BILANGAN 29 - Allah Wene Fano Wene Hupla Inane

Tahun ket meneba seni isati logolik wogeti logogun mene faget isikhe wene

¹ Tanggal satu tugi sabit meneba re, hiren wene kabogesugun iluk hinebe seberogo kabogeti logogun, nen yabu enggin mene ekhe hilingiti logogun lek. Hinenggi andi sambul he trompet tombouwe ane hangge omanogoba futi logogun.

² Hiren Tuhan obaget warogo nolfuluk wogeti logogun menere sapi ai mene ket kotorek mene misik ekhe inom, domba ai mene misik ekhe inom, domba eak ai mene sabiren engge inebe hundomok he umur satu tahun menere inagambut palek lek mene halok, At obaget fuluk wogeti logogun. Warogo nolfuluk wogeti logogun engge andi amben nen he Tuhan endawimo healhi logogin

³ Amep lek mene obaget fikhi logolik tepung e zaitun amusu inom munenek mene re tiga kilogram en, andi re sapi ai mene faget nen dua kilogram en he domba ai mene faget,

⁴ nen ekhe satu kilogram en he domba eak mene aremnogo ebe lombok faget.

⁵ Ekhe kambing ai mene misikhogo re afuni inaweak lek hilingisogo fisoageluk warogo nolhi logogun. Hiren a'nogo hilingiti logogun andiba re afuni inaweak leget fisoageluk inobaget hilingiti logogun andi.

⁶ Warogo nolhi logogun engge omanogo re hiren weragaisogo tugi hundik-hundik tanggal satu ba wogeti logogun mene omanogo inom mangot fikhi logogun. Nen ekhere hiren linggene hundik-hundik warogo nolhi logogun mene omanogo inom, nen anggur agai hinagaisogo wogeti logogun mene omanogo inom oba mangorogo wogeti logogun. Hiren warogo nolhi logogun engge andoma amben nen he Tuhan endawimo healhi logogin.

Inaweak leget fisugu sambul warogo nolhi logogun mene faget isikhe wene

⁷ Tanggal sepuluh tugi sabit meneba re hit hinebe wene kabogesugun iluk hinebe mondogat lambulhi logogun. Linggene andi sambul he hiren hinendawinggen sebel fakhaluk hinambe pok logolik yabu enggin mene ekhe hilingiti'lek weak logogun.

⁸ Tuhan obaget warogo fuluk nolhi logolik he, sapi ai mene ket kotorek mene ekhe inom, domba ai mene misik inom, domba eak ai mene umur satu tahun oba mene ebe sabiren menere inagap oba inagambut pale'lek mene inom warogo nolino. Hiren warogo nolugun mene andoma nen he Tuhan endawimo healigin.

⁹ Hiren amep lek mene hundik nolhi logouwageluk mene omanogo ogo re, tepung zaitun amusu inom munenek mene tiga kilogram he sapi ai mene misik mene a'nogo faget figik, nen dua kilogram he domba a'nogo faget figik,

¹⁰ nen, satu kilogram he domba eagwi ai mene sabiren aremnogo ebe lombok faget fuluk nolhi logogun.

¹¹ Kambing ai mene ekhe re afuni andi inaweak lek hilingisogo fisoageluk warogo nolhi logogun, andem he hiren hinaweak leget hinabuageluk warogo nolhi logogun mene a'nogo inom, linggene hundik-hundik faget warogo nolhi logogun mene a'nogo inom, amep lek mene fuluk nolhi logogun mene a'nogo inom, nen anggur agai wogeti logogun mene a'nogo inom, linggene andi sambul oba wogetu mene iluk a'nogo werek kwelek he inom a'nogoat hilingiti logogun.

Linggene O Sabu Salogo welagaukwa a'nogo faget ebeti logolik Allah faget yi'nogo fikhi logogun iluk isikhe wene

¹² Tanggal lima belas tugi sabit meneba re hit wene kabogesuogen iluk hinebe seberogo kabogeti logogun. Nen hiren yabu enggin mene iluk ekhe hilingisu fuk. Linggene sabiren andem hundik-hundik he hiren An Tuhan legeisogo nobagakhi logolik kabogeti logogun.

¹³ Inenggi attak meneba re Tuhan obaget warogo nolhi logolik he, sapi ai mene ket kotorek mene ebe 13 nen inom, nen domba eak ai mene umur satu tahun mene pire inom, nen domba eak ebe umur satu tahun oba mene 14 nen inom ebe lombok inagambut palek lek mene warogo wogeti logogun. Hiren warogo wogeti logogun mene andi amben en he Tuhan endawimo healhi logogin.

¹⁴ Hiren hai warogo iluk amep lek mene hundik-hundik wogeti logouwageluk werek mene omanogo nen he: tepung zaitun amusu inom munenogo fuluk tiga kilogram he sapi ai mene misik faget, nen dua kilogram he domba ai mene ebe lombok faget,

¹⁵ nen satu kilogram he domba eak omanogo ebe lombok faget, nen amep legengge wogetu mene andi inom seberogo re anggur agai ogo wene melalek werek mene inom higithogo fuluk noleti logogun.

¹⁶ Andem werek kwelek, ekhe amu mene kambing ai mene misik afuni andoma inaweak leget fisoageluk warogo nolhi logogun. Andi warogo nolhi logogun mene andi re linggene hundik-hundik warogo nolhi logogun mene omanogo inom, werago mene waluk nolhi logogun mene omanogo inom, anggur agai hinago fikhi logogun mene omanogo inom mangongge faget.

¹⁷ Inenggi pirenek meneba re sapi ai mene ebe 12 nen ket kotorek mene inom, domba ai mene pire inom, domba eak ebe umur satu tahun oba mene 14 nen inom, ebe lombok he inagambut palek lek mene woge'luk nolhi logogun.

^18-19 Andoma warogo nolhi logolik halok he, yi mene ti mene inenggi attak meneba warogo nolhi logogun mene aremnogo higithogo nek hilingiti logogun.

²⁰ Inenggi henaganek oba re, sapi ai mene ket kotorek mene ebe 11 nen inom, domba ai mene ebe pire inom, nen domba eak ai mene umur satu tahun oba mene 14 nen inom, ebe lombok agambut palek lek mene nek wogeti logogun.

^21-22 A'nogo warogo nolhi logolik, yi mene ti mene inenggi attak meneba warogo nolhi logogun mene aremnogo hakhogo nek hilingiti logogun.

²³ Inenggi enggaminogonek meneba re sapi ai mene ket kotorek mene ebe 10 nen inom, domba ai mene ebe pire inom, domba eak ebe umur satu tahun oba mene 14 nen inom, ebe lombok agap oba agambut palek lek mene wogeti logogun.

^24-25 Andem inom seberogo re yi mene ti mene inenggi attak meneba warogo nolhu mene aremnogo hakhogo nek hilingiti logogun.

²⁶ Inenggi fuap meneba re, sapi ai mene ket kotorek mene ebe 9 nen inom, domba ai mene pire inom, domba eak umur satu tahun oba mene 14 nen inom, ebe lombok agambut palek lek mene warogo wogeti logogun.

^27-28 Andem inom seberogo re yi mene ti mene inenggi attak meneba warogo nolhi logogun mene aremnogo hakhogo nek hilingiti logogun.

²⁹ Inenggi falfalik meneba warogo nolhi logolik he, sapi ai mene ket kotorek mene ebe 8 nen inom domba ai mene pire inom, domba eak umur satu tahun oba mene 14 nen inom, ebe lombok agap oba agambut palek lek mene warogo nolhi logogun.

^30-31 Andem inom mangorogo re yi mene ti mene inenggi attak meneba warogo nolhi logogun mene aremnogo hakhogo nek hilingiti logogun.

³² Inenggi sabit meneba re sapi ai mene ket kotorek mene ebe 7 nen inom domba ai mene pire inom, domba eak umur satu tahun oba mene 14 nen inom, ebe lombok agambut palek lek mene warogo nolhi logogun.

^33-34 Andem inom seberogo re yi mene ti mene inenggi attak meneba warogo nolhi logogun mene aremnogo hakhogo nek hilingiti logogun.

³⁵ Inenggi sirek meneba re, hit hinebe wene kabogesuogeluk seberogo lambulhi logogun. Nen hiren yabu enggin mene ekhe hilingiti logogun lek.

³⁶ Hiren Tuhan obaget warogo nolhi logolik he, sapi ai mene ket kororek misik inom, domba ai mene misik inom, domba eak umur satu tahun oba mene ebe 7 nen inom, ebe lombok agambut palek lek mene halok warogo nolhi logogun. Hiren nolhi logogun mene andi amben en he Tuhan endawimo healhi logogin.

^37-38 Andem inom mangorogo re yi mene ti mene inenggi attak meneba warogo nolhi logogun mene aremnogo hakhogo nek hilingiti logogun.

³⁹ Andire hiren hinenggi hokho mene logogun aremnogoba fogerati logolik he, Tuhan endawimo fanorogo iluk warogo nolhu mene nolhik, amep lek mene wogetik, anggur agai hinago wogetik, lambulogo ninobagagu mene iluk warogo noletik, ikhi logogun. Andoma mondogat he hiren yi'nogo hilingisugun iluk hinane menfogoin mene a'nogo faget inom, nen hinendawi fano nen warogo nolhu mene a'nogo faget inom, oba andoma mangot fugu mene faget fikhi logogun.

⁴⁰ At Musa nen he Tuhan en yi wene ti wene hilingiti logogun aple iluk yagatikhe mene omanogo mondogat afuni Israel mene yagaisasikhe.