BILANGAN 4 - Allah Wene Fano Wene Hupla Inane

Ap Lewi meneba nen inunggulenu akhogo Kehat mene ineabu hilingiti lagaukwa mene a'nogo

¹ Tuhan nen Musa inom Harun inom miminginafi logolik he,

² it ap Lewi mene inunggulenu akhogo Kehat mene a'nogo ineisok erokwe lombok inamu-inamu inenu lisu palino,

³ palimbik he, abenek inebe umur tiga puluh tahun nen he lima puluh tahun huli hilingik mene halok, iren yabu Tuhan Awi wuri'mo hilingisu higit mene nek halok mondogat andoma inenu lisu palino.

⁴ It ineabu re yi mene ti mene mondok fano horek mene andoma halhi logogun.

⁵ Tuhan nen wene melalek yi Musa wogetikhe: O inawi sabu omanogo meisalugun mene horok agu halok he, at Harun inom, againafuri inom he Tuhan Awi Sabu a'nogo elonggoma kwi laluk, su Peti Wene Warek kwalegengge a'nogo elokhoma nen korokhogo pelabi we'luk he su kain andiba re Peti andi salfikhi logogun.

⁶ Iren a'nogo mondogat hilingfuluk he, agap nonggolek sakhorek meneba re nekhengge ekhe inom salfikhi logogun. Arigin fuluk ambolkwe re kain elokhe pogot eil hak meneba salfuluk he, e Peti andiba e piagayo kwelakfikhi logogun.

⁷ Iren he meja roti weragaisogo Tuhan obaget fugungge a'nogo amboloba re kain elokhe muli pogot hak mene ekheba yanggul fikhi logogun, nen meja andi amboloba re talengge inom, amben fanongge dupa nolhuba obalik a'nogo inom, yi mene ti mene waluk fei laguba obalik a'nogo inom, anggur agai hinagaisogo fei lagungge i wak a'nogo inom, fikhi logogun. Nen meja talek oba andem he roti werago mene hundik-hundik fei lagunem logogin.

⁸ Andoma mondogat he iren kain eil mep meneba salfuluk, agap mene eil sakhorek meneba re amboloba teisalogo meja andi pia'luk lagu mene faget piagayo kwelafi logogun.

⁹ Iren he kain muli pogot hak mene ekhe waganogo re lampu oak inom lampu ebe inom, no esage ambun-bun halhungge inom, aik hilingik mene inom, zaitun amusu fugungge obalik andoma inom, oba andoma salogo fikhi logogun.

¹⁰ Lampu eisok inom andiba hilingitungge omanogo mondogat inom he, su agap mene eil sakhorek meneba huli'liphogo re pia'luk lagungge a'nogo amboloba fikhi logogun.

¹¹ Andoma mondogat hilingfuluk he, iren kain elokhe pogot eil hak mene misik oba re, mezbah emas mene hilingik engge andiba yanggulfuluk he, agap nonggolek eil sakhorek mene misik oba sebelogo fuluk e piagayo a'nogo kwelakfikhi logogun.

¹² Yi mene ti mene O Senggelek hore'ma a'nogo nen hilingitu mene andoma iren waluk he, kain elokhe pogot eil hak mene misik oba huli'liphogo fikhi logogun. Andi nen he, iren agap nonggolek eil sakhorek mene misik oba sebelogo fuluk he, piagayo a'nogo ambol oba fikhi logogun.

¹³ Iren he mezbah a'nogoba wul omanogo pugune'luk amboloba kain eil ungu meneba sambunet fikhi logogun.

¹⁴ Nen, andi amboloba re iren mezbah andiba hilingiti logolik hilingitungge omanogo fikhi logogun mene re: endu obuluk inom, garpu aik suap hak mene inom, sekop hak mene inom, waruk baskum inom fikhi logogun. A'nogo fuluk he iren agap mene eil sakhorek mene ekheba sebelogo fuluk he piagayo a'nogo hilingisogo fikhi logogun.

^15-20 Tuhan nen Musa inom Harun inom yagaisikhi logolik he, ”Hiren o sabu salek mene andoma meisalhu sambul andoma re, at Harun inom againafuri inom he An Nawi Wuri'mo a'nogo elonggoma kwi laluk, yi mene ti mene inom andoma nen yabu hilingitu mene omanogo inom, salfei kwikhi logogun. A'nogo hilingfilik lagunem enek he, it ap Kehat inap a'nogo nen hasuogeluk waga logogun. Oba nen he iren ekhe yi mene ti mene andoma ineilenggen nen higik, horokhogo asi lagik, inagaben senhigik ugun mondok lek, yi mene ti mene andoma re mondogat he An nobaget enogo were'manggere. Nen, iren a'nogo hilingisugun halok he it inebe wa'laga logogun. Andi arigini'mo re, it ap Kehat inap andi re it inunggulenu Lewi meneba nen wulibi lanogo re, at Harun inom at againafuri inom he iren waluk laga logogun engge omanogo inanggelekwe fisilik logoin. An Nawi Sabu andi hambokhogo fei laga logolik it Kehat inap ineabu hilingiti logogun mene re andi. At Eleazar hun Harun amlogo andi re, aren An Nawi Sabu andi faget inom, minyak lampu faget mene inom, amben engge nolhu mene inom, no gandum waluk hundik-hundik fikhi logogun mene faget inom, amusu yabu hilingiti logolik hilingitu mene faget inom, An Nawi Sabu elonggoma weregengge andoma mondogat inom faget eiserogo logolik halhi logogin,” iluk yagaisasikhe.

It Lewi inap inunggulenu akhogo Gerson inap ineabu hilingiti logogun mene a'nogo

²¹ Tuhan nen Musaba re

²² afuni Lewi mene inunggulenu akhogo Gerson mene nen it ineisok erokwe mene inebe lombok inenu palogo wenaginabuageluk mimingitikhe.

²³ At Musa nen he, it ap mene nek inebe umur 30 tahun nen he pikhit 50 tahun huli iren yabu Tuhan Awi Sabumo omanogo hilingisu elok mene nek inenu palogo wenaginafikhe.

²⁴ It andi ineabu re yi mene ti mene waluk laga logouwageluk isikhe mene re yi:

²⁵ O Sabu andi salek mene kain elonggo fikhit inom takwe fikhit inom salek mene agap sakhorek meneba ugungge inom, kain O Sabu kweba werek mene inom,

²⁶ kain wurilik mene inom hele inom O Senggelek Horek mene a'nogo faget O Sabu era'lukwe inom mezbah era'lukwe werek mene inom, kain kwe ambe hokho meneba werek mene inom, yi mene ti mene kain andoma kelhu mene faget mondogat inom, waluk laga logouwageluk miminginafikhe. It andi re yabu ariginik mene andoma faget eiserogo logouwageluk fisasikhe.

²⁷ Fisasikhemo re, Musa Harun emberegen he at Harun inom at againafuri inomen afuni Gerson mene inoba yabu hilingiti logouwageluk ineabu wogisasasikhe mene omanogo faget kagalek welagaukwa, nen, yi mene ti mene waluk la higit mene halok he, waluk laga lagaukwa.

²⁸ It afuni Gerson mene nen ineabu O Sabu wuri'mo andoma nen hilingiti lagaukwa mene re andoma; Yabu andoma re iren hun Harun amlogo Itamar a'nogo nen melalinafu kwelek hilingiti lagaukwa.

It Lewi inap inunggulenu akhogo Merari mene ineabu re yi'nogo

²⁹ Tuhan en Musa mimingiti logolik it afuni Lewi mene inunggulenu akhogo Merari mene ineisok erokwe lombok wenagaisogo lisu paluageluk yagatikhe.

³⁰ At Musa nen he ap mene nek mondogat inebe umur 30 tahun nen pikhit 50 tahun oba mene, O Tuhan Awi Sabumo andoma yabu higit hilingisu mene nek wenagaisogo inenu palik lagaikhe.

³¹ Palik lagaikhesik he, it andi nen he, O Sabu a'nogo oak inom, e kolok watu mene inom, menogo liafu mene inom, talhu mene inom waluk laga logouwageluk fisasikhe.

³² Andi nen fena re, O Sabu a'nogoba nen maserogo ambe elokhe kwe andoma menfugu mene inom, talhungge mene inom, pebuk telhu mene inom, hele inom, yingge-tingge O Sabu andi faget hilingitu mene omanogo inom, waluk laga lagaukwa. It inebe lombogen he, wanuageluk wogisugu mene omanogo higithogo waluk laga lagaukwa.

³³ It ap inunggulenu akhogo Merari mene nen yabu hilingiti lagaukwa menere andi. Iren o Tuhan Awi Sabu wuri'mo andoma nen yabu hilingiti lagaukwa andoma re hun Harun amlogo Itamar a'nogo nen melalinafu kwelek hilingiti lagaukwa.

It ap Lewi inap akhogo agaukwa mene a'nogo inebe wenagaisogo inenu palhukwa wene

^34-48 At Tuhan nen wene melalogo Musa yagatikhe mene higithogo re, Musa inom, Harun inom, it afuni inogogwi melalinafu mene inomen he, it ap Lewi mene nen afuni inunggulenu akhogo henagan mene Kehat inom, Gerson inom, Merari inom aremnogo wenaginafikhe. Iren wenaginafi logolik he afuni ineisok erokwe lombok wenaginabik lagaukwa. Iren he, ap mene mondogat inebe umur 30 nen pikhit 50 tahun oba mene nek, O Tuhan Awi Sabumo yabu elok hilingisu mene nek inenu palhukwa. Inenu palhukwama wenagaisogo agaikhe menere yi: Ap inunggulenu Inebe seberogo agaikhe mene Kehat mene 2.750 nen Gerson mene 2.630 nen Merari mene 3.200 nen Inebe lambulogo re: 8.580 nen

Ap inunggulenu Inebe seberogo agaikhe mene

⁴⁹ At Tuhan nen wene melalogo Musa bene nen yagaisasikhe mene higithogo ap inebe lombok inenu palogo re, iren yabu hilingiti logouwageluk inom, halhi logouwageluk inom, inebe lombok eiserogo hilingfisilik lagaikhe mene re andi.