DANIEL 1 - Allah Wene Fano Wene Hupla Inane

AT DANIEL AGAILA'LAK INOM EN HILINGITI LAGAUKWA WENE 1:1–6:28 Alage Yahudi mene raja Nebukadnezar aiba welagaukwa wene

¹ Raja Yoyakim afuni Yehuda mene inobaget 3 tahun ferinarek logolik were'ma re, afuni Babel mene inoe raja Nebukadnezar a'nogo lagaikhesik, o Yerusalem pin kwikhi logolik kwe yagarinafikhe.

² A'nogo yagarinafikhemo, Tuhan nen afuni Yehuda mene inoe raja Yoyakim ebe Nebukadnezar enggiba fikhi logolik, yi mene ti mene onggo hokho mene Tuhan awi wuri'mo welagaikhe mene ekhe hugulengge heloagaluk yagatikheat. A'nogo yagatikhemo, afuni inebe hele warogo woginarek waga logolik, yi mene ti mene onggo hokho mene hugulengge helasikhe mene omanogo waluk wagaikhesik, at angge tugwi kembu awi wuri'mo andoma fesikhe.

³ A'nogo fesikhesik, ap ekhe at raja aiba andoma at eabu hilingiti lagaukwa mene inoe enu Aspenas andi mel yagatikhe: ”Afuni Israel mene inenggi hele warek werek andoma mene alage ap raja nen tagomangge mene halok inom, ap kaindegen tagomangge mene halok inom, ekhe wenaginabino o.

⁴ A'nogo wenaginafi logolik, ap alage inebeba inagambut palek lek mene halok, inebe mondok fano mene halok, sekolah uan hilingita mene halok, yi wene ti wene elok futfou inelu mene halok, inendawimo kagauksek mene halok, yabu an naiba hilingiti logogun elok mene halok, wenaginabino o. A'nogo wenaginabimbik, nit afuni o Babel mene ninane yagaisigik, ninaneba lisu palek mene yanggulinafik, ikhi logoino,” iluk yatikhe.

⁵ At raja nen a'nogo yagatikhesik, ekhe mel yagatikhe: ”It inamburu inom, inagai inom, an nagainafuri ninom faget wo'nisikhi lagep andi hagat wogisikhi logolik, 3 tahun oba arat yanggulinafen halok, it yabu an naiba hilingiti logouwageluk noba woginarek we'no o,” iluk yagatikhe.

⁶ A'nogo yagatikhemo, ap alage Yehuda mene ekhe wenaginafikhe. It andem inenu re, Daniel inom, Hananya inom, Misael inom, Azarya inom, inebe andem.

⁷ It alage andem a'nogo wenaginafikhesik he, inenu ket mene salinabik lagaikhe. Daniel enu Belsazar salhik, Hananya enu Sadrakh salhik, Misael enu Mesakh salhik, Azarya enu Abednego salhik, isikhe.

^8-9 Inenu a'nogo salinafikhemo were'ma, Allah nen he, ap Aspenas a'nogo nen at Daniel ebe endawirasimbik endawi hundik hilingiti logouwageluk hilingisogo fesikhe. A'nogo hilingisogo fesikhemo were'ma, at Daniel endawimo nen he, ”An nen raja aiba mene amburu inom, agai anggur amusu ninggerek mene inom nunggunem, nebe weaget fakhigi hanogo,” iluk endawimo anggasikhesik he, ap enupogot agoromi inoe a'nogoba yagati logolik, an namburu inom, nagai inom nunggu mene re we amu mene wo'neti logogun o,” iluk yagatikhe.

¹⁰ A'nogo yagatikhe meneat he, at Aspenas nen raja ba ailo nen he mel yagatikhe: ”It inamburu inom, inagai inom, ti'nogo wogisikhi logoino, iluk at raja ebe nenat yaganetesi'mo re, elo'lego. Hit a'nogo ninggi logoumo nen he, Ap alage fenakwe inebe fano werek kwelek, it Daniel agaila'lak inom he, inebe weak werek andi re nenahalok nogo, iluk an nebe hit faget nalonggop palogo noasinogo o,” iluk yagatikhe.

¹¹ A'nogo yagatikhemo, ap ekhe Daniel agaila'lak inebe henagan aremnogo faget ferinarek logouwageluk, at Aspenas nen menfesikhe mene andi emberek wene andi faget ikhi logolik mel yagatikhe:

¹² ”Obabut palasuagen he, ninenggi 10 nen ari eremengga inom, i inom we mene nek ninggi logouwageluk wo'nisikhi logoino o.

¹³ A'nogo wo'nisugu were'ma ninenggi 10 hari logombigen he, ap alage ekhe sumburu at raja ninggerek higithogo wogisugunem ninggi logogun mene andi, ninom heilenggen wo'ninabino. A'nogo wo'ninafunem en, obabut hilingik logogun mene andi nisambik enek he yi'nogo hilingisigin iluk tekhogo inogo,” iluk yagatikhe.

¹⁴ A'nogo yagatikhemo, ap it Daniel lak ferinarek welagaikhe mene a'nogo nen he, ”Fano,” iluk isikhesik he, obabut palogo iluk inenggi 10 nen welagaukwa.

¹⁵ A'nogo welagaukwasik, inenggi 10 nen a'nogo arat agaikhemo kwelagisasikhe re, it Daniel agaila'lak inom a'nogo inebe mondok fano logolik inomame were'ma isasikhe, meneat he, it ap alage ekhe sumburu at raja ninggerek mene higithogo ninggi lagaukwa mene omanogo inebe re weak hangge hilingi'mo isasikhe.

¹⁶ Arigini'mo isasikhesik, ap it Daniel lak halinafi lagaikhe mene a'nogo nen he, sumburu inom, anggur amusu inom, at raja nen wogisikhi logouwagaluk yagaisasikhe a'nogo hak wogisigi'lek, eremengga inom, i inom enek, ninggi logouwageluk wogisikhi lagaikhe.

¹⁷ A'nogo wogisugu kwelek Allah nen he ap alage inebe enggaminogo mene aremnogo yi wene ti wene lisu palek mene andi inelu agik, inendawinggen mondok kagalek mene hilinglasuageluk hilinginafikhesik, at Daniel enek he, inabikanggo hagarek mene inom ineil fenggenek logolik inabi higit hagarek mene inom, Ebe ti'nogo hilinglasigin mene faget hegenma o, iluk higithogo yagaisikhi logouwagaluk wogotikhe.

¹⁸ It a'nogo wogisasikhemo were'ma, attak at raja nen he, ”3 tahun logolik, yi wene ti wene yanggulinabino,” iluk isikhe mene higithogoat arat yanggulinafukwasik, at Aspenas nen it alage omanogo mondogat raja Nebukadnezar oba woginarek lagaikhe.

¹⁹ A'nogo woginarek lagaikhemo, at raja nen it inom wenenggak ikhi logolik inobabut palhikhe mene re, it ap alage fenakwe omanogo elo'lek hangge meneat he, it Daniel inom, Hananya inom, Misael inom, Asarya inom, a'nogo nek he inendawinggen mondok kagalek logolik, yi wene ti wene ekhe inomat inelu nek hilingi'mo isasikhesik he, yabu at raja aiba andoma hilingiti logouwagaluk yagaisasikhe.

²⁰ A'nogo yagaisasikhemo yabu hilingitu werek kwelek, at raja wene yi wene ti wene hilinglagunem, ”Ebe ti'nogo hilinglasigin mene faget hilinglaga,” igik, futfouwagaluk senggerogo yagatik, ikhi logouwageluk, at agoromi o ekhema-ekhema aren awe a'ma ferinarek welagarek oba andoma mondogaren yagasuageluk yagaisikhi lagaikhe lombok, onggo yagatunem inobabut palhi lagaikhe mene re, it ap hobuk hilinglasigin mene yagaisagarek mene inom, ap wesagun yi mene ti mene elalin hilingitarek mene inom, onggo yagati lagaukwa mene andi, we, elo'lek hangge. Meneat he, it Daniel agaila'lak inom a'nogo nek he inendawinggen mondok kagalek logolik, yi wene ti wene inelu mene yagati lagaukwa mene andi nek he, mondok fano enggi sepuluh kali ba hakhogo yagatunem, isikhi lagaikhe.

²¹ A'nogo hilingitu welagaukwasigen at Daniel enek he yabu at raja aiba andoma hilingitu welagaikhesigen hobuk ap Koresh aiba Persia mene andi nen afuni o Babel mene awe a'ma fisasikhesik tahun attak ferinarek welagaikhe andem huliba hilingitu welagaikheat.