BILANGAN 36 - Allah Wene Fano Wene Hupla Inane

Hemi inaguni helaluk inalolegengge helikhi logogun mene faget yagaisasikhe wene

¹ It inunggulenu akhogo misik ekhe Gilead mene, hun Makhir amlogo, Yusuf en tagomangge mene Manasye ombawi it ap ineisok erokwe hokhorogo omanogo re, Musa inom it wene melalinafu mene fenakwe inom were'ma lagaukwasik,

² iren ikhi logolik he, ”Tuhan nen hit miminghinafi logolik he kweang andi afuni Israel mene inoba inenggi walhikhi logolik hakhogo helep enggen walhogo nen sumburisano. Nen Aren ogo re miminghinafi logolik he nit ninare Zelafehad mene anggweang andoma re a'logomi omanogo wogisoageluk ikheat.

³ Oba nen he hiren furogo wenggel hano, it helime andi ambi inaguni ap inunggulenu amu mene inoba helogoin halok he, kweang iren mene andi fena re ap inunggulenu andi mene inenggiba asigin. A'nogo hilinglasigin andiba re kweang wilayah niren meneba huli-huli warek logogin mene re endep aga logogin.

⁴ Tahun kweang inonggwarek oak waganogo wogisogoin mene a'nogoba re, yi mene ti mene it inangge mene onggo wanugun mene omanogo inonggwarek attak mene a'nogoba oak wogisugu sambul he, kweang hun Zelafehad a'logomi nen andoma re, it inaguni omanogo inangge mene aga logogin, andiba re nit ninunggulenu mene re ninanggweang andi mene ekhe logogin lego,” iluk yagaisasikhe.

⁵ A'nogo isikhemo re at Musa nen he afuni Israel mene inoba wene melalek yire Tuhan awene melalek iluk yagaisikhi logolik, ”It hun Yusuf ambisangma mene nen aga mene andi re eberogoat aga,

⁶ nen andi faget Tuhan nen ikhi logolik he, hun Zelafehad a'logomi andoma re it inendawimo nen we ap sa hak inamolo anggugu higithogoat ap woginabik logoin, meneba nen he we it inunggulenu misik mene halok woginabugun fano.

⁷ Afuni Israel mene inebe lombogen inangge inalolegengge andoma re it inunggulenu mene a'nogoba homago logogin.

⁸ Hemi inebe lombok it mene inanggweang inalolegengge mene it ap inunggulenu Israel mene misik ekhe inanggele'ma werek halok he, hemi andi inaguni ogo re it inunggulenu andi meneat helikhi logogun. A'nogo hilingiti logogun oba re, afuni Israel mene inebe lombok he, kweang inombawi inamuligen inalolegengge mene omanogo fisogo logogun,

⁹ andiba re kweang it inangge mene andi re inunggulenu ekheba nen it ekhe inunggulenu meneba aga logogin mondok lek. Nen it Israel inap inunggulenu lombok omanogo nen he inanggweang inonggwaregen mene omanogo fisogo logogun.” iluk yagaisasikhe.

^10-11 Arigini'more Tuhan en wene melalek Musa yagatikhe mene higithogo re, hun Zelafehad a'logomi helime inenu, Mahla inom, Tirza inom, Hogla inom, Milka inom, Noa inom he inaguni ap at eisena nen agaila'lak inom hundik welagaukwa mene omanogo nen helasukwa.

¹² It andi re inaguni ap inunggulenu Manasye hun Yusuf amlogo a'nogo mene oba nen inunggulenu akhogo werek mene omanogo inoba helasukwa. A'nogo hilingitukwaba nen he kweang it inangge agaikhe mene a'nogore it inunggulenu it ineisena mene oba welagaikhe.

¹³ Afuni inunggulenu Israel mene o Moab tonggoma i Yordan aik oba nen, o kota Yerikho horokhogo aremnogo welagaukwa huli, Tuhan nen awene melalek inom, yi'nogo ti'nogo hilingiti logogun mene iluk inom, afuni Israel mene inobaget Musabene nen yagatikhe mene re andoma.