DANIEL 5 - Allah Wene Fano Wene Hupla Inane

Nebukadnezar amlogo raja Belsyazar en pesta hilingitikhe wene

¹ A'nogo isikhesik welagaukwasigen, inenggi ekhe sambul he at raja Belsyazar en pesta hokho mene hilingisigiluk ap kaindek-kaindek inebe 1.000 nen mene inayonggo fesikhemo wagaukwama inom logolik, i anggur amusu inom ninggi lagaukwa.

² A'nogo ninggi logolik, at Belsyazar en iwak emas mene inom perak mene inom at eisena Nebukadnezar en o Yerusalem Allah awi wuri'mo hore'ma omanogo nen wanhikhe mene omanogo wanuageluk it ekhe yagaisasikhe. A'nogo yagaisasikhe andi re, raja Belsyazar en he it kaindek andoma inom, agagwi ebe mene inom, agagwi amingmingengge mene woginafikhe mene inom, at ebe inom, iwak andomaba keralogo nogoin nen iluk isikhe.

³ A'nogo yagaisasikhemo, iwak omanogo at oba waluk wagaukwama re, at raja ebe inom, agoromi kaindek inom, agagwi ebe mene inom, agagwi amingmingengge mene inom inebe mondogat i anggur amusu iwak andomaba keralogo nasukwa.

⁴ A'nogo ninggi logolik, tugwi kembu emas mene inom, perak mene inom, tembaga mene inom, e mene inom, helep mene inom, pugunhogo agauwak hilingitukwa mene omanogo fogeratukwa.

⁵ A'nogo fogeratu were'ma aremnogoat, ap enggi palek, at raja awi hobat oba esage ibili'mo mondok selekse'ma aremnogo lisu palagunem at raja nen eilenggen furogo yerogo welagaikhe.

⁶ A'nogo hasikhesik ailo agaikhemo re elokhe heiselogo, eindep leik-leigenggeti logolik he oak omame mondogat lek agaikhe.

⁷ A'nogo hilingiti logolik ane hokhorogo mel isikhe: ”Ap wesagun yi mene ti mene elalin hilingitarek mene inom, yi wene ti wene awene inelu mene inom, hesagal awene inelu mene inom, wolisani o,” iluk isikhemo wagaukwama re, it ap o Babel mene inendawinggen kagalek logolik yi wene ti wene inelu mene omanogo inoba mel yagaisasikhe: ”Sa nen lisu palek mene ari enu salhik, ebe yi'nogo hilinglasigin mene faget lisu palek werek, iluk elok yaganetik, igin halok, an nen at agaukhogo su elokhonggen kibi-kibi warek hangge mene ap inenupogoren labetarek mene labetfigik, siong emas mene alonggopma ikfigik, igin o. A'nogo ikfembik, afuni an nen ferinarek welagi oba yoma nen at andi re nomor 3 along werek mene logouwageluk menfagain,” iluk yagaisasikhe.

⁸ A'nogo yagaisasikhemo, ap inendawinggen mondok kagalek mene at raja oba wagaukwa mene omanogo ekhe nen lisu palek mene andi enu salhik, ebe yi'nogo hilinglasigin mene faget lisu palek werek, iluk yagatik, u mondok elo'lek agaikhe.

⁹ A'nogo yagasu elo'lek agaikhemo, at raja Belsyazar mondok ebenagaik ailo agaikhesik he, elokhenggen ofuselogo hilinglagaikhe. A'nogo hilinglagaikhe andi nen he, it ap at agoromi kaindek omanogo inobakheindok palagaikhe.

¹⁰ A'nogo inobakhe palagaikhesik at raja ebe inom agoromi kaindek inom inane hokhorogo matu were'ma nen he, at he raja agaisa a'nogo esanggo holhaluk pesta hilingitunem kwi lagaikhesik mel isikhe: ”Henupogot mene neak. Hebe heluk mondok logoino o. Hailo a'luk helokhenggen heiselhi'lek hendawinggen hambukhogo logoino o.

¹¹ Andi re o kerajaan neisena haren ferinarek welagen oba yoma re ap ekhe, Neisena ebe yi aro, iluk fogeraterek mene areagun endawimo mondok peterek mene ekhe werego. Ap andi re hat heisena nen ferinarek welagaikhe aremnogoba re ungguloak mondok kwe hurik were'ma, yi wene ti wene futfikheresik endawinggen kagalek logolik, afuni nen he, Nineisena ebe yi aro, iluk fogeratarek mene nen endawimo kagalogo yagatunem hangge yagaisikherek mene werego. A'nogo ikherek andi nen he, hat heisena nen at andi ebe ap wene hobuk hilinglasigin mene yagaisagarek mene inom, wesagun yi mene ti mene elalin hilingitarek mene inom, yi wene ti wene awene inelu mene inom, hesagal awene inelu mene inom, inoe kain logouwagaluk menfesikhe mene ebe werek andi nen he, hendawinggen hambukhogo logoin o.

¹² Ap andi re ungguloa'ma mondok kwe hurik nen endawinggen mondok kagalek logolik yi wene ti wene mondogat elu hilingi'mo re, inabi hagarek mene, Ebe yi'nogo hilinglasigin mene faget hegenma iluk yagaisigik, ebe hinago mene fakhogo yagaisigik, yi wene ti wene onggo u mondok elo'lek mene elok yagaisigik, ikherek mene enu Daniel ikhi lagaukwa mene re, at enupogoren Beltsazar salhikhe agun andi werego. Ma re, aren lisu palek mene andi, Ebe yi'nogo hilinglasigin mene faget palek werek, iluk yagahesuagen he, wolhan o,” iluk yagatikhe.

At Daniel en lisu palek mene andi, ”Ebe yi'nogo hilinglasigin mene faget,” iluk yagatikhe wene

¹³ A'nogo yagatikhemo, at Daniel ebe waluk raja oba wagaukwama re, at raja Belsyazar en mel yagatikhe: ”An neisena enupogoren ap o Yehuda mene hele warogo woginarek wagaikhe mene ekhe enu Daniel aga andi hat fagera?

¹⁴ Hat hungguloak mondok kwe hurik. Afuni ekhe elo'lek hangge meneat he, hat he yi wene ti wene futfuluk hendawinggen mondok kagalek mene were'ma, afuni nen, Nineisena ebe yi aro, iluk agarek mene areagun hendawimo peterogo werego iluk yaganetama holhi andi.

¹⁵ Ap inendawimo kagalek mene yi wene ti wene inelu mene inom, wesagun yi mene ti mene elalin hilingitarek mene inom, inomen lisu palek andi faget, Ebe yi'nogo hilinglasigin mene faget lisu palek werek, iluk enu saluageluk noba woginarek wagaikha mene re, iren, Ebe yi'nogo hilinglasigin mene faget iluk mel senggerogo yaganesu mondok elo'lek aga o.

¹⁶ A'nogo elo'lek agama were'ma re, afuni nen hat habok ikhi logolik, At enek he, wene hinago mene, Ebe yi'nogo hilinglasigin mene, iluk elok yagaisigik, yi wene ti wene onggo u elo'lek mene elok yagaisigik ili'lago mene werego, iluk agama nesanggo holhi o. Ma re, haren lisu palek mene ari enu salimbik he, Ebe yi'nogo hilinglasigin mene faget lisu palek andi re werego, iluk elok yaganeten halok, an nen hat agaukhogo su elokhonggen kibi-kibi warek hangge ap raja nen labetarek mene labethobagagik, posiemanggen emas mene halonggopma ikfagagik, igin o. A'nogo ikhobagambik, afuni an ferinarek welagirek oba yoma, ninenu werek esin nomor 3 re hat menhobagagin o,” iluk yagatikhe.

¹⁷ A'nogo yagatikhemo, at Daniel en he, ”Noe, onggo wokhesigin egen andi re, hat honggwarek fakhagain halok fanoat, ap ekhe wogosigin halok ogo fano aro. A'nogo meneat he, an nen hat faget lisu palek mene ari enu salimbik he, Ebe yi'nogo hilinglasigin mene faget lisu palek werek, iluk yagahesigin o.

¹⁸ At Allah Lego Mondok werek mene a'nogo nen hat heisena Nebukadnezar ebe kain enupogot logouwagaluk menfesikhesik afuni at enggiba ferinarek logouwagaluk wogotik, enu hokho were'ma fogerati logouwagaluk hilingisogo figik, isikhe andi.

¹⁹ A'nogo wogotikhe andi nen, at ebe kain were'ma, afuni mondogat, inunggulenu lombok, ineisok erokwe lombok, inane lombok, at ebe inailo nen inoagelekwe abolok ikhi lagaukwa. Aren afuni ekhe inoasigin anggaluk halok, inebe mondok inoati lagaikhe. Nen, telinabigin anggaluk halok, telogo fisikhi lagaikheat. Nen, aren, afuni ekhe inebe sebelfisagain anggaluk halok, sebelfisigik, legetfisagain anggaluk halok legeisogo fisigik, ikhi lagaikheat.

²⁰ A'nogo meneat he, at onggwaregen, An elok, iluk foget fakhiki logolik, ungguloak helep mondok hilingitik, afuni inoba wiik-weakhogo hilinginafik, ugunem, Allah nen he, Hat henupogot logogin lek, iluk futfesikhesik, afuni inalilingge korogo wokhagarek andi hak, at enu laga lagaikhe mene a'nogo oba nen korogo wokhasikhe aro.

²¹ At ebe afuni inoba nen mugusogo wulakfisasukwama, obabut wam obabut hangge hilinglagaikhe. At ebe wam keledai maro mene inom enggama andoma welagik, sapi nen engga ninggerek hak ninggik, hilingiti logolik, enda'ma nogo ugu mondok were'ma henanggaluk pogoroba nen ebene sali pi waga lagaikhe. A'nogo welagaikhesigen, aren ikhi logolik, Ap inenupogot logolik afuni ferinarek welagaikharek andi re, at Allah Lego Mondok welagarek mene enggiba welagaikhare'ma higi. A'nogo enggiba logolik Aren, At andi hak ebe raja logouwak, iluk anggikherek higithogoat ebe kain inoe raja logouwageluk menfisikhere'ma higi o, iluk ambeba nen fakhogo isikhe.

²² A'nogo meneat he, at amlogo noe hat Belsyazar en he, wene andi mondogat helu logolik meneat he, hendawinggen sebel fakhugu aplere mondogat habit welagen andi.

²³ Haren he, At Tuhan pogoroba mene eilhanem he, leget fakhikhi lagen andi. A'nogo leget fakhikhi logolik, hailo legengge iwak o Tuhan Awi wuri'mo inenggi abisak wanhukwa mene omanogo wani loagaluk yagaisegenma waluk wagaikhama re, hat hebe inom, hagoromi kaindek inom, hagagwi ebe mene inom, hagagwi hamingmingengge mene woginafigin mene inom, hinom iwak andomaba i keralhigik nenggep andi. A'nogo ninggi logolik, hat hebe heluk inom, yi mene ti mene mondogat inom at Allah enggiba werek kwelegat he, At agaukhogo fogerati'lek, tugwi kembu perak mene inom, emas mene inom, tembaga mene inom, posiemanggen mene inom, e mene inom, helep mene inom, agauwak hilingisogo pugunetarek mene ineilenggen isa re elo'lek meneat, inesanggo holu elo'lek meneat, wene futfou elo'legat mene andoma oba fogerati lagen andi o, noe.

²⁴ A'nogo hilingiti lagen andi nenat, At Allah nen he, enggi palek andi ayonggo fikhesik, lisu ari palasuagaluk lakfei wagama palagunem hegen o, noe.

²⁵ Lisu palek ari ebe yi'nogo palek: Mene, mene, tekel ufarsin iluk palek werek. Hebelogo re. Wenakhigik, wenakhigik, enggin walhigik, minggilhigik, iluk palek werek.

²⁶ Wene ebe re, yi'nogo hilinglasigin mene faget: Wenakhigik, iluk palek werek andi re, ”Noe haren ferinarek logolik welagen mene a'nogo re Allah nen wenatesik arat wure'ma elugun warogo fikhemo werek.

²⁷ Nen, enggin walhigik iluk palek andi re, noe haren hilingiti lagen mene faget wil-wal hikhe mene re haren hilingiti lagen mene andoma re mondok elo'lekhogo nek were'ma hikhe.

²⁸ Nen, minggilhigik iluk palek andi re, Noe haren o kerajaan yi re minggilasigin. Minggilogo re, afuni Media mene wogisigik, Persia mene wogisigik, igin o, noe,” iluk yagatikhe.

²⁹ A'nogo yagatikhemo, at Belsyazar en weak-weagat agoromi yagaisikhi logolik, ”Daniel asu elokhonggen kibi-kibi warek hangge ap raja nen labetarek mene labet figik, siong emas mene alonggopma ikfigik, ini o,” iluk yagaisasikhemo, a'nogo hilingitukwama re, mel isikhe: ”An ferinarek welagirek oba yoma nen, ninenu werek esin nomor 3 mene re at Daniel menfigi o,” iluk yagaisasikhe.

³⁰ A'nogo yagaisasikhesik were'ma, o hubanggo andi sambul, it afuni Babel mene inoe raja Belsyazar a'nogo ebe watukwa.