BILANGAN 24 - Allah Wene Fano Wene Hupla Inane

¹ It a'nogo hilingiti lagaukwasik, at Bileam endawimo nen, Allah nen afuni Israel mene fanorinabigiluk, anggili'lago higi, iluk futfesikhe. A'nogo futfesikhesik nogo nen he, hobuk hilinglasigin mene faget attak heinok wani laga lagaikhe a'nogo hak lagi'lek. We, andoma logolik eilenggen o leimo afuni le'ma higit yethasikhe hak he,

² afuni Israel mene inunggulenu lombok inawi sili su meneba wurik were'ma yerisasikhe. A'nogo yerisugunem he, Allah Areagun oba louk i wagaikhemo,

³ wene hobuk hilinglasigin mene mel isikhe: ”An Bileam Beor amlogo nabikanggo oba yi mene ti mene enegat yethigirek mene yi nen wene igin o.

⁴ Allah nen ane yaganetunem nesanggo holhirek mene o. Yi mene ti mene hilingisigin mene neilenggen hoagaluk inuk niikherek mene o. A'nogo inuk niugunem, neilenggen fenggenek logoligat talorogo lagirek mene o.

⁵ Yakub noe, hat hawi tenda wurik oma re, elokhe mondok fano. Israel noe, o hat welagen oba omare, fano mondogo.

⁶ O andoma ineilenggen yethugunem he, o tonggwe mondok hokho mene hangge, nen yabu i esanggoma waganek mene hangge hilingigo. E gaharu Tuhan nen yate mene hangge, athe, e aras i aikwe welagarek mene hangge hilingigo.

⁷ A'nogo were'ma re, it inaiba meiso hokhorogo nunggunem, kweangma sakhoratunem yi mene ti mene awi yago mene fano fulelherego, It inoe kain enupogot omame re at kain enu Agag omame hangge lek. We, omame mondok hokho abel ponggwe higit logolik, ferinarek werek kwelek fogerati logogun o.

⁸ Allah nen it o Mesir en woginarek wulibi wagasik, At obabut sapi ai mene maro obabut weak mene hangge logolik, it inebikhit a'luk inaweim yaferego. A'nogo yafi logolik, sumburu haumhogo ninggarek andi hak, afuni at aselei mene mondok legetfisikhi logogin o. Legetfisikhi logolik, it inoak tamuk-tamakhogo falelhik, nen inasikhe obakhe lilibuk-lalabakhogo lakfigik, igin o.

⁹ It afuni inunggulenu andi mene inebe re, mene olomene enu singa aik anini mene hangge inom, holou mene hangge inom, werek. A'nogo logolik, inelokhe sogoum seralek were'ma sa nen ailo'lek inelugetfisagain anggegep? It afuni ekhe nen it fanorinabugun halok, Allah nen it afuni andi fanorinabigin aro. Nen, it ekhe nen homan fisogoin halok he, Allah nen it afuni andi homan fisagain aro,” iluk isikhe.

¹⁰ A'nogo yagatikhemo, at Balak a'makwe het-pet isikhesik he, enggi yinggilogo senggan palpal hilingiti logolik, Bileam mel yagatikhe: ”Haren it homan fisanogen iluk wolhafimo wagen a'nogo meneat he, henggi henagan oba Allah nen fanorinabuageluk yagaten andi ri!

¹¹ Yogondak hat hebe haiba hambotkwe hela lan o. A'nogo lagu kwelek, an nen hat heisok onggo ekhe wokhesigin iluk abok yagaheti meneat he, At Tuhan nen, Eisok onggo wogosigin lek, iluk anggili'lago andi nen he, wokhesigin elo'lego,” iluk yagatikhe.

¹² A'nogo yagatikhemo, at Bileam en he, mel yagatikhe: ”An nen he, ap an nayonggo loageluk lakfisasigin mene andi yagaisikhi logolik he,

¹³ Hinoe angge perak inom, emas inom, aiba welagarek mene andi mondogat wo'nesumo, an neisena Tuhan nen, yi'nogo hilingi'no, ti'nogo hilingi'no, iluk yaganete mene andi sebelogo herakfisaluk an nendawimo nen anggaluk wanigin mondok lego, iluk arat yagaisigi lek nogo? An nen he, At neisena Tuhan wene yaganesigin mene nek igin o, iluk eberogoat yagaisigi aro,” iluk yagatikhe.

At Bileam en wene hobuk hilinglasigin mene faget yagati lagaikhesik, wurep oba yagatikhe wene

¹⁴ At Bileam en at Balak a'nogo yagatikhesik ekhe mel yagatikhe: ”An yogondak afuni an nunggulenu mene inoba nambotkwe lagain. A'nogo oan lagi'lek logolik, afuni inunggulenu Israel mene nen afuni inunggulenu hat mene hobuk hilinginabugun mene faget yagahesik,” iluk yagatikhesik,

¹⁵ wene ebe hobuk hilinglasigin mene mel yagatikhe: ”An Bileam Beor amlogo nabikanggo oba yi mene ti mene enegat yethigirek mene a'nogo nen igin o.

¹⁶ Allah nen ane yaganetunem nesanggo holhirek mene o. At ebe abel ponggwe welagarek mene a'nogo elok neilenggen higirek mene o. At yi mene ti mene hilingiterek enek mene a'nogo nen an neilenggen yethoageluk inuk niikherego. A'nogo inuk niugunem, neilenggen fenggenek logoligat talorogo lagirek mene o.

¹⁷ An at ebe neilenggen higi meneat he, o yogondak hilinglasigin mene faget higi fuk. An at ebe neilenggen yethigi meneat he, yatma nen yethigi o. At ap ebe kain enupogot ekhe Israel mene, ebe hesagal eil tibelengge mene hangge hobuk wesigin o. Wesimbik he, afuni o Moab mene inogogwi kaindek mondok wulil tagalogo inoatik, afuni inunggulenu Set mene wulil tagalogo legetfisigik, igin o.

¹⁸ Afuni Edom mene inaiba it inaselei mene nen sebelimbik logogun o. A'nogo meneat he, it afuni Israel mene re ekhe inom inomame aga logogun aro.

¹⁹ Ap ekhe Yakub fikhit mene weinam asimbik, omame mondok hokho mene logolik, afuni at aselei mene inebe mondok legetfisagain o,” iluk isikhe.

²⁰ At Bileam abikanggoba a'nogo yethikhi logolik, afuni Amalek mene eilenggen yerisasikhe. A'nogo yerisasikhesik, wene it faget hobuk hilinglasigin mene mel isikhe: ”Afuni inunggulenu lombok mondogat kweangma welagaikharek mene endebat elo'lek hangge meneat he, Amalek mene nek he, inomame hokho werego. A'nogo meneat he, afuni inunggulenu andi mene logombigen wurep oba re, inebe mondok-mondok lek asugun o,” iluk isikhe.

²¹ At Bileam abikanggoba a'nogo yethikhi logolik, afuni ap Kain nen tagongge mene eilenggen yerisasikheat. A'nogo yerisasikhesik, wene it faget hilinglasigin mene mel isikhe: ”O hit welagep oba andoma fano abolo'lek mondok hambuksek logolik, sue awi tom alema wurik welagarek andi hangge welagep mene o.

²² A'nogo meneat he, hit afuni Keni mene nek he, afuni nen mondok legethinabugun. Inenggi welagi'legat afuni Asyur mene nen hele warogo wokhinarek logoin o,” iluk isikhe.

²³ At Bileam abikanggoba a'nogo yethikhi logolik, ekhe mel isikheat: ”Allah nen a'nogo hilingite halok, it afuni ekhe sa hak eluk logogin nogo. Lego. Eige, nendawilage.

²⁴ A'nogo meneat he, afuni o Siprus mene esa logalek ekhe kapal weim yafarek meneba wesimbik he, afuni Asyur mene inom, Heber mene inom, inawe a'ma fisa wesugun o. A'nogo meneat he, afuni kapal oba werek mene re inebe mondok lek asugun o,” iluk isikhe.

²⁵ A'nogo iluk, pugulogo at Bileam aiba ebe werek oba ambotkwe lageluk ugu kwelek he, at raja Balak ogo lagaikheat.