BILANGAN 33 - Allah Wene Fano Wene Hupla Inane

O Mesir en he Moab huli wagaukwa wene

¹ It afuni Israel mene o Mesir herakfuluk wulibi wagaukwasik, it inunggulenu omanogo tomok logalogo wagunem it Musa Harun emberegen woginarek he, o sabu ya wutik ta wutik hilingirik wagaukwa.

² Tuhan nen Musa oba yagati logolik he, iren o sabu ya wutik ta wutik wagaukwa kwe andoma enu lisu palhigik fouwageluk yagatikhe.

³ Afuni inunggulenu Israel mene andi re tanggal lima belas tugi misik oba werek kwelek, Pesta Paskah attak mene a'nogo nasukwasik he inenggi misik welagaukwasik o Mesir herakfuluk wulibi wagaukwa. At Tuhan nen woginarek wagu kwelek it a'nogo o kota Rameses herakfuluk wulibi lagunem he afuni inunggulenu Mesir mene,

⁴ inagainafuri manggusa mene Tuhan nen pinggi inoatikhemo inebe warek he kwe-angma salinafukwama ineil isasukwa. A'nogo hilingitukwa andiba re afuni Mesir mene inanggembu ilah omanogo omame lek hak hilingik kwelek Tuhan enek he Omame Mondok Hokho mene a'nogo weinamet fesikhe andi.

⁵ It inunggulenu Israel mene o Rameses herakfuluk wagaukwasik a'nogo re o Sukot o sabu wusi wagaukwa.

⁶ Andi nen he it a'nogo lagaukwasik he o Etam en lei esanggoma andoma inawi sabu wusi lagaukwa.

⁷ Andoma nen he it a'nogo nekhengge inambotkwe lagokhogo re o Pi-Hahirot, o Baal-Zefon en mo lagai wagarek fikhit andoma wagaukwasik o Migdol horokhogo andoma o sabu wusi lagaukwa.

⁸ Andi nen he iren o Pi-Hahirot herekfuluk he, i laut palogo o Etam leiba kwi lagaukwasik, inenggi henagan inukhogo laga lagaukwasik he, o Mara andoma inawi sabu wusi lagaukwa.

⁹ Andoma nen he laga lagaukwasik o Elim inawi sabu wusi lagaukwa, andoma re i elesi 12 nen welagaikhe nen e kurma re 70 nen inom were'ma lagaukwa.

¹⁰ Andi nen he it a'nogo o Elim herakfuluk he o i unggut hilingitunem Teluk Suez horokhogo andoma inawi sabu wusi lagaukwa.

^11-14 Andi nen he it a'nogo o Zin leimo andoma inawi sabu wusi lagaukwasik o Dofka horokhogo andoma nen he o Alus lagaukwa, andi nen he o Rafidim lagaukwa, lagaukwaba nen he o andoma i nunggu mene welagaikhe lek.

^15-37 O Rafidim en pikhit Tom Hor oba laga logolik inawi sabu wurogo nogolik lagaukwa kwe re: o Sinai leimo nen he Kibrot-Taawa wusi lagaukwa, andoma nen he o Hazerot, Ritma, Rimon-Peres, Libna, o Risa, nen he o Kehelata, nen he Tom Syafer oba, andoma nen he o Harada, Makhelot, Tahat, Tarah, Mitka, Hasmona, Moserot, Bene-Yaakan, Hor-Gidgad, Yotbata, Abrona nen he, o Ezion-Geber nen he, o Zin leimo, andi nen he Tom Hor kweang o Edom inom huli-hulimo andoma nogo ilagaukwa.

^38-39 At Tuhan nen awene melalek higithogo re, imam Harun a'nogo Tom Hor oba lagasikhe. At ebe andemen tanggal satu tugi fuap mene tahun he 40 meneba were'ma, it afuni Israel mene o Mesir herakfuluk wulibi wagaukwasik oba aremnogo wa'lagaikhe. Andem oba re at Harun ebe umur 123 tahun huli were'ma wa'lagaikhe.

⁴⁰ At raja o Arad o Negeb Kweang oba mene, o Kanaan nen selatan fikhit mene a'nogo esanggo holhugunemen he, afuni Israel mene re at anggweang fikhit omanogoba arat wagaikha iluk, ugunem holhikhe.

^41-49 Ebekwe o Tom Hor oba nen o Moab Tonggoma andoma laga logolik he, afuni Israel mene a'nogo inawi sabu wuthigik nogo isukwa kwe re yi: O Zalmona, Funon, Obot, o Abarim tagalogo fesukwaba o Moab kweang oba andoma, Dibon-Gad, Almon-Diblataim, Tom Abarim, Tom Nebo horokhogo andoma, nen o Moab tonggoma nen i Yordan aik oba andoma nen kota Yerikho horokhogo, o Bet-Yesimot en hilingi'luk o Sitim Tonggoma nen hilingi'luk andoma nogolik agaukwa.

I Yordan palogo oan lagi'lek logolik wene melalek yagaisasikhe wene

⁵⁰ O Moab Tonggoma, i Yordan aik oba nen o kota Yerikho horokhogo andemen he, Tuhan nen Musaba

⁵¹ yi wene? ti wene melalek afuni Israel mene faget wogetikhe mene re yi,

⁵² Hiren he afuni o kweang andomaba werek mene mondogat pugulogo wulak fisogoin. It inanggembu helep mene inom logam mene inom, nen iren wene kabogeti logolik fogeratarek oba andoma inom he mondogat felelenghogo legetfisano.

⁵³ Kweang andi re, An nen hit wokhisiginggere, hit hinebe andoma lambik eiserogo kwimbik logolik hinebe andoma femhogo logogun.

⁵⁴ Andi nen he, hiren helep enggen hangge hinenggi walhaluk hit hinunggulenu werek higithogo esa logalek welagep higit-higit hit eisewerek asubagaigen he sumburogo helano. It inunggulenu hokho mene inoba re hokhongge wogisigik, nen inunggulenu endep mene inoba re endebengge wogisigik ino.

⁵⁵ Meneat he, afuni o kweang andiba werek mene andoma hiren pugulogo wulak fisogoin lek halok he, afuni o andoma logogun mene nen he hit hinoba eluk-elugengge ineilenggenma kugunem hilingitarek higit hilinghinafik, nen alok ineiso'ma kugunem hilingitarek higit enggin-fenggin hinoba figik ikhi logogun o. Iren he hit hinom weim yafi logogun.

⁵⁶ Hiren it pugulogo wulak fisogoin lek halok he, An nen hit hinebe it faget hilingiri'lagwi iluk An Nane igi higithogo hinebe leget hinobagagin.” iluk yagaisano iluk wogetikhe.