DANIEL 12 - Allah Wene Fano Wene Hupla Inane

O wurep oba asigin mene faget isikhe wene

¹ A'nogo yaganetesik malaikat asu lenan su meneba laberek mene a'nogo nen nekhengge yaganeti logolik, ”Linggene andi sambul he, at Mikhael malaikat hokho mene hat hunggulenu mene kagalinarek welagarek mene andi weinam asi wesigin. Andi nen he inenggi ekhe enggin-fenggin hokho mene hogoin oba attak yi afuni ti afuni inunggulenu lombok welagaukwaba ogo ekhe hasukwa lek mene logogin. Oba nen he afuni hat hunggulenu mene mondogat inenu buku Allah nen meneba lisu palek werek mene andoma re inagap telinabigin.

² Nen, it inanggele'ma nen afuni hokhorogo wa'lagaukwa mene omanogo nekhengge ineluk menlasugun, menlasimbik fenakwe re ineluk mondok-mondok mene a'nogo hikhi logolik logogun, nen fenakwe re anggolo hunarerogo heinet hokho mene wali logolik mondok-mondogat logogun.

³ Afuni inendawinggen wenggelek logolik ferinarek welagaikharek mene andoma re o pogoroba ombak-bak werek andi hak selek ombak-bak eti logogun. Nen, it ekhe nen fano mene hilingitik, tiphogo hilingitik, ikhi logouwageluk yanggulinafi lagaukwa mene andoma re hesagal enggen hakhogo mondok-mondok faget selegeratu mondok logogun o,” iluk yaganete.

⁴ A'nogo yaganetesik malaikat a'nogo nen ekhe yaganeti logolik, ”Daniel, buku fikhal higi'lek were'ma nek he o wurep kobok igin enggere, yogondak yinggilogo fuluk he amusu somuk amusu hangge meneba yugulogo te'merogo re enegenggerogo fein o. Afuni hokhorogo nen he yi'nogo ti'nogo agarek mene andoma faget fut fogoin iluk hilingiti logogun. Oba nen he, iren hilingiti logogun mene andi re we alomarogo hilingiti logogun o,” iluk yaganete.

⁵ A'nogo yaganetemo nen he, an nen ap pire mene were'ma isigi. An neilenggen isugunem en he ap ekhe re i esanggo yoma fikhit mendek welaga, nen ekhe re i esanggo elikwe fikhit mendek welaga.

⁶ A'nogo mendek logolik, at ekhe nen he, at ekhe i elesi fikhit horokhogo mendek welaga mene a'nogoba heinok wokhikhi logolik he, ”Elalin mene hilinglari'lago mene oma re ki huli nen wurep kobok igin nogo?” iluk heinok wokhikhi laga.

⁷ A'nogo heinok wokhugunem an nesanggo holhugunem en he malaikat a'nogo enggi pogoroba liak fikhi logolik Allah eluk mondok welagarek mene a'nogo enuba hombuk palhi logolik yi'nogo ikhi laga, ”A'nogo hilinglari'lago mene andoma re hilingiti logolik werek kwelek enek he tiga setengah tahun asigin o. Nen, afuni Allah againafuri mene inoba enggin-fenggin hilingfisikhi logogun mene andoma mondogat ambisangma asi lamo nek he, yi'nogo ti'nogo elalin mene ari'logo mene andoma ogo wurep kobokhogo asi lagain o,” ikhi laga.

⁸ A'nogo ugunem mondogat ikhi laga mene andoma an holhi ba nen he ebe ti'nogo faget ili'lago iluk mel futfigi'lek. A'nogo hilingitirik an nen heinok wokhigi, ”Neisena, mondogat andoma re, ambisangma ninggi'nogo wurep kobok igin nogo?” iluk heinok wokhigi.

⁹ A'nogo heinok wokhigimo re aren onggo yaganeti logolik, ”Daniel, wene yi re o wurep kobok igi'lek werek kwelek he etok mondok were'ma hinago logogin enggere hat he lan o.

¹⁰ Wene yi nen afuni hokhorogo inobabut palhik, inendawinggen wurigabinafik inebe horogo fisigik ikhi logogin o. Afuni weak mondok hilingiti logogun mene re weak meneat hilingitu logogun, we it inendawinggen wenggelek mene nek he ebe ti'nogo faget iluk fut fogoin.

¹¹ Wam yi mene ti mene fuluk linggene hundik-hundik Allah wogetu mene a'nogo palfigik nen huli andiba nen wene weak mene inaniniba hilingitunem inalilip agarek mene a'nogo menfogoin huli andi re inenggi 1.290 nen soganogo wesigin.

¹² Nen, it ekhe tiphogo hilingitu mondok werek kwelek inenggi 1.335 huli asi lagain mene andoma re inagaiyek anggikhi logouwak.

¹³ Hat Daniel he tiphogo nek hilingiti logolik were'ma nen he, o wurep kobokhogo asigin huli andomaba asi lagain. Hat hebe re wa'lasigin, oba nen he o wurep kobok igin sambul andoma onggo helagain nen he heluk menlasigin o,” iluk yaganete.