BILANGAN 7 - Allah Wene Fano Wene Hupla Inane

Ap inogogwi ferinarek mene nen yi mene ti mene Tuhan faget fesukwa wene

¹ At Musa nen Tuhan Awi sabu a'nogo mondogat wutfesikhesik he, yi mene ti mene elonggokwe werek mene mondogat wene kabogeti logolik hilingitu mene amusuba warogo horogo fesikhe. Andi nen warogo nolhuba mezbah a'nogo ebene watikheat.

² Andi nen he, it Israel mene inogogwi kaindek ferinarek logolik afuni inebe wenagaisogo lisu palhu mene faget welagaukwa inap omanogo nen he,

³ Tuhan obaget no kereta 6 en inom, nen sapi 12 nen inom fei wagaukwa. It ap kaindek inebe pire mene nen he kereta misikdek higik fei wagaukwa, nen inebe lombogen he wam sapi misikdek higik fei wagaukwaat. Iren mondogat a'nogo fesukwama,

⁴ Tuhan nen Musa oba yagati logolik,

⁵ ”Wo'neta mene andoma wanin o, wanimbik he An Nawi Sabumo fei lano, andoma mondogat fei lambik, it ap Lewi inap ineabu hilingitarek mene higithogo hilingisuageluk wogisano.” iluk yagatikhe.

⁶ A'nogo isikhemo re kereta inom, sapi inom omanogo re at Musa nen it ap Lewi mene wogisasikhe.

⁷ Kereta pire inom sapi 4 en inom he ap Gerson mene wogisasikhe,

⁸ Kereta 4 en inom sapi 8 en inom he it ap Merari mene, yabu at imam Harun amlogo Itamar a'nogo nen lenggalinafu kwelek hilingiti logogun higithogo wogisasikhe.

⁹ Oba nen he, it ap Kehat mene nek he yi mene ti mene mondok horek mene eiserogo halharek mene omanogo inomoloba ha'luk laga lagaukwama re, Musa enggiba nen kereta ogo sapi ogo ekhe sumburogo wogisasikhe lek.

¹⁰ It ap kaindek omanogo nen he mezbah a'nogo faget inebe enogo fesukwasik amusu wene kabogeti logolik hilingitarek mene a'nogo ebene kweisalhunem iren fesukwa mene omanogo waluk wagaukwa. Iren fougetukwasik waluk he mezbah elokhoma omanogo fei wesugun iluk hilingitukwa sambul he,

¹¹ Tuhan ane Musa oba yagati logolik, ”It inoba hane yi'nogo yagaisan, hinenggi 12 nen pelabek ariba hundik-hundik he it ap melalinafu mene andoma inanggele'ma misik ekhe nen he mezbah andi ebene amusu kweisalhi logolik hilingitu mene faget inangge waluk fei waga logogun,” iluk yagaisano, iluk yagatikhe.

^12-83 It inebe lombogen inangge waluk fei wagaukwa mene re yi higithogo: Hari Unggulenu Ferinarek mene Ke 1 Yehuda mene Hun Aminadab amlogo Nahason Ke 2 Isakhar mene Hun Zuar amlogo Nataneel Ke 3 Zebulon mene Hun Helon amlogo Eliab Ke 4 Ruben mene Hun Syedeur amlogo Elizur Ke 5 Simeon mene Hun Zurisyadai amlogo Selumiel Ke 6 Gad mene Hun Rehuel amlogo Eliasaf Ke 7 Efraim mene Hun Amihud amlogo Elisama Ke 8 Manasye mene Hun Pedazur amlogo Gamaliel Ke 9 Benyamin mene Hun Gideoni amlogo Abidan Ke 10 Dan mene Hun Amisyadai amlogo Ahiezer Ke 11 Asyer mene Hun Okhran amlogo Pagiel Ke 12 Naftali mene Hun Enan amlogo Ahira Tuhan obaget fugu mene iluk inamu tomok waluk waga lagaukwa mene andoma ebe re misik higit mene nek waluk waga lagaukwa: perak piring misik oba kwalegengge hakhogo enggin he 1,5 kilogram en inom nen waruk misik oba kwalek mene re enggin 800 gram en inom o Tuhan Awi Sabumo nen ilirengge walhagarek higithogo walet haluk fei waga lagaukwa. Obalik pirenet he tepung amusu inom munenogo hilingigengge ambem peterogo kwalfuluk he weragaisogo fuluk wogotu mene iluk waluk wagaukwa. Andi nen fena re piring misik oba earek mene hakhogo emas mene misik enggin he 110 gram en amben fano mene dupa earogo fei wagaukwa. Sapi ai mene oak warek mene misik ekhe inom, domba ai mene misik ekhe inom, domba eak umur satu tahun mene warogo nolhu mene faget inom, kambing ai mene inaweak lek hilingisogo fugu mene faget inom, sapi pire inom, domba ai mene 5 nen inom, kambing ap mene 5 nen inom, domba eak umur satu tahun mene 5 nen engge warogo seberogo fisugu mene faget inom waluk wagaukwa.

Hari Unggulenu Ferinarek mene

^84-88 It ap ferinarek mene inebe 12 nen aremnogo mezbah wurik a'nogo ebene horogo fugu mene iluk waluk wagaukwa mene andem mondogat lambulogo re: perak piring misik talek mene hakhogo talogo ebe mondogat he 12 nen inom enggin mondogat lambulogore 27,6 kilogram en. emas piring misik talek meneba hakhogo talogo re ebe mondogat 12 nen inom enggin mondogat lambulogo wenagaisogo re 1,32 kilogram en nen ambenengge dupa hokhorogo kwalogo inom, sapi ai mene 12 nen inom, domba ai mene 12 nen inom, domba umur satu tahun oba mene ebe 12 nen inom, roti werati logolik inom seberogo nolhu mene inom, kambing inaweak lek hilingisogo fouwageluk mene ebe 12 nen inom, sapi ai mene 24 en inom, domba ai mene 60 nen inom kambing 60 nen inom, domba eak umur satu tahun oba mene seberogo fisugu mene faget iluk he ebe 60 nenat inom waluk wagaukwa.

⁸⁹ Hundik-handik at Musa Tuhan Awi Sabumo kuluk Tuhan inom wene i kugunem he, At Tuhan ane Peti Wene Warek ambe sa'lip sebelek mene amboloba malaikat kerub pire ilirenggerogo were'ma honggole'ma aremnogo nen ane ugunem esanggo holhi lagaikhe.