BILANGAN 28 - Allah Wene Fano Wene Hupla Inane

Tuhan faget fugu mene omanogo inetokhogo fikhi logogun iluk yagaisasikhe wene

¹ Tuhan nen Musaba yagati logolik,

² afuni inunggulenu Israel mene inoba yagaisikhi logolik he, iren inendawimo nen furogo wenggelfuluk he linggene wenago mene aremnogoba re nunggu mene amben he At Tuhan endawimo healherek mene omanogo obaget wogeti logogun.

³ Iren Tuhan obaget fuluk warogo wogeti logogun mene ebere yi: Linggene hundik-handik faget he domba eagwi ai mene pirerogo agapma agambut palek lek mene umur satu tahun mene waluk he,

⁴ misik ekhe re hubet warogo wogeti logogun mene faget, nen misik ekhe re hu'mokwe warogo wogeti logogun mene faget.

⁵ Domba eagwi andem inom seberogo wogeti logogun menere tepung satu kilogram inom e zaitun enggen amusu mondok fano mene seberogo munenek engge inom wogetu logogun.

⁶ Andire inetokhogo hilingiti logogun mene, attak-attak Tom Sinaiba nen warogo noletikhe mene re andi. Amben nen he, Tuhan endawimo agaiyeget fesikhe.

⁷ Domba eak andi inom mangorogo re anggur agai satu liter inom mezbah ambolebene kweisal filik laluk wogeti logogun.

⁸ Domba eak a'nogo warogo hu'mokwe nolhi logogun mene andi ogo re hubet faget mene warogo nolhi logolik hilingiti logogun a'nogo higithogo, anggur agai inom wogeti logoino. Warogo nolugun engge andoma amben nen he Tuhan endawimo healigin.

Linggene Sabat oba obaget warogo nolhi logogun mene faget isikhe wene

⁹ Linggene Sabat mene andiba re, domba ai mene pire umur satu tahun oba mene, agambut palek lek mene inom, dua kilogram tepung zaitun amusu inom ham-hamik hilingi'mo re, enu warek mene iluk wogetik, nen anggur agai inom seberogo wogetik, hilingiti logogun.

¹⁰ Warogo nolhi logogun engge andi re, linggene Sabat sambul hundik-hundik wogeti logolik, linggene hundik wogotu mene a'nogo inom anggur agai wogetu mene a'nogo inom seberogo wogeti logogun.

Tugi ebe lombok tanggal satu oba kugunem obaget hilingiti logogun wene

¹¹ Tugi ket folelhu kwelek andem oba Tuhan obaget warogo nolhi logogun mene andi ebe re: sapi ai mene ket kotorek mene pire inom, domba ai mene misik inom, domba eagwi ai mene umur satu tahun oba mene ebe lombok agambut palek lek mene nek wogeti logogun.

¹² Weragaisogo fuluk wogetu mene re tepung zaitun amusu inom mangorogo hilingik engge inom, nen sapi ai mene andem ebe lombok he tepung tiga kilogram inom, nen domba ai mene faget he dua kilogram tepung inom mangorogo nolhi logogun.

¹³ Nen domba eak ai mene ebe lombok faget he tepung satu kilogram inom seberogo fikhi logogun. Weragaisogo fikhi logogun mene andi re, nunggu mene hilingi'mo re amben nen Tuhan endawimo healhi logogin.

¹⁴ Warogo nolhi logogun mene andi inom seberogo re hiren anggur agai re sapi ai mene faget dua liter en, nen eagwi ai mene ebe lombok faget he satu liter en wogeti logogun. Tahun hundik-hundik andomaba re tugi ebe lombok tanggal satu asi wagunem, hiren warogo nolhunem Tuhan endawimo healhi logogin mene re andi.

¹⁵ Hiren linggene hundik-hundik warogo noletu mene inom, nen anggur agai hinagaisogo wogetu mene inom, andoma inom seberogo re hit hinaweak lek hilingisogo hinobagagu mene faget iluk kambing ai mene misik ekhe inom warogo noleti logogun.

Linggene roti fiterek lek mene a'nogoba isati logolik fikhi logogun wene

¹⁶ Tugi misik tanggal empat belas oba andi re linggene Paskah seni isati logolik ninesiena Tuhan faget hilingiti logogun oba werek.

¹⁷ Andi nen linggene ambolkwe tanggal lima belas oba re roti fiterek lek meneba werago mene nunggu mene faget ebeti logogun mene a'nogo erorati logogun, nen inenggi sabiren inukhogo andi re hiren roti fitunggeba werago mene ninggi logogun lek.

¹⁸ Hiren hinenggi andiba ebeti logouwogeluk logolik, hinenggi fem attak-attak andi sambul he hiren wene kabogeti logouwogen iluk hinebe seberogo kabogeti logogun, nen yabu enggin mene ekhe hilingiti logogun lek.

¹⁹ Hiren he Tuhan obaget warogo nolhu mene iluk sapi ai mene ket kotorek mene pire inom domba eak ai mene misik ekhe inom, nen domba eagwi ket kotorek mene ebe sabiren inom ebe lombok he inagambut palek lek mene warogo nolhi logogun.

²⁰ Hiren warago fuluk wogetu mene wogeti logouwageluk werek mene omanogo, tepung zaitun amusu inom mangorogo waluk he: sapi ai mene omanogo ebe lombok faget he tepung tiga kilogram en inom, domba ai mene faget he dua kilogram en inom,

²¹ nen, satu kilogram en he domba eagwi ai mene andoma ebe lombok faget fikhi logogun.

²² Kambing ai mene misik ekhe re hit hinaweak leget hinobagauwageluk wogeti logogun. A'nogo hilingiti logogun andiba re, hiren afuni inaweak horogo leget fisoageluk hilingiti logogun andi.

²³ Hiren warogo nolhi logogun mene andoma re, hinetokhogo hubet warogo nolhi logogun mene omanogoba mangot fikhi logogun.

²⁴ Wene andem higithogo re hiren Tuhan obaget hinenggi 7 hari nen hambukhogo warogo nolhi logogun. Hiren nolhi logogun mene andoma re, linggene hundik-hundik nolhik, anggur agai hinago figik ikhi logogun mene omanogoba to'mongge faget. Hiren warogo nolhi logogun mene andi amben he Tuhan endawimo healhi logogin.

²⁵ Hinenggi sabit sambul andi re, hiren wene kabogesuogen iluk hinebe seberogo lambulhi logogun, nen yabu enggin mene ekhe hilingiti logogun mondok lek.

Enggen palhu sambul isati logolik wogeti logogun mene faget isikhe wene

²⁶ Hinenggi fem attak-attak meneba seni Enggen Palek faget isati logolik hilingitu mene a'nogoba nen minggu sabiren kobokhogo re, hiren gandum ket palek mene waluk Tuhan obaget wogosi wesugun sambul he wene kabogesugun nen iluk hinebe seberogo kabogeti logogun, nen hiren yabu enggin mene ekhe hilingiti logogun lek.

²⁷ Hiren Tuhan obaget warogo nolhi logolik he sapi ai mene pire inom, domba ai mene ket kotorek mene misik inom, domba eagwi ai mene umur satu tahun oba mene ebe sabiren inom, ebene agambut palek lek halok wogeti logogun. Warogo nolhi logogun mene andi amben nen he Tuhan endawimo healhi logogin.

²⁸ Warogo fuluk noletu mene hundik wogeti logouwageluk werek mene a'nogo wogeti logolik he tepung zaitun amusu inom seberogo sapi ebe lombok faget he tiga kilogram en, nen domba ai mene faget he dua kilogram en,

²⁹ nen domba eagwi omanogo ebe lombok faget he, satu kilogram en andi higithogo nek hilingiti logogun.

³⁰ Kambing ai mene misik ekhe re hit hinaweak lek hilingisogo hinobagakhi logouwageluk warogo nolhi logogun. Hiren a'nogo hilingiti logogun andiba re, afuni inaweak horogo leget fisoageluk hilingiti logogun andi.

³¹ Warogo fikhi logogun mene andoma inom, anggur agai hinago wogeti logogun mene andoma inom he, hiren hundik-hundik warogo nolhi logogun mene inom, weragaisogo fuluk noleti logogun mene inom, omanogoba mangorogo faget he andoma inom fikhi logogun.