DANIEL 6 - Allah Wene Fano Wene Hupla Inane

Daniel ebe pogole singa werek oba pelafukwa wene

¹ At Belsyazar a'nogo ebe watukwama re, Darius aiba Media mene andi ebe umur 62 tahun oba, o andoma ferinarek logogiluk sebelhikhesik he, ebe raja logolik ferinarek welagaikhe.

² A'nogo sebelhikhesik logolik afuni aren ferinarek logogin oba andoma, o propinsi 120 nen logouwageluk tegelogo fesikhesik, o propinsi andoma ebe lombok ap gubernur misigat mene nen ferinarek logolik halinafi logouwageluk misik-misik filik lagaikhe.

³ A'nogo menfisilik lagaikhesik, it ap gubernur andi nen, at raja faget hilingiti'lek alomarogo logoinogo iluk, it ineabu wokfuluk raja yagasi waga logouwagaluk, at Daniel inom, ap inebe pire mene ekhe inom, inebe henagan mene andem menfisasikhe.

⁴ A'nogo menfisasikhemo, it ap gubernur omanogo inom, ap it gubernur lak ineabu wokfuluk inoe raja yagasi waga lagaukwa mene aremnogo inom, inomen he inobabut endebat elo'lek hangge meneat he, at Daniel enek he obabut higit logolik fano mondok hilingiti lagaikhe andi nen he, at raja nen afuni o ekhema-ekhema ferinarek welagaikhe kwe omanogo mondogat faget, ”Inoe kain he Daniel logouwagaluk menfagain,” iluk endawimo anggasikhe.

⁵ A'nogo anggasikhemo, it gubernur omanogo inom, ap it ferinarek welagaukwa mene aremnogo inomen he, Daniel andi yabu pemerintah faget hilingiti logolik, weak nena mene hilingitunem wene oba fogoin he, iluk ineil wanhi lagaukwa, meneat he at Daniel pemerintah faget hilingiti logolik he, weak ekhe hilingiti'lek, higithogo nek hilingitik, yabu ekhe hilingi'no agarek mene herakfigi'lek mondogat hilingitik, ugunem, afuni nen he, At elok, iluk ikhi lagaukwa andi nen he it ineil wanhi lagaukwa mene re ebe agaikhe mondok lek.

⁶ A'nogo hilinglaga lagaikhemo iren he mel isukwa: ”Niren wene Daniel oba fouwogoluk nineil wanhi lago mene re wene oba fou mene ekhe werek lek, we eisena Allah faget hilingiri'lago mene andiba nek he, wene oba elok fou hak werego,” iluk isukwa.

⁷ A'nogo isukwasik it gubernur lak inom, it ineabu werek higithogo inoe enupogot yagasi waga lagaukwa mene aremnogo inom, inebe mondogat at enupogot oba wagaukwasik mel yagatukwa: ”Darius henupogot mene ninoe. Hebe heluk mondok logoino o.

⁸ Nit ap kaindek, afuni haren hawe a'ma ferinarek welagen oba yoma ekhema-ekhema ferinarek welagorek mene ninebe mondogat gubernur inom, hat henggi ebekwe mene inom komorinaforek mene inom, bupati lak inom, ninomen wene arat tekhogo ogosigen wene palek oba loukhogo hilingiti logogun mene ekhe lisu palogo wene isa wulabinogen iluk yagaheto o, noe. Haren wene isa wulafi logolik he, Afuni nen inenggi 30 nen logolik amu mene faget, Nineisena ebe yi aro, iluk fogeratarek mene andi hea, afuni mene hea, ekhe ayonggo figik, kino yagatik, ikhi logogun mondok lego. We, an enek nayonggo figik, kino yaganetik, ikhi logogun o. A'nogo meneat he, at sa nen an nen wene ero wulafi mene andi hologo hilingiti'lek halok he, singa kweang habuli'mo welagarek oba pelakfisagain o, iluk wene ero wulabin o, iluk yagatukwa.

⁹ Wene isa a'nogo wulabimbik, lisu palogo, afuni Media mene inom, Persia mene inom, wene palek oba loukhogo hilingitarek mene andi hobuk sagalogo leget fuluk, hunogo mene ekhe hilingiti'lek welagaikharek andi hak logouwageluk henggi amusu fembik wene ero wulabin o, noe,” iluk yagatukwa.

¹⁰ A'nogo yagatukwama, at raja Darius nen wene melalek a'nogo, lisu palogo enggi amusu fesikhesik he wulafikhe.

¹¹ Afuni ekhe nen he, ”Wene a'nogo wulafe o,” iluk isukwama Daniel esanggo holhikhesik he, at a'nogo aiba lagaikhe. At aiba andi henambo re, jendela folelhigik elokhe o Yerusalem fikhit hilingik welagaikhe. A'nogo hilingi'mo, at Daniel hilingiti lagaikhe higithogoat, kwe jendela omanogo hut fesikhesik he, eindep awi yagaisogo, linggene inukhogo a'nogo sambul samban enggi altap henagan oba ikhi logolik, Allah fogerati lagaikhe.

^12-13 A'nogo Daniel samban Allah ayonggo fugu were'ma, ap Daniel inom weak mene omanogo lagaukwasik ineilenggen hasukwa. A'nogo hasukwasik he, it inebe mondogaren wene Daniel oba fouwogeluk, at raja oba wagaukwasik he, mel yagatukwa: ”Noe. Haren he, Inenggi 30 nen logolik afuni nen he, Nineisena ebe yi aro, iluk fogeratarek mene andi hea, afuni mene hea, ekhe ayonggo figik, kino yagatik, ugun mondok lego. We, an enek nayonggo figik, kino yaganetik, ugun o, iluk wene isa egendik lisu palogo henggi amusu fegendik wulafen lek nogo? Wulafen aro. Nen ekhe re, Sa nen an wene ero wulafi mene andi nane sagalogo herakfisikhe halok, pogolema singa welagarek oba andoma hambokhogo pelakfisagain o, iluk egen lek nogo? Egen aro,” iluk yagatukwa. A'nogo yagatukwama, at enupogoren he, ”Eberogoat. An nen nit afuni Media mene inom, Persia mene inom, wene palek oba louksek hilingitarek mene andi hobuk sagalogo leget fuluk, hunogoat ekhe igi'lek welagaikharek andi hak logouwagaluk mondogat wulafi o,” iluk yagaisasikhe.

¹⁴ A'nogo yagaisasikhemo, iren he, at raja mel yagatukwa: ”Noe, afuni Yehuda mene inenggi hele warogo woginarek wagaukwa mene omanogo mene ap ekhe enu Daniel a'nogo nen hat hebe endawimo sebelhobagaikhesik he, wene ero haren wulafen mene a'nogo serametfikhesik, o lingge misik sambul he samban enggi altap henagan oba Allah ayonggo fugu mondok werego,” iluk yagatukwa.

¹⁵ A'nogo yagatukwama, esanggo holhikhesik, endawimo mondok weak agaikhesik he, ”Ninggi'nogoba nen Daniel ebe eluk logouwageluk agap telogo fagain he,” iluk wenesugwi ebetu werek kwelek enek he huli o hu'mokwe huli ebetu welagaikheat.

¹⁶ A'nogo ebetu were'ma, it ap omanogo inambotkwe inoe raja oba logalogo wagaukwasik he, mel yagatukwa: ”Ninoe. Nit afuni Media mene inom, Persia mene inom, wene palek oba louksek hilingitorek higithogo, it inenupogoren wene ero wulak fuluk, hobuk wene oak sagalogo hunogo mene ekhe u lek hak andi nen he, hat hendawimo eberek welagen a? Eberek welagenat anggogo o, ninoe,” iluk yagatukwa.

¹⁷ A'nogo isukwama, hobugen at raja a'nogo wene arat tekhogo isikhesik he, Daniel ebe fakfembik pogolema singa werek oba omanogo pelabuageluk yagaisasikhe. A'nogo yagaisasikhesik, at Daniel mel yagatikhe: ”Hat hebe heisena Allah oba lombok hogo logolik, fogeratendek mene a'nogo nenat telhabuago,” iluk yagatikhesik he, pelakfesikhe.

¹⁸ A'nogo pelakfesikhesik helep hokho misigenek mene waluk wagaukwama re, pogole singa werek oba a'nogo kwe ambe to'mot fesikhesik he, ”Afuni ekhe nen Daniel kwe ambe hurogo wulakfei wesugun mondok lego,” iluk kwe sou yagarek a'nogoba, cap at raja mene inom, it ap kaindek mene inom, fesukwasik te'mekhogo yagarogo fesikhe.

¹⁹ A'nogo pelakfuluk, at raja a'nogo ambotkwe aiba wagaikhe. Wagaikhesik, sumburu ninggi'lek, nen afuni nen endawimo konhu mene abirat logolik, o hubanggo nogo endephogo ekhe igi'legat welagaikhe.

²⁰ A'nogo eluk welagaikhesik, o healhu kwelek aremnogo, at raja ebe siakhogo menlagaikhesik he, weak-weak pogolema singa werek oba a'nogo lagaikhe.

²¹ Arat horokhogo asi lagaikhesik, Daniel ebe endawi nen ane le anema mel yagatikhe: ”Daniel, Allah eluk mondok welagarek mene amingmingengge nagore. Heisena Allah oba lombokhogo logolik fogerati lagen mene a'nogo nen hat hebe singa oma ambelema nen elok telhafemo welagen a?” iluk heinok wokhasikhe.

²² Heinok a'nogo wokhasikhemo, at Daniel en he, mel yagatikhe: ”Henupogot mene noe. Hebe heluk mondok logoino o.

²³ An hamingmingengge neisena Allah andi re, an nen hat hoba ekhe weak hilingisogo figik, At oba ogo weak hilingitik, igi'lek mene andi re, at elu andi nen he, agoromi malaikat mene ekhe ayonggo fikhesik pelakfisa wagama singa ambe te'met fikhemo yi'nogo ti'nogo ekhe hilingnafi'lego, noe,” iluk yagatikhe.

²⁴ A'nogo yagatikhemo, at raja endawimo agaiyek mondok agaikhesik he, ap ekhe nen Daniel pogolema singa werek oba a'nogo nen kwe lombit hurogo liakfei wesuwageluk yagaisasikhe. A'nogo yagaisasikhemo, arat liakfei wagaukwasik, ineilenggen kwelakhasukwa re, at Daniel endawinggen eisena Allah oba himbiret fuluk welagaikhe andi nen he, oba yi'nogo ti'nogo ekhe hilinglagaikhe le'ma hasukwa.

²⁵ A'nogo hasukwama, at raja nen, it ap Daniel wene oba fesukwa mene omanogo fakfisasikhesik he, inagainafuri inom, inagagwi inom pogolema singa werek oba a'nogo pelaginabuageluk yagaisasikhemo, pelaginafukwa. A'nogo pelaginafukwama, inebe pogolema singa werek oba a'nogo kweang oba tunghogo pigi'le'maat singa omanogo nen inebe halulum higik inoak inom mondogat tamulogo nasikhe.

²⁶ A'nogo arat hilingi'luk, at raja Darius nen he, lisu palogo afuni inunggulenu lombok, ineisok erokwe lombok, inane lombok, o yi awi ti awi welagaikharek mene inoba lakfikhi logolik: ”Hinendawinggen hambukhogo fano logobagaigiluk he, hai wathinafi o,” isikhe.

²⁷ ”Hit afuni an nen fethinarek welagirek oba welagep mene mondogaren he, Daniel eisena Allah fogeraterek mene andiat hinailorogo welagik, fogeratik, ikhi logoino o. At andi re, hundik-hundik Allah eluk mondok welagarek mene, o wurep kobokhogo andoma afuni arenat ferinarek mondok logogin. Aren ferinarek welagarek mene andi re lek agi'lek, At enggiba mondok-mondok logogun.

²⁸ At Allah nen inebe telinafik, hele warek were'ma fikhalinafik, ikherek. Pogoroba inom, kweangma inom, at ebe fut fouwageluk elalin hilingisu lek mene hilingiterek. A'nogo hilingiterek andi nen, at Daniel ebe mene singa nen halmakhogo na mene telhemo o,” iluk yagaisasikhe.

²⁹ A'nogo hilinglagaikhemo, at Daniel ebe raja Darius werek oba nen pikhit ap Kores aiba Persia mene andi inoe raja menlagaikhesik welagaikhe huli enu werek welagaikhe hagat welagaikhe andi.