BILANGAN 5 - Allah Wene Fano Wene Hupla Inane

Afuni emetlagaikharek mene faget hilingiti logogun mene awene melalek he yi'nogo

¹ Tuhan nen Musa yagati logolik,

² ”Wene melalek yi afuni Israel mene inoba yagaisano: Afuni inebe mondogat andoma ou inagap ebene purak weak mene hikhi logolik halok ogo, athe inagap inenggalimo mene andoma inoumo logolik halok ogo, nen ap warek fakhogoin halok ogo re, it afuni andi mene mondogat he it Israel mene inawi sabu sale'ma omanogo nen enda'ma wulak fisikhi logogun.

³ An nebe namlogomi ninom welagiba andoma emetlasinogo iluk he, it wulibi loageluk yagaisikhi logogun,” iluk yagaisano yagatikhe.

⁴ A'nogo yagatikhemo re, afuni Israel mene nen wene melalek andi higithogo hilingiti logolik, afuni hokhorogo nen ariginik mene halok he, inawi sabumo nen wulakfisikhi lagaukwa.

Palegengge werek halok obali'mo fikhi logogun mene faget yagaisasikhe wene

⁵ Tuhan nen he Musaba yagati logolik,

⁶ Afuni Israel mene inobaget yi wene ti wene melalek wogetikhe re yi: Ap ekhe nen Tuhan ane higithogo hilingiti'legengge ap ekheba weagerogo fikhe halok,

⁷ ap a'nogo nen aweak fageti logolik, ap are weagat fagain mene a'nogo onggo higithogo wogeti logolik he dua puluh persen ekhe inom oba mangorogo wogeti logogin.

⁸ Oba nen he, ap oba weagerogo fagain mene a'nogo wa'lagunem at agaila'lak inom horoksek mene ekhe werek lek halok he, onggo fogoin engge andi waganogo Tuhan wogosumo, it imam inap inangge asigin. Onggo palugun engge andi re domba ai mene ap weak hilingitu mene a'nogo aweak hosuageluk fogoin mene andi inom sebesugun lek.

⁹ Afuni Israel mene nen yi mene ti mene mondogat Tuhan faget fugu mene andoma re, it ap imam fugu mene wanhi logogun mene andi inangge aga logogin.

¹⁰ Ap misigen we nena mene Tuhan faget iluk fagain mene andi we onggwarek fagerat fakhagain. We it ap imam mene ekhe wogisagain mene nek he at imam andi angge aga logogin.

Ap ekhe nen agwe oba endawi menenei fugu halok hilingiti logogun wene

¹¹ Tuhan nen Musa mimingiti logolik,

^12-14 wene melalek yi afuni Israel mene yagaisano. Ap ekhe nen agweba endawi menenei oba fikhi logolik halok inom, nen ap andi nen agwe faget anggikhi logolik an abithogo hilingnafik, nebe weaget nobagagik, hilingnabi'lago yi re at ap amu mene inom nogokhi logolik iluk endawi menenei oba fagain, oba nen he at agwe nen hinagaisogo hilingisumo re, at agun andi furogo elu agi'lek, aben ogo ineilenggen ekhe isigi'legat, nen he a'nogo ap ekhe inom hilingitunem ogo isaga legat. Athe, ap agun ekhe nen at agwe nen taganet fagain lek oba nen at agun a'nogo endawi menenei oba fagain logou hak.

¹⁵ Wene ero pire andem faget he, ap agun a'nogo nen agwe a'nogo waluk it imam were'ma waga logogun. Nen aren agwe faget satu kilogram tepung gandum fugu mene waluk waga logogin. Waluk we'luk he fei wesugun engge andi re endawi menenei hagain mene a'nogo faget, nen agun nen agwe oba endawi menenei hikhe mene faget iluk enekhogo fei waga logogun oba nen he, tepung andiba re zaitun amusu ogo ekhe ebene kweisalhi logogun lek, nen amben engge dupa ogo pelafi logogun legat.

¹⁶ At imam en, he a'nogo mezbah elokhoma loageluk yagatunem, he a'nogo aremnogo lagunem Tuhan elokhoma mendek logoin, iluk yagati logogin.

¹⁷ Mendek kwelek, it imam en mangkok kweang mene ekhe waluk i horek mene mangkok a'nogo elema keralfikhi logogun. A'nogo hilingfuluk he, aren wul age endebengge Tuhan awihulumo nen waganogo re, i andiba kwelakfikhi logogin.

¹⁸ A'nogo hilingfuluk at imam a'nogo nen he, he andi esi pilingiti logolik tepung endawi menenei faget fei wagu mene a'nogo waganogo he a'nogo enggimo yinggil fikhi logogin, nen at imam a'nogo nek he i arik weak mene homan ugu agai hilingfei wagu mene andi fisogo logogin.

¹⁹ Andi mondogat hilingfuluk he, imam a'nogo nen hombuk palimbik, he a'nogo nen ogo fano anggoageluk yagasigin. Yaga'luk at imam en he yi'nogo ikhi logogin, ”Hat pabi hilingiten lek halok, i yiba homan ikhobagai'lago mene yi hoba asigin lek.

²⁰ Oba nen, hat eberogo nen pabi hilingiten halok he,

²¹ Tuhan nen hat hunggulenu mene inanggele'ma andoma hat henu hombuk palogo homan ugu logogin logouwak. Aren he houwak ilugun keloget fikhi logolik he, halabut puak uageluk hilinghobagauwak.

²² I homan ugu ari halabutmo kwikhi logolik, halabut puak igik, houwak ilugun kelok igik, igin.” iluk yagati logogin. A'nogo yagatunem, at he a'nogo nen onggo ikhi logolik he, ”An nen ogo Tuhan nen hilingnabuak anggikhi lagi,” iluk igin.

²³ A'nogo hilingisimbik he at imam a'nogo nen homan wene andi kertas yinggilik meneba lisu palogo, i homan ugu agai enduk arik weak mene andiba horogo fagain.

²⁴ Andi hilingfuluk he, imam a'nogo nen i arik weak mene at homan fugu agai a'nogo he a'nogo nen noageluk yagasigin. Nen i andi nunggunem he at oba ou asigin.

²⁵ Andi nen he imam a'nogo nen Allah obaget fugu mene a'nogo, he a'nogo enggimo nen waganogo waluk Tuhan elokhe fikhit inuk haluk he, mezbah oba andoma waluk lagain.

²⁶ Tepung a'nogo mondogat fagama iluk enegenggerogo re tepung enggi misigen hakhogo yinggilogo waluk he, mezbah amboloba nolfagain. Andi nen wurep kobokhogo re i andi he a'nogo noageluk yagati logogin.

²⁷ He andi pabi weak eberogoat hilingite halok, i a'nogo nen, he a'nogo ou mondok weak mene oba asigin. Oba asimbik he, alabut puakhogo ouwak ulugun kelokhogo hilinglagu halok he, he andi enu re afuni at unggulenu mene inanggele'ma andoma hombuk palogo homan ugu mene logogin.

²⁸ Oba nen he, at weak hilingite lek halok, homan ugu a'nogo at oba agi'legengge logolik, selekhogo omalik takhikhi logogin.

^29-30 Wene melalek a'nogo ap agun ekhe nen agwe endawi menenei en oba hikhip hikhi logolik agwe nen he taganhogo hilingitesik hilingisu lek mene hilingite iluk ugu halok he, wene melalek he a'nogo hilingiti logogun. At ap agun a'nogo nen he agwe a'nogo Tuhan elokhoma waluk lagunem at imam en he wene melalek andiba higithogo hilingiti logogin.

³¹ Ap andi weak andiba nen selekhogo logogin oba nen, agwe andi weak eberogoat hilingite halok he, onggo ambisangma hikhi logogin.