EFESUS 1 - Allah Wene Fano Wene Hupla Inane

Hai warinafikhe wene

¹ Hit Allah againafuri o Efesus andogoti lagep mene hinendawinggen Kristus Yesus oba himbiret fuluk hinom hundik welagep mene, nerugwi nagaila'lak. An Paulus, Allah endawimo anggasikheba, at Kristus Yesus nen nayonggo fesikhesik laknobagai wagaikhe mene a'nogo nen wene yi lisu palogo hinoba lakfei wagi andi.

² Nineisena Allah ninoe Tuhan Yesus Kristus emberek inobabut fano a'nogo nen, fano mene wokhisigik, hinendawinggen hambugethinafik, ikhi logouwago.

”Nit Kristus ninom hundik were'ma fanotninaferek,” iluk yagaisasikhe wene

³ Ninoe Tuhan Yesus Kristus eisena Allah at fogerati logouwogo. Nit Kristus ninom hundik were'ma, at Allah nenat fano mene mondogat ninendawinggen faget pogoroba nen wo'nisasikhemo welago.

⁴ At Allah nenat ninebe at onggwarek faget fakhaluk, at eilhanem tegelek logouwageluk, pogot kweang oan elalhi'lek logolik, wena'ninafikhe andi ebe at Kristus nenat wena'ninafikhe o.

⁵ At Allah ninebe endawi nen, onggwarek endawimo nenat, ”Kristus Yesus nen, it woginafunem an nagainafuri asuageluk,” attagaren ninebe wenagaisogo wo'ninafikhe andi.

⁶ At obabut fano nen amlogo endawinggen tulem mene endawi agi'legat wo'nisasikhe andi faget, niren he, ”Egi. Nailo e,” iluk, fogerati logouwogo.

^7-8 A'nogo wo'nisasikhemo, ebe amep wulagaisogo watukwa andiba, ninonggo palogo telninafik, nit weak hilingiti lagagu mene legetfisigik, isikhe andi. At Allah endawimo kagalek logolik ninebe futninobagasikhesik he, obabut mondok fano a'nogo nen hokhorogo endawitninafikhe andi.

⁹ At onggwarek, a'nogo hilingninabu amolo nen: ”Yi'nogo hilinginabigin andi ebe at Kristus nen hilinginabuak,” iluk, wene at endawimo anggasikhe mene hinago welagaikhesik fakhogo yaganisasikhe andi.

¹⁰ Wene at endawimo hinago welagaikhe andi ebe re, hobuk hilinglasigin oba hilinglasi lagunem, aren yi mene ti mene pogoroba welagarek mene inom, kweangma welagarek mene inom, mondogat lambukhogo Kristus alegat awe a'ma ninobagagin mene faget abok yaganisasikhe andi aro.

¹¹ At Allah nen he, ”Yi'nogo hilinglasuak, ti'nogo hilinglasuak,” iluk endawimo anggikherek higithogoat yi mene ti mene mondogat hilingitunem hilinglagarek andi nen he, ”It inebe an nonggwarek nagainafuri asuageluk,” wenagaisogo wo'ninafikhemo re, eisewerek agagu andi.

¹² At ebe fogeratu mondok welagaikharek mene a'nogo, niren fogerati logouwageluk, ninendawinggen omanggum Kristus oba himbiret fesugu mene halok wenagaisogo wo'ninafikhe andi.

¹³ Andi hagat he, hiren wene ebe wene, fanotninaferek wene a'nogo hinesanggo holhigipsik he, eberogoat iluk hinendawinggen Kristus oba himbiret fesigipmo Allah nen he, ”Nareagun wokhisagain,” iluk, abok yaganisasikhe higithogoat, ”It an nonggwarek nagainafurio,” iluk Areagun wokhisasikhe andi.

¹⁴ Allah nen ikhi logolik he, ”An nen yi'nogo wokhisagain, iluk abok yagahisasigi mene andi, hobuk wokhisageluk, Nareagun lilu wokhisasigisik hinebe telogo wokhinabigin aro,” iluk yaganisasikhe. A'nogo yaganisasikhe andi nen, Allah fogeratu mondok welagaikharek mene andiat fogerati logouwogo.

Paulus nen Allah againafuri o Efesus mene faget samban isikhe wene

¹⁵ Andi nen he, hit hinendawinggen Tuhan Yesus oba himbiret fuluk, Allah againafuri ekhe mondogat hinendawirogo hilingiti lagep mene andi, afuni ekhe nen hinabok ugunem nesanggo holhi.

¹⁶ A'nogo holhirik he, hit hinobabut hilingiti lagep andi faget, hundik-handigat kamo igi'lek hinenu ilik-ilik Allah hai wato mondok welagirek.

¹⁷ Hit faget he, Tuhan Yesus Kristus eisena Allah fogeratu mondok welagaikharek mene a'nogo nen, hinendawimo mondok kagalek mene wokhisigik, at ebe furogo futfobagaigen iluk yagahisigik, ikhi logouwagen iluk, Areagun wokhisoageluk ayonggo fikhi lagi.

¹⁸ Arenat hinendawimo selegethinafunem, hiren he, ”Ninayonggo fesikhe mene a'nogo nen hobuk fanotninabigin,” iluk, hinendawimo hinagaiyekhogo oba eberek welagep mene a'nogo hinelu agik, yi mene ti mene fano mene fogeratu mondok logogun mene at againafuri wo'nisageluk hokhorogo andogorogo ninobagasikhe mene andi, hinelu agik,

^19-20 at omame mondok hokho mene a'nogo nen, nit ninendawinggen at oba eberogoat himbiret fesugu mene halok, omamerogo hokhorogoat lebetnisili'logo mene andi hinelu asubagaigen iluk ayonggo fikhi lagi. At omame andiba re, Kristus ebe wa'lagaikhemo eluget fuluk pogoroba liak fesikhesi'mo re, at era'lu enggi ebekwe kain Enupogot logouwageluk menfesikhe andi higithogoat he, At omame a'nogoba lebetnisili'logo andi.

²¹ A'nogo menfesikhe andi re, it pemerintah kain mene ekhe mondogat inom, inenupogot mene ekhe mondogat inom, inogogwi kaindek ekhe mondogat inom, kaindek it ekhe inawe a'ma ferinarek welagaikharek mene mondogat inom, inenuwerek yogondak werek mene inom, hobuk logogun mene inom, mondogat he, inenu sebelek werek kwelek at Kristus enek he, esin lego logouwageluk menfesikhe andi.

²² Allah nen yi mene ti mene pogoroba kweangma welagarek mene mondogat waganogo at Kristus alegat enggiba fesikhe. Nit Allah againafuri mondogat yi awi ti awi welagorek mene ninunggul he at Kristus ebeat kain logouwageluk at wo'nisasikhesik menfesikhe andi.

²³ Nit Allah againafuri ninebe at Kristus ebe aro. Mene re, yi mene ti mene, pogoroba kweangma welagarek mene mondogat at Kristus endawimo peterogo logolik, nit Allah againafuri at ebe hangge were'ma, ninendawimo peterogo welagarek andi.