe ninawe a'ma ferinarek logouwageluk ninom menninobagasikhe andi.

⁷ At Allah a'nogo hilingitikhe andi re, o hobuk logogun andem oba logolik afuni nen he, ”Allah obabut fano mondogen endawitninafikhe,” iluk enegat futfikhi logouwageluk telninafikhe andi, ebe re, Kristus Yesus nenat telninafikhe.

⁸ Hit hinendawinggen at oba eberogoat himbiret fugunem he, at obabut fano enago a'nogo nen telhinafikhemo welagep andi, ero hinonggwaregen telegep fuk, we, yi mene ti mene onggo legat wogisagarek hak, at Allah obabut fano nenat telhinafikhemo welagep andi.

⁹ Hiren, ”Nit fano hilingiti lagaguba telninafikhe,” iluk, hit ekhe hinonggwaregen fogerakhogoin mondok lego.

¹⁰ Arenat fano hilingisogo ninobagasikhemo welago. Andi re, nit Kristus ninom hundik logolik, yi mene ti mene fano men nek hilingiti logouwageluk, ninobabut ket hunogoat elalninafikhe andi re, ebe Kristus Yesus nenat elalninafikhemo welago.

At Kristus nen ninebe at onggwarek ninom misigat lambulogo ninobagasikhe wene

¹¹ Hit attak he, hinebe endakwe mene welagagip andi, hinendawimo ebe'ni. It ap Yahudi mene afuni ineranen inagap inenggalimo mene palinafukwa mene andi nen, hit faget he, ”Inagap inenggalimo mene palek lek mene,” iluk ikhi lagaukwa.

¹² Andi sambul Kristus ebe hinom heksek logolik, hinebe Israel mene lek. We, it ekhe mene welagagip. A'nogo were'ma, at Allah nen he, wene it Israel mene inom wati logolik he, ”Yi'nogo hilinghinabigin,” iluk abok yagaisasikhe mene a'nogo, hit hinonggorat logolik, ”Fano asigin,” iluk hinendawimo anggigi'legat, Allah awe a'ma kwigi'lek, kweangma yoma logolik, Allah ebe hinonggorat welagagip.

¹³ Attak he, hinebe yatmaat welagagip meneat he, yogondak, Kristus Yesus hinom hunitigipmo re, at amep wulagaisogo wa'lagaikhe andiba, horok ya hinobagaikhemo welagep.

¹⁴ Afuni Yahudi mene inom, endakwe mene inom, inom heksek were'ma re, tulemkwe palogo leget hokho mene hak welagaikhe mene re, at Yesus nen lambulogo ninobagaikherek mene a'nogo ebe wa'laga logolik huli palek a'nogo meisalogo legetfisasikhesik he, ninebe misigat lambulogo ninobagasikhemo welago andi.

¹⁵ At Kristus nen, ninunggul enu Yahudi mene inom, endakwe mene inom, pire andem welagaikhe meneat, at ninom hunogo misigat ninobagaluk ninunggulenu misigat ket mene lambulogo ninobagaigeluk he, wene Allah nen komorogo ”Yi'nogo hilingi'no, ti'nogo hilingi'no,” iluk yaganisasikhemo wene palek werek mene andi sebelfisikhi logolik, ninom hunogo ninobagasikhe andi.

¹⁶ At Kristus ebe eba menfuluk watukwama wa'laga logolik, Allah ninom weak weim palek hak welagagu mene andi, sebelogo legetfisaluk he, ninebe fena mene, fena mene ninom misigat lambulogo ninobagasikhesik Allah oba wo'ninarek wagaikhe andi.

^17-18 At Yesus nen a'nogo wo'ninarek wagaikhemo re, fena mene, fena mene ninom, at Allah Areagun misigat andiba nineisena Allah oba ku higirat hilinglagaikhe, iluk, Yesus ebe attagat wagaikhesik, ”Hinom lambulogo hinobagagi o,” iluk, wene fano wene hit endakwe mene yatma were'ma yagahisigik, nit afuni Yahudi mene horogat were'ma yaganisigik, i wagaikhe andi.

¹⁹ A'nogo wagaikhe andiba, hit hinebe endakwe it ekhe mene, ap pok mene hangge welagagip andi yogondak a'nogo lek agaikhemo, hinebe Allah againafuri agagipsik, it hinom, at Allah awiba andoma hinawi weregat agagipsik welagebo.

²⁰ At Kristus Yesus ebe o tik esin hangge warek were'ma re, it ap aren inayonggo fuluk lakfisasikhe mene omanogo inom, it ap Allah ane yagaisili'lagwi mene omanogo inomen, oba loukhogo wuti lagaukwama re, hit hinebe niren oba loukhogo wurogo hinobagasugumo welagebo.

²¹ Nit mondogat ninebe lombok, at Yesus ninom hunogo hinobagasikhesik he, o sep hun-hun wutarek hak, o andi mondogat nineisena Allah onggwarek faget awi wurogo ninobagali'logo andi.

²² Andi hak he, hit Kristus hinom hundik were'ma, it ekhe hinom o misigat Allah awi wuri'mo Areagun logouwageluk, wurogo hinobagali'logo andi.