DANIEL 7 - Allah Wene Fano Wene Hupla Inane

DANIEL ABIKANGGO YETHIKHI LAGAIKHE MENE TINDELHIKHE WENE 7:1–12:13 Singa hangge mene inom, paik hangge mene inom, ebe 4 en mene weinam agunem Daniel abikanggo oba yethasikhe wene

^1-2 An Daniel, ap Belsyazar afuni Babel mene inoe raja agaikhesik oba, tahun attak ferinarek welagaikhe andem oba, nenggi ekhe sambul nabikanggo yethasigisik he, nabikanggo yethasigi mene andi lisu palogo fesigi mene ebe re, yi: Sogoi o mo ero fikhiren, erembul fikhiren, i elesi fikhiren, ambut fikhiren, aninirogo funha waga logolik, i laut hokho yenggelek a'nogo abologet hugunem he, ha'labu hokho mene hilingitunem higi.

³ A'nogo hilingitunem he, paik sou hangge mene inebe 4 en mene re, mondok hokhondek ebe yinik-hunik mene ima nen wulibi wagunem yethigi.

⁴ Attak-attak wulibi waga mene re, ebe singa hangge meneat he, ogolabi sue pim ogolabi hangge mene wulibi wagunem yethigi. A'nogo yethigirik yerogo were'ma ferekhogo aremnogoat ogolabi henegeisogo pikhesik he, kweangma nen legeisogo afuni mendek welagaikharek andi hak eisok pireba yagaisogo menfikhesik, obabut he, afuni inobabut hangge wogotunem yethigi.

⁵ Attak a'nogo wulibi wagasik oba nen, ombo'ne re, paik inum hangge hokho mene enu beruang wulibi wagunem yethigi. A'nogo wulibi wagasik, at ebe eisok pireba mendek logolik aik elema re abeloak henagan mene salukhogo were'ma yethigi. A'nogo were'ma higiri'mo nen he, at ekhe nen ane mel yagatunem nesanggo holhi: ”Eino mene andoma honggwarek hendawimo hamolo anggegen higithogoat hokhorogo nan o,” iluk yagatunem holhi.

⁶ A'nogo holhirik, neilenggenat penetu were'ma nen he, it singa hangge mene inom, paik hokho mene hangge inom, inebe pire a'nogo wulibi wagaikhasik oba nen ekhe posi hangge hokho mene enu harimau wulibi waga mene re, ambot oba ogolabi sue ogolabi hangge enggaminogo hilingi'mo re, unggul he enggaminogoat hilingik welaga. A'nogo hilingi'mo at ebe mondok along palonghogo hilingi'mo higi.

⁷ A'nogo higirik, neilenggen kumutu were'ma nen he, enggaminogo mene ekhe weinam aga, At andi omame mondok hokho mene re, inailo a'luk youk hokho la mene higi. At aik he, hokhondek mene re, posiemanggen haroweak andi hak hilingik welaga, aren senggelhungge omanogo warogo sebel fakhaluk misigam pilisikhi laga higi. Nen abu'nengge omanogo eisogen aldandam isikhi laga. It attak-attak weinam agaikha mene aremnogo re hunogoat hilingik kwelek, at andi nek he amurogoat hilingi'mo higi. At andi andimuk ungguloak oba 10 nen wilibik welaga.

⁸ A'nogo yethigirik, neilenggen andimuk andoma yerogo were'ma re, aremnogoat andimuk 10 nen andem werek kwelek anggele'ma andimuk ket mene ekhe wulifunem higi. Andimuk andi ebe magenggelak meneat he, andi wilifi logolik wogolik-wogolik he andimuk attak mene aremnogo henaganek mene henogo lagunem higi. Andimuk mage mene andi eilenggen afuni ineilenggen hangge werek mene re, ambeba nen fogerakhugunem higi.

Daniel abikanggo oba At eluk mondok welagarek mene yethasikhe wene

⁹ A'nogo yethigirik neilenggen oba mondok were'ma, e kursi inogogwi raja hurek welagaikharek mene ekhe fugunem higi. A'nogo fagama, At eluk mondok welagarek mene andi ebe kursi aremnogo ekheba hu'lagunem yethigi. Ap andi asu inom, esi inom, elokhonggen inom he mondok fano pogot anggulok hangge welaga. Nen, e kursi hurek welaga mene andi re eisok abampol hilingik meneba re, endu amulok kulung ugunem higi.

¹⁰ Nen, kursi hurek welaga mene andiba nen, i endu mene elesi wilibisogo lagunem higi. Nen, yi afuni ti afuni inebe mondok hokhorogo ribuan mene re At faget hilingiti lagaikha. Nen afuni inebe inenggi wenasu mondok elo'lek jutaan mene re At elokhoma mendek welagaikha. A'nogo logolik, afuni inanema waganogo wene inoba figik, kotik, igiluk suesingga omanogo mondogat funggulhunem neilenggen yerogo welagi.

¹¹ A'nogo neilenggen yerogo were'ma, at ekhe andimuk mage mene a'nogo onggwaregen ane mondok hokhorogo fogerakhigik, sewirakhigik, ugunem nesanggo holhi. A'nogo ugu were'ma no ebe enggaminogonek mene wulibi waga mene a'nogo ebe watesik he, ebe warek endumo woukhogo lakfisikhemo endu nen mondogat nuggunem yethigi.

¹² A'nogo meneat he, it singa hangge mene inom, paik inum hangge mene inom, posi hangge hokho mene inom, omanogo nek he, yi mene ti mene inenggiba welaga mene andi telogo wanhesik he, Hinebe nek he, huli ti huli hineluk logoino, iluk herakfisugunem yethigi.

¹³ O hubanggo andi sambul nabikanggo a'nogo yethigirik, neilenggen oba mondok were'ma nen At ekhe abat ta'lagaikhe mene ohena oba huli'liphogo re, At eluk mondok welagarek mene a'nogo oba higit lagasik he, era'lu horokhogo lagasik hai wat-wat ugunem yethigi.

¹⁴ Andi nen at a'nogo legeisogo fikhi logouwageluk, ebe raja menfikhesik, afuni mondogat At enggiba logouwageluk wogetunem higi. A'nogo wogetemo, afuni mondogaren inunggulenu lombok, inagap lombok, inane lombok, At awe a'ma logolik At faget hilingitunem yethigi. Aren omameba ferinarek mondok logolik inoe kain raja were'ma, it ekhe nen mabenet fisogoin mondok lek mene yethigi.

Abikanggo hasikhe mene omanogo ebe yi'nogo asigin mene faget iluk pilingisogo yagatikhe wene

¹⁵ An nabikanggo a'nogo yethigi mene andi faget nailo agarik he, nendawi firogo logolik menenei uan horok ebetu welagi.

¹⁶ A'nogo logolik, it ekhe mendek welagaikha omanogo mene ekhe nen wene andi faget mondogat ebe pilingisogo yaganesuageluk oba horokhogo lagarik yagati. A'nogo yagatimo, aren he, ”Yi'nogo hilinglasigin mene faget hegen,” iluk yaganeti logolik,

¹⁷ mel ikhe: ”Singa hangge mene inom, paik inum hangge mene inom, posi hangge mene inom, ebe enggaminogo mondok hokhondek mene yethegen andi ebe re, hobuk o kweangma yoma ap inogogwi kaindek raja inebe 4 en weinam asimbik ferinarek logogun mene faget hegen.

¹⁸ A'nogo meneat he, afuni Allah Enupogot againafuri nek he, o kweangma mondogat it inenggiba foumo logolik, hobuk lek agi'lek ferinarek mondok-mondok logogun,” iluk yaganete.

¹⁹ A'nogo yaganete meneat he, it ekhe inebe henagan mene wulibi wagaikhasik oba nen, at ekhe hunogoat mene ebe mondok inailoet fikherek mene re, enggi a'lip tembaga mene andiba inom, aik posiemanggen mene andiba inom, weagarinafik, at ninggerek mene warogo nilik lagik, fena weagarogo eisogen wulil tagalogo potfisigik, ikhi laga andi, Ebe ninggi'nogo hilinglasigin mene faget yethigi he, nelu a'le e, iluk anggigi.

²⁰ Nen, andimuk ungguloak oba ebe 10 nen wilibik andi inom, nen andimuk a'nogo wilibik were'ma, andimuk ekhe endep mene hobuk wulifunem, andimuk attak mene 3 nen mene re andimuk mage mene andi nen mi'lagama re henlaga andi. Andimuk endep mene andi eilenggen inom, ambe inom werek mene re, ane mondok hokhorogo onggwaregen fogerakhikhi laga. Andimuk wilibik mene fenakwe andi endebat elo'lek hangge mene re, ekhe mage mene andi nek he, mondok inailo asu hak andi re, Ebe ninggi'nogo hilinglasigin mene faget yethigi he? Nelu a'le e, iluk anggigiat.

²¹ A'nogo anggigirik, neilenggen oba yerogo were'ma re, at andimuk endep mene a'nogo nen afuni Allah onggwarek againafuri inom weim yafi logolik, mabenet fisikhi laga higi.

²² A'nogo mabenet fisugu were'ma, At eluk mondok welagarek mene a'nogo wagasik he, afuni Allah Enupogot againafuri mene omanogo wene inoba mene kotunem higi. Nen iren afuni ferinarek logolik melalinafi logogun oba arat hilinglagama re it inomame wogisugunem higi.

²³ A'nogo higimo nen ebe furogo nelu a'le e, iluk anggugunem, at a'nogo nen mel yaganete: ”Singa hangge mene inom, paik inum hangge mene inom, posi hangge mene inom, ebe 3 mene weinam agasik oba nen ekhe weinam aga mene andi ebe re, ap raja inebe 3 mene hunogo tomogat o kweangma yoma weinam asimbik oba nen ekhe weinam asigin meneat hegen o. Afuni nen sumburu haumhogo nenggarek hak, ap enupogot andi nen, afuni o kweangma yi awi ti awi welagaikharek mene, inoarik laga logolik, fena eisogen al perelinabigin mene hegen andi.

²⁴ Nen, andimuk ebe 10 nen wilibik were'ma yethegen andi ebe re, ap raja inebe 10 nen mene menlasimbik afuni ferinarek logolik melalinafi logogun mene faget hegen. A'nogo ferinarek were'ma, ap raja ekhe weinam asigin. At andi, it ap raja attak mene andem hangge lek, hunogoat mene weinam asimbik ap raja inebe 10 nen andem mene re, inebe henagan mene mabenet fisagain.

²⁵ At andi nen ikhi logolik he, Allah Enupogot mene ebe mondok nabiro, iluk Allah onggwarek againafuri yi enggin ti enggin hilinginafi logogin. A'nogo logolik, Allah againafuri at Allah ane hologo higithogo hilingitarek mene andi inom, pesta Allah faget hilingitarek andi inom, hunogoat hilingisogo feigiluk walhagain. A'nogo walhikhi logolik, inebe enggi ferinarek 3 tahun inom tugi 6 en ekhe inom logogin.

²⁶ A'nogo ferinarek were'ma, o pogoroba wene inoba figik kotik ikherek oba omanogo nen wene arat tekhogo imbigen enek he, at andi nen enggiba ferinarek logogin mene andi telogo wanimbik he, ebe wolelenggen tagalogo legetfisogoin.

²⁷ A'nogo hilingisimbik he, o kweangma yi awi ti awi mondogat inogogwi inenupogoren inenggi omameba ferinarek welagaikharek andi inom, inomame werek welagaikharek andi inom, mondogat waganogo Allah againafuri mene inenggiba fagain. A'nogo foumo, iren ferinarek mondok-mondok were'ma, ap kweangma mene inenu werek welagaikharek mene andi mondogat inebe it inawe a'ma logolik it faget hilingiti logolik inane hologo hilingiti logogun o,” iluk yaganete yethigi.

²⁸ A'nogo yethigimo, ”Ebe yi'nogo hilinglasigin mene faget hegenma o,” iluk yaganete mene lisu palogo figi mene ebe re, igi andi. Mene re, at andi nen a'nogo yaganetemo, nailo agarik nelokhonggen heiselhi meneat he, wene andi mondogat afuni ekhe yagaisigi'lek nendawimo agagi andi.