DANIEL 3 - Allah Wene Fano Wene Hupla Inane

At raja Nebukadnezar en tugwi kembu emas mene afuni hangge hilingisogo wutikhesik fogerati logouwageluk wene ero wulafikhe wene

¹ A'nogo fisasikhesik logolik, inenggi ekhe sambul he, raja Nebukadnezar en tugwi kembu misigat ekhe emas mene afuni inalik hilingisogo menfesikhe mene andi ebe oakhuse re 27 meter, nen obakhe re, 3 meter hangge o propinsi Babel lei hokho mene enu Dura oba andoma wurogo menfesikhe.

² A'nogo hilingisogo fesikhesik, agoromi enggi ebekwe mene afuni o ekhema-ekhema inogogwi welagaikharek mene, gubernur inom, bupati inom, it ap ekhe kaindek komorinafarek mene inom, uang fisogo welagaikharek mene inom, wene pilingitarek mene inom, wene inoba figik kotik ugu inelu mene inom, camat inom, inebe mondogat, tugwi kembu wurogo hilingiterek andi hak wutikhe mene a'nogo weinamet feigiluk inayonggo fesikhe.

³ A'nogo inayonggo fesikhemo it mondogat wagaukwasik inebe tugwi kembu a'nogo elokhoma mendek werek kwelek,

⁴ ap ekhe raja wene ero wulafunem yagaisilik nikherek mene nen ane hokhoba mel yagaisasikhe: ”Hit ap o ekhema-ekhema nen wagep mene inom, hinunggulenu lombok wagep mene inom, hinane lombok wagep mene inom, nogogwi hinalabok e, iluk hai wathinafi o. Yogondak at raja nen wene ero wulafe mene yi hinesanggo holino o. Aren he mel ikhe:

⁵ Hit afuni mondogat he pinggong ane hokho mene inom, yelua hangge mene anggwe folelogo futhagarek mene inom, gitar hokho mene inom, endep mene inom, gitar a'leba inenggiba nen watarek mene inom, pinggong ekhe hunogo mene inom, anethugu halok he, hit nogogwi nagaila'lak hinebe mondogaren an nenupogot Nebukadnezar en tugwi kembu emas meneba wuti mene andi hineindep awi yagaisogo fogerasugun o.

⁶ A'nogo meneat he, at ekhe sa nen an nane igi mene andi hologo hilingisugun lek halok he, inebe endu amulok mondok hokho nunggunem hambokhogo kwelakfisogoin o,” ikhe iluk yagaisasikhe.

⁷ A'nogo yagaisasikhemo inesanggo holhukwasik he it afuni inunggulenu lombok, ineisok erokwe lombok, inane lombok omanogo nen he pinggong omanogo ane hokho mene inom, endep mene inom omanogo kong etik, futhigik hilingitu kwelek iren ineindep awi kweangma yakfuluk tugwi kembu emas meneba alik hilingik a'nogo fogeratukwa.

Daniel agaila'lak inebe henagan aremnogo nen raja ane sagalhukwa wene

⁸ At raja nen a'nogo isikhe andiba re, ap o Babel mene ekhe nen afuni Yahudi mene, ”Hit weak,” iluk wene inoba fouwogeluk isukwa.

⁹ A'nogo isukwasik, at raja Nebukadnezar mel yagatukwa: ”Ninoe. Heluk mondok logoino o.

¹⁰ Ninoe haren wene ero lego mene wulafi logolik, Pinggong ane futhugu mene inom, kong etu mene inom wati logolik ane ugu halok he afuni mondogaren tugwi kembu emas meneba alik hilingik andi hineindep awi yagaisogo fogera'no o,

¹¹ nen at sa nen an nane igi mene andi hologo hilingisugun lek halok he, inebe endu amulok mondok hokho mene nunggunem hambokhogo kwelakfisagain o, iluk egen anggigi.

¹² A'nogo meneat he, ap ekhe Yahudi mene Sadrakh inom, Mesakh inom, Abednego inom, inebe o propinsi Babel yoma kain logouwageluk menfisegen mene aremnogo wene isa haren wulafen mene andi inendawimo seramet fagasik hologo hilingiri'lagwi lego. It ap andem en he, ninoe haren, Nineisena ebe yi aro, iluk fogeratendek mene omanogo fogerasu inabit logolik, tugwi kembu emas mene wuten a'nogo fogerari'lagwi legaro, ninoe,” iluk yagatukwa.

¹³ A'nogo yagatukwama at raja esanggo holhikhesik a'mage het-pet isikhesik he, ”Ap inebe henagan Sadrakh inom, Mesakh inom, Abednego inom, andem weak-weak an noba woginarek wesuago,” iluk yagaisasikhemo, woginarek wagaukwa.

¹⁴ A'nogo wagaukwama, aren he, ap inebe henagan aremnogo mel yagaisasikhe: ”Sadrakh, Mesakh, Abednego, hit he an nen Neisena ebe yi aro, iluk fogeratirek mene andi fogerasu hinabirat logolik, tugwi kembu emas mene wuti a'nogo fogerati lagep lek aga andi re eberogo ara?

¹⁵ Eberogoat halok, yogondak pinggong omanogo anethugu kwelek an nen tugwi kembu wuti mene andi hineindep awi yagaisogo sagaum iluk fogerasugun a? Hinabira? Hinabit halok he, an nen hit hinebe endu amulok wabunak nunggunem hambokhogo kwelakhinobagaumo re kembu ningginik mene nen an nenggim engge andi elok telhinabu hak anggegep? Mondok elo'lego,” iluk yagaisasikhe.

¹⁶ A'nogo yagaisasikhemo, it Sadrakh inom, Mesakh inom, Abednego inomen mel yagatukwa: ”Nebukadnezar henupogot mene ninoe. Nit ninebe elelerogo wene haren ninoba fegen andi korogo wokhouwogeluk hilingisugun mondok lego.

¹⁷ Ma re, haren ninebe endu amulok wabunak nunggunem andi kwelakninobagegen halok, nit nineisena Allah fogeratorek mene andi nen, hat homameba endumo kwelakninobagagunem, Aren elok telninabigin aro.

¹⁸ A'nogo meneat he, aren telninafi'lek halok, niren he, haren, Neisena ebe yi aro, iluk oba himbirik logolik fogerati lagen mene andi fogeratik, tugwi kembu emas mene wuten ari nineindep awi yagaisogo fogeratik, ugun legat. Andi nen he harogo helurogo logoino o, ninoe,” iluk yagatukwa.

Sadrak inom, Mesakh inom, Abednego inom, wene inoba fesukwasik unggum mondok-mondok inoba fesukwa wene

¹⁹ A'nogo yagatukwama, at raja Nebukadnezar a'nogo a'mage Sadrakh inom, Mesakh inom, Abednego inom, inoba fesikhesik he, elokhe age mondok hokhorogo lagasikhesik, agoromi nen endu endephogo nonggwalhunem, endu aik endebat nomor satu ba agarek andi hak he, lek. We, mondok hokhorogo nolhunem endu aik huli nomor tujuh ba ekhe inomat nonggwaluageluk yagaisasikhemo, nonggwalhukwa.

²⁰ A'nogo nonggwalhukwama, at enupogoren agoromi tentara ekhe inomame werek mene nek wendeberogo fisasikhesik Sadrakh inom, Mesakh inom, Abednego inom, inenggi hele warogo endu amulok hokho nunggunem a'nogo hambokhogo kwelakfisoagaluk yagaisasikhe.

²¹ A'nogo yagaisasikhemo, it ap inebe henagan a'nogo inasu inunggulkwe mene inom, ineisokwe mene inom, endakwe mene inom, inunggulasu inom, mondok ugungge inenggi hele homagaisogo endu amulok hokho nunggunem a'nogo hambokhogo kwelakfisasukwa.

²² At enupogoren ane ninghogoat, endu aik mondok hokho mene nonggwalino o iluk yagaisasikhemo nogo nen he endu aik mondok hokhorogo nunggunem a'nogo, ap tentara mene it Sadrakh inom, Mesakh inom, Abednego inom, inebe hambokhogo endu amulok lagagunem a'nogo kwelaginabugun iluk woginarek lagaukwa mene aremnogo re endu andi aigen inebe mondok pinggi yagaukhogo inoatikhemo wa'lagaukwa.

²³ A'nogo wa'lagaukwa meneat he, it ap inebe henagan Sadrakh inom, Mesakh inom, Abednego inom, a'nogo inenggi hele homagongge endu amulok elema a'nogo pelaginafukwa.

²⁴ A'nogo pelaginafukwasik oba nen ferekhogoat raja Nebukadnezar a'nogo a'manggen lagaikhesik weak-weak menlagaikhesik he, agoromi kaindek mene inoba mel yagaisasikhe: ”Niren he, ap inebe henagan aremnogo inenggi hele warogo endu amulok elema kwelakfisogo lek nogo?” iluk yagaisasikhemo, iren he, ”Eberogo aro, ninoe,” iluk yagatukwa.

²⁵ A'nogo yagatukwama, at raja nen he, ”A'nogo meneat he, ap inebe enggaminogo mene endu amulok anggelekwe lagik-wagik ugunem yethigi andiri! It inebene mel inagambut mel palek legat welagaikha. Nen it inebe henagan aremnogo werek kwelek he, at ekhe andi ebe afuni nen, ’Nineisena ebe yi aro,’ iluk fogeratarek mene hangge were'ma higi aro,” iluk yagaisasikhe.

It ap inebe henagan aremnogo wulakfisa wagaukwasik, inebe lombok kain logouwagaluk menfisasikhe wene

²⁶ Andi nen at Nebukadnezar ebe endu fesukwaba kwe ambeba a'nogo lagaikhesik, ane hokho mene kweti logolik mel isikhe: ”Sadrakh, Mesakh, Abednego, hit hinebe Allah Lego Mondok welagarek mene a'nogo amingmingengge mene yi sani. Hit hinebe endumo ari nen wulibi we'ni a,” iluk ane kwetikhemo it aremnogo wulibi wagaukwa.

²⁷ A'nogo wulibi wagaukwama re, it ap raja agoromi a'ma yabu hilingitarek mene inom, gubernur inom, bupati inom, at raja komorati lagaukwa mene inom, inebe mondogat it Sadrakh, Mesakh, Abednego inom aremnogo inabel fena-fena haningisogo kwelakfisasukwasik kwelagisasukwa re, it inoba endu nen ekhe palinafikhemo hasukwa mondok lek. Inesi endu ningi'legat, inasu ogo laberek mene aremnogo higithogoat laberek welagaukwa, nen it inoba endu amben ogo ekhe werek le'ma isasukwa.

²⁸ A'nogo isasukwasik, at raja nen mel isikhe: ”Allah Enupogot Sadrakh inom, Mesakh inom, Abednego inomen fogeratarek mene andiat fogerati logouwogo. It he afuni nen, Nineisena ebe yi aro, iluk fogeratarek mene andi fogerasu inabit logolik, we it ineisena Allah it fogeratarek mene andi nek fogerasugun iluk inendawinggen at oba himbiret fuluk logolik, Ninebe ninoasugun halok fano aro, iluk an nen wene ero wulafi mene herakfisagama, wene inoba figi meneat he, At Allah nen amingmingengge inebe henagan aremnogo faget agoromi malaikat mene ekhe inoba lakfei wagasik it inebe telinafe andi.

²⁹ Andi halok, afuni nen, Nineisena ebe yi aro, iluk agarek mene ekhe Allah nen it telinafe andi hangge ekhe hilingitarek mondok lek andi nen he, hit afuni hinunggulenu lombok, hineisok erokwe lombok, hinane lombok, ekhe nen he, Sadrakh, Mesakh, Abednego, ineisena Allah it fogeratarek mene andi faget weak iluk abok weak ugu halok, inebe libik-labakhogo inoasimbik, inawi wurik mondok meisa'-lambukhogo potfisogoin o, iluk an nebe nenat wene wulafi andi,” iluk yagaisasikhe.

³⁰ A'nogo yagaisasikhesik, it Sadrakh inom, Mesakh inom, Abednego inom a'nogo o propinsi Babel oba inebe kain inenu werek logouwagaluk yabu lego mene wogisasikhesik menfisasikhe.