BILANGAN 27 - Allah Wene Fano Wene Hupla Inane

Hun Zelafehad a'logomi aremnogo inoba hilingfisasukwa wene

¹ Hun Zelafehad a'logomi inebe 5 nen welagaukwa: inenu re hele Mahla inom, Noa inom, Hogla inom, Milka inom Tirza inom. Nen hun Zelafehad andi eisena re hun Hefer nen hun Hefer eisena re Gilead, nen Gilead eisena re hun Makhir nen hun Makhir eisena re Manasye, nen hun Manasye eisena re Yusuf.

² Hun Zelafehad a'logomi inebe 5 nen aremnogo hun Musa inom, nen imam Eleazar a'nogo inomen it afuni inunggulenu andi mene melalinafi lagaukwa mene omanogo inom he, o Tuhan Awi sabu sale'ma kwe kwi lagaikharek oba andoma kaboksek were'ma kwi lagaukwasik iren ikhi logolik he,

³ ”Nit nineisena re o leimo omanogo nen wa'lagaikheba nen he at amlogo abengge ekhe takhasikhe lek. At ebe re hun Korah inom inane mul-mul isukwasik Tuhan ane sagalhukwa mene a'nogo inom hilingite mene re fuk. Nit nineisena andi re at onggwarek aweak oba wa'lagaikhe.

⁴ Oba nen he, we at amlogo ekhe takhasikhe lek andiba nenahalok at enu andi afuni Israel mene inanggele'ma oma nen legasigin nogo? Nit he kweang andoma nit ninanggweang mene asuageluk it nineisena ogogwi agoromi andoma ninom mangorogo wo'nisani,” iluk yagaisasukwa.

⁵ A'nogo isukwama re wene iren waluk wagaukwa mene a'nogo at Musa nen Tuhan oba yagatikhemo,

⁶ Tuhan nen Musaba ikhi logolik he,

⁷ ”Hun Zelafehad a'logomi nen aga mene andi re iren u hagat aga. Ma re it inoba it inanggweang mene asuageluk it ineisena ogogwi agaila'lak andoma inom seberogo inangge asuakhogo wogisano o. At Zelafehad alolegengge andoma re at a'logomi andoma eise asuageluk haren wogisagain halok fano.

⁸ Haren afuni inunggulenu Israel mene inoba yagaisikhi logolik he, ap misik ekhe againafuri ap mene tago legengge wa'lagu halok he, at angge anggweang a'nogo re a'logomi helime mene inoba fikhi logogin.

⁹ Nen at andi ambi a'logomi helime mene werek lek halok he, kweang at anggweang mene andi re at agaila'lak agoromi ap mene inoba fikhi logogin.

¹⁰ At agailak ap mene ogo ekhe werek lek halok he, kweang andi re hun eisena agailak ap mene oba fikhi logogin.

¹¹ Nen, hun andi ambi agaila'lak agoromi ogo, eisena agailak ogo werek lek halok he, kweang andi re at ap inunggulenu ero misik mene inom horoksek mene angge aga logogin ikhe ino,” iluk yagatikhe. Wene melalek andi re it afuni Israel mene nen hologo hilingiti logouwageluk Tuhan nen Musa bene yagatikhe andi.

Musa nen Yosua at obali'mo wenagaisogo menfesikhe wene

¹² Tuhan nen he Musa mel yagatikhe: ”Hebe tom Abarim oba lagambik he, o An nen afuni Israel mene wogisagain oba a'nogo heilenggen yethano o.

^13-14 Arat yethambik he, hebe wa'lasigin o. A'nogo wa'lasigin andi re, attagat o Zin leimo afuni le'ma i Meriba elesi wulibi wagaikheba a'lima nen afuni Israel mene An nen ferinarek mondok werek kwelegat he, inebe mondogaren, o yigini'mo oma ninabire, iluk isukwaba andoma, hoe Harun hemberegen An nonggwarek nebe futnobagambik afuni Israel mene ineilhanem i andi wulibi wesuageluk, an nen, Yi'nogo hilingi'no, iluk yagahisasigi meneat he, An nomameba agaukhogo hilingiti'lek. We, An nane sagalogo hinendawimo anggaluk hilingitigip andi nen, hat hoe Harun wa'laga andi hak, hat hebe wa'lasigin aro,” iluk yagatikhe. Wene a'nogo hilinglagaikhe andi re, i enu Meriba elesi wulibi wagaikheba o enu Kades, Zin leimo afuni le'ma andoma nen hilinglagaikhe mene a'nogo faget yagatikhe andi.

^15-16 A'nogo yagatikhemo, at Musa nen samban mel isikhe: ”Tuhan Allah neisena. Hat he, yi mene ti mene eluk welagarek mene mondogat inelugerinafendek mene, neisena. Afuni inunggulenu Israel mene yi woginarek lagain mene, Ap yiat menfogoin, iluk yagane'nogeluk kino yagaheti o, neisena.

¹⁷ It weim yafi logolik, at andi it inoe kain kabelek mene hilinglasimbik logogin namolo nen yagaheti o. Hat hagainafuri yi, wam domba afuni konharek mene le'ma welagarek andi hak herakfisagun o, neisena,” iluk yagatikhe.

¹⁸ A'nogo yagati lagaikhemo, Tuhan nen Musa mel yagatikhe: ”Haren ap Nun amlogo Yosua yi aple ti aple faget hilingisu elok enek mene andi wolesimbik he, henggi unggul sebelogo menfeino.

¹⁹ A'nogo menfikhi logolik he, at ebe ap imam Eleazar inom, afuni Israel mene mondogat inom, ineilhanem menfuluk he, Yosua yi an nobali'mo menfigi o, iluk yagaisano.

²⁰ A'nogo yagaisambik, afuni Israel mene at Yosua ane hologo hilingiti logouwagen he, hat henggiba ferinarek welagen mene andi, at ekhe wogo'no.

²¹ Wogetunem he, at Eleazar en An namolo mene elu asigeluk inendawi wenggelagarek mene enu Urim inom Tumim inom wanimbik he, An heinok wo'niikhi logouwak. Heinok a'nogo wo'niugunem he, An nen yagasigin mene, at Eleazar en Yosua inom, afuni Israel mene mondogat inom, yi wene ti wene higithogo hilingisuageluk yagaisikhi logogun o,” iluk yagatikhe.

²² A'nogo yagatikhemo, at Musa nen wene Tuhan nen, ”Yi'nogo hilingi'no,” iluk yagatikhe mene andi higithogo nek hilingitikhe. Hilingiti logolik, at Yosua ebe at Eleasar inom, afuni Israel mene mondogat inom, ineilhanem menfesikhesik he,

²³ enggi unggul oba sebelfesikhesik, ”Yosua an nobali'mo menfigi o,” iluk Tuhan nen yagatikhe hagat higithogo hilingitikhe.