BILANGAN 32 - Allah Wene Fano Wene Hupla Inane

Afuni inunggulenu Israel mene fena i Yordan esanggo fena fikhit helasukwa wene

¹ It inunggulenu Ruben mene inom Gad mene inom he inanggo hokho-pokhorogo welagaikhe. Iren ineilenggen hasukwa re kweang o Yaezer inom Gilead inom omanogo re it inanggo konikhi logou oba obalik mondok fano hilingi'mo hasukwasik,

² iren Musa inom imam Eleazar inom it Israel mene inoba inogogwi melalinafarek mene amu mene omanogo inom inambit lagaukwa. Lagaukwasik iren ikhi logolik he,

^3-4 kweang o kota-kota Atarot inom, Dibon inom, Yaezer inom, Nimra inom, Hesybon inom, Eleale inom, Sebam inom, Nebo inom, Beon inom, Tuhan nen lebetnisugu kwelek nit Isarel mene nen sebeli kwi wagaguba andoma wam konhi logou mondok fanorego. Nen, nit he ninanggo hokhore'ma re,

⁵ kweang andoma nit ninaggweang mene asuageluk wo'nisobagaigen kino yagahisikhi lago. Nit he i Yordan esanggo fena fikhit a'lima lani iluk yaganisagubo,” iluk yagaisasukwa.

⁶ A'nogo yagaisasukwama, Musa nen onggo yagaisikhi logolik, ”It hinagaila'lak hit hinunggulenu mene weim yabi lagu kwelek hit enek he logogun andi a?

⁷ Nenahalok hiren afuni inunggulenu Israel mene i Yordan palogo wulibi laluk kweang Tuhan nen wogisasikheba a'nogo hela louwogeluk hilingitu kwelek inailo asuageluk hilinginafi lagep?

⁸ O Kades-Barnea nen it hineisugwi inoba kweang andi ineil penesi loageluk an nen lakfisasigimo nen ogo, a'nogo nek hilingita.

⁹ It mondogat he, o Eskol tonggoma andoma lagaukwasik kweang andi mondogat ineilenggen hasukwa. Oba nen he, it sugulogo wagaukwasik he afuni Israel mene yi Tuhan nen kweang wokhisikheba andoma kwi lagu mene faget inailo asuageluk hilinginafukwa.

^10-11 A'nogo hilingitukwama Tuhan a'mage lagasikhesik wenagisikhi logolik, ’It andi re, An noba tiphogo hilingiri'lagwi lek mene. Andi halok he, it ap andi nen o Mesir en wulibi wagaukwa huli inebe umur 20 tahun ambolkwe hilingik kwelek wulibi wagaukwa mene re kweang An nen hun Abraham inom, Ishak inom, Yakub inom, inoba hombuk palogo abok wokhisasigiba andoma kwi logoin lek,’ iluk isikhe a'nogo.

¹² Ap mondogat he unggum helasukwama nen he, we Kalep hun Yefune amlogo ap Kenas mene a'nogo inom, Yosua hun Nun amlogo a'nogo inom enek he, iren Tuhan oba inendawinggen tipsek welagaukwama re unggum helasukwa lek andi.

¹³ Tuhan nen it inunggulenu Israel mene inoba a'mage inoba fikhesik he, o leikwe andoma leil warik nikhi logouwageluk hilingfisasikhemo 40 tahun nikhi lagaukwasik ap At ane sagalhukwa mene omanogo mondogat wa'lagaukwa.

¹⁴ Nen, yogondak he hineisugwi nen hilingita hak he hiren ogo wene oak sagalhi lagep ari! Hit he ap hinebe kaboksek logolik weak hilingituba Tuhan a'mage mondok hokho mene a'nogo afuni Israel mene inoba fouwageluk hilingiti lagep hinap welagebo!

¹⁵ Hiren hebekhogo Tuhan hinambotma fuluk hilingiti logogun halok he, afuni inunggulenu Isarel mene ari oboget isamo o leimo aroma aninurogo leil wati logogun, andi re hiren hilingisugun oba it inebe legarik logoin ari!” iluk yagaisasikhe.

¹⁶ A'nogo yagaisasikhemo, it ap Ruben mene inom, Gad mene inom omanogo Musa ambit horokhogo lagaukwa. Lagaukwasik yagati logolik he, ”Niren he, attak-attak nit ninanggo domba awi helep leget waganogo fisogoin o, nen nit ninagagwi ninagainafuri inom faget he o kota leget esia'le uanhogo waganogo fisogoin.

¹⁷ A'nogo wusimbik he, nit ninagaila'lak ninom weim yabi logoin nen weak-weak fik-foukhogo hilingisugun. Weim yabi kwikhi logolik andi re niren ninagaila'lak andi woginarek kwimbik o kweang it ninagaila'lak inaggweang mene asigin oba andi kwi logoin. Nit a'nogo nugu kwelek he nit ninagainafuri inom ninagagwi inom he yoma logogun. O kota leget haningisogo wagane'ma yoma re fano logogun, it afuni kwe yoma werek mene nen inoasi kwi wesugun lego.

¹⁸ It ap Israel mene inanggweang asuageluk mene andi oan heligi'lek kwelek he, nit tak ninaiba ninambotkwe sugulogo kwi wesugun lek.

¹⁹ Nit he ninanggweang i Yordan fena mo wulibi wagarek fikhit yoma mondogat helogoin hilingi'mo re, it ninagaila'lak inanggweang i Yordan palogo fena fikhit andoma nit endebat iluk ogo ekhe helogoin lek,” iluk isukwa.

²⁰ Andi isukwama Musa nen onggo yagaisikhi logolik, ”Hiren ibi-eberogo Tuhan obaget weim yabi logoin iluk fik-fouksek welagep halok,

²¹ nen hiren hinanggele'ma nen i Yordan palogo laluk weim yabi lambik Tuhan nen melalhinafu kwelek it hinaselei mene andi pin talogo inoasi kumo Tuhan nen mugusogo wulak fisamo,

²² o kweang andi At a'ma sebe umo nek he hit hinambotkwe wesugun o. Nen, hiren Tuhan obaget hilingisuageluk werek mene omanogo inom, hit hinagaila'lak Israel mene inobaget hilingisuageluk werek mene omanogo inom, mondogat hilingisugun andi nen he hinoba seleget lasugun. Nen, Tuhan nen he kweang o mo liabi weri'lago fikhit yoma hit mene asuageluk wogisagain.

²³ Oba nen he wenggel hano, hiren wene watep mene andi higithogo hilingisugun lek halok he Tuhan oba weak hilingisumo hinaweak andi onggo unggum helogoin a'naga.

²⁴ Enggere lambik halok he o kota inom, domba awi inom andoma wusi lani, nen hiren wene watep mene andi re hinonggot agi'lek tiphogo nek hilingi'no!” iluk yagaisasikhe.

²⁵ A'nogo yagaisasikhemo, it Gad mene inom, Ruben mene inom, a'nogo nen ikhi logolik he, ”Nineisena, nit he haren melalninafi logogin mene andoma higithogo nek hilingiti logogun.

²⁶ Nit ninagainafuri ninagagwi inom, ninanggo sapi, domba inom he o Gilead kota-kota yoma fisamo logogun.

²⁷ Oba nen he, nit yare Tuhan nen melalninafu kwelek wo'ninarek weim yabi logoin mene andi nek. Nit he i Yordan palogo lambik nineisena nen yaganisegen mene andi nek hilingisugun o,” isukwa.

²⁸ A'nogo isukwama Musa nen wene melalek yi imam Eleazar inom, Yosua inom, it Israel mene inogogwi melalinafi lagaukwa mene omanogo inom yagaisikhi logolik,

²⁹ ”It ap Gad mene inom, Ruben mene inom he, Tuhan awene melalek a'nogo murok laga logolik, weim yabugun iluk i Yordan palogo wulibi logoin halok inom, nen iren lebethisogoin meneba hit kweang telogoin halok inom he, Gilead anggweang andi re hiren it inanggweang mene asuageluk wogisogoin.

³⁰ Oba nen he, iren hit hinom weim yabuogeluk i Yordan palogo wulibi logoin lek halok he, it he hit hinom higithogo kweang o Kanaan andoma it mene ekhe asuageluk sumburisogoin o,” iluk yagaisasikhe.

³¹ Andi yagaisasikhemo ap Gad mene inom, Ruben mene inom omanogo nen onggo ikhi logolik, ”Nineisena, nit he Tuhan nen melalninabigin mene andi higithogo nek hilingisugun.

³² Nit he Tuhan nen wo'ninarek lagu kwelek o Kanaan kweang oba andoma lambik weim yabi logoin, oba nen he kweang i Yordan fena mo liabi weri'logo fikhit yi re nit ninanggweang mene asigin,” iluk isukwa.

³³ A'nogo isukwama re Musa nen it inunggulenu Gad mene inom Ruben mene inom Manasye mene fena inom faget he kweang Sihon inom, raja Amori anggweangma inom, nen ap raja Og anggweangma inom, o Basan inom, o kota-kota andoma inom kweang o andoma esanggokwe mondogat inom wogisasikhe.

³⁴ It inunggulenu Gad mene nen he kota Dibon inom, Atarot inom, Aroer inom,

³⁵ Atarot-Sofan inom, Yaezer inom, Yogbeha inom,

³⁶ Bet-Nimra inom, Bet-Haran inom andoma re kota leget haningisogo omamerogo waganogo wutukwa. Nen andi nen inanggo domba werek oba iluk inom wutukwaat.

³⁷ It inunggulenu Ruben mene nen he o kota-kota Hesybon inom, Eleale inom, Kiryataim inom,

³⁸ Nebo inom, Baal-Meon inom, Sebam inom andoma wutukwa. O kota-kota ambotkwe wutukwa mene andoma re, iren enu amu mene salhukwa.

³⁹ It inunggulenu Makhir mene hun Manasye againafuri nen he, o Gilead kweangma andoma pin kwi lagaukwasik he sebelogo fuluk afuni Amori mene andoma werek mene mugusogo wulak fisasukwa.

⁴⁰ A'nogo hilingitukwa andi faget he, Musa nen kweang Gilead andi it inunggulenu Makhir meneba wogisasikhemo re it inebe o andoma femhogo welagaukwa.

⁴¹ Hun Yair unggulenu Manasye mene nen he, desa o andomaba miren mene hakhogo pin kwisikhesik telogo helasikhemo re o andoma enu, ”Desa-desa Yair,” iluk salhukwa.

⁴² Hun Nobah nen he o Kenat inomen o ekhe sili amu-amukwe andomaba pin kwisikhesik telogo helasikhesik he, o andoma enu Nobah at onggwarek enubene salhikhe.