BILANGAN 23 - Allah Wene Fano Wene Hupla Inane

¹ A'nogo yerisasikhesik, at Balak mel yagatikhe: ”O yoma an nen wam warogo noligin oba ekhe obuluk 7 nen halok wusimbik he, wam sapi ai mene ebe 7 nen inom, domba ai mene ebe 7 nenat, fologo fein o,” iluk yagatikhe.

² A'nogo yagatikhemo, at Balak en Bileam en yagatikhe hagat hilingitikhe. A'nogo hilingitikhesik, mezbah ebe lombok amloba omanogo wam sapi ai mene misik ekhe inom, nen domba ai mene misik inom emberek wuthogo warogo nolhukwa.

³ A'nogo nolfuluk, at Bileam en he, Balak mel yagatikhe: ”An Tuhan nemberek ambi asimbik wene ekhe yaganesigin a? Lega, iluk lambik werek kwelek he, hat hebe hanggo warogo nolhoba era'lu aremat logoin o. An lambik, neisena Tuhan nen yi wene ti wene ekhe yaganete halok, yagahesi wesigin o,” iluk yaga'luk he, Bileam ebe tom punu ekheba amunek lagasikhe.

⁴ Lagasikhemo, Allah at oba wagaikhemo re, Bileam en Allah mel yagatikhe: ”An nen wam warogo nolhesigin oba obuluk 7 nen wutfigirik he, ebe lombok amboloba re, wam sapi ai mene misik inom, nen domba ai mene misik inom emberek wuthogo warogo nolfuluk wagi o,” iluk yagatikhe.

⁵ A'nogo yagatikhemo, Tuhan nen he Bileam oba wene ninggi'nogo uageluk yaganesigin mene aremnogo yagati logolik, at ebe ambotkwe sugulogo Balak ambit lambik Tuhan nen wene ikhe mene yi'nogo iluk yagasi lano,” iluk yagatikhe.

⁶ A'nogo yagatikhemo wagaikhe re, at Balak ebe anggo warogo nolfesukwaba aremnogoat mendek welagaikhe, nen it afuni Moab mene inogogwi omanogo mondogat inom were'ma wagaikhe.

⁷ A'nogo wagaikhesik, at Bileam en wene hilinglagaikhe mene inom, hobuk hilinglasigin mene inom, yi'nogo yagatikhe: ”O Aram tom mo wulibi wagarek higit ali'ma were'ma, ap kain Balak afuni Moab mene inoe raja nen an wolniikhi logolik: Afuni Israel mene homan fisanogen eme o, iluk wolnafemo wagi.

⁸ Mene re, at Allah nen homan fisigi'lek meneat he, an nen homan fisagain nogo? Nen, Allah nen wene inoba figi'lek meneat he, an nen wene inoba fagain nogo?

⁹ An nebe tom unggul-unggul andoma nen neilenggen it inebe yerisigik, nen punu-punukwe andoma nelokhe hebekhogo yerisa lagik igi o. Yethani, afuni inunggulenu hunogoat mene ekhe inom lek, we inunggulenu it mene nek a'li!

¹⁰ Ap Yakub en tagongge mene inebe inenggi wenasu mondok elo'lek, wul alhak hilinglagaikha. Afuni inunggulenu Israel mene inebe endephogo werek lek, mondok hokhorogo sik-pik agaikha o. An nen higithogo nek hilingiti logombik, nebe wa'lasigin fano. Nen, afuni higithogo hilingitarek mene wa'lagaikharek andi hak wa'lasigin fano o,” iluk yagatikhe.

¹¹ A'nogo yagatikhemo, at Balak en he, Bileam mel yagatikhe: ”An faget he, ninggi'nogo egen. An nen hat yoma wokharek wagi andi re, an naselei mene andi homan ikfisanogeluk wokharek wagi anggigi. A'nogo meneat he, haren it fanorinabigiluk egen andi ri!” iluk yagatikhe.

¹² A'nogo yagatikhemo, at Bileam en he, ”An nen he wene Tuhan nen, Yi'nogo ino, iluk yaganetu mene nek ikhi lagi o,” iluk yagatikhe.

Wene hobuk hilinglasigin mene faget enggi pirenek mene yagatikhe wene

¹³ Hobuk at Balak en Bileam mel yagatikhe: ”Nit nemberagat he, o tom ekheba louwogo. Andoma nen afuni Israel mene inebe fenakwe nek heilenggen yerisambik homan fisanogo,” iluk yagatikhe.

¹⁴ A'nogo yagatikhesik, at Balak en Bileam waluk he, Tom uan mene enu Pisga andiba lagasikhesik, o leimo afuni le'ma enu Zofim leimo lagaikhesik he, aren anggo warogo Allah nolesugun oba obuluk 7 nen wutikhesik he, ebe lombok amboloba re, wam sapi ai mene misik inom, nen domba ai mene misigat inom, emberek wuthogo warogo nolik lagaikhe.

¹⁵ A'nogo hilingitikhemo, at Bileam en he, Balak mel yagatikhe: ”An neisena Tuhan nemberek ambi asuogeluk a'lima lagu kwelek he, hat hebe hanggo warogo nolhen oba aremat mendek logoino o,” iluk yaga'luk he, lagaikhe.

¹⁶ Lagaikhemo re, at Tuhan Bileam emberek ambi agaukwasik he, wene aren Balak yagasigin mene yagatikhesik, wene andi ebe Balak yagasi wesuageluk ambotkwe lakfei wagaikhe.

¹⁷ A'nogo lakfei wagaikhemo wagaikhe re, Balak ebe anggo warogo nolhikheba aremnogoat mendek welagaikhe, nen it afuni Moab mene inogogwi omanogo inom were'ma wagaikhemo, at Balak en he, wene Tuhan nen isikhe mene yagasuageluk heinok wokhasikhe.

¹⁸ A'nogo yagatikhemo, at Bileam en wene hobuk hilinglasigin mene yi'nogo yagatikhe: ”Balak Zipor amlogo yi, nare. Yethan! Wene an nen yagahesigin andi fanorogo holinogen hebe ya higilhame o.

¹⁹ Allah re, afuni nen, Nambigen igi e, igik, ineranen wene igik, agarek andi hak ikherek mondok lego. At Allah re, An nen yi'nogo hilingisigin, iluk abok yagaisaluk he, ebe tiphogoat hilingiterego. Nen, Aren ugunem ebe arat hilinglagarek enego.

²⁰ Ma re, an nen he, Allah nen fanorinabigin mene uageluk yaganetemo, it faget igi andi. Nen, at Allah nen fanorinafunem, an nen he, Hane oak wanin, iluk u re, mondok elo'lego.

²¹ At Yakub en weak ekhe hilingitemo ikhi logogun lego. At Israel eisena Tuhan Allah nen fetninarek werek kwelek, aren yi mene ti mene ekhe weak hilinglaga logogin legaro. Iren he, Raja re At amuat werego, iluk inagaiyegen inane a'mit suphogo fogerari'lagwi andi.

²² Allah nen, it o Mesir en woginarek wulibi wagasik, At obabut sapi aik anini weak mene hangge logolik, it werekwe a'luk inaweim yaferek o.

²³ It ekhe nen Yakub againafuri mene homan fisugunem, inebe weak asugun lego. Israel mene andi weagerinabuogeluk wesarogo hilingitunem ebe asigin legaro. It afuni inunggulenu andi mene faget, afuni ekhe nen he, Allah nen it elalinhogo leberisili'lago andi yethani! iluk ikhi logogun o.

²⁴ It afuni inunggulenu andi mene re, mene olomene holou mene nen eluk a'luk welagarek hak welagik, ai mene nen menla'luk welagarek hak welagik, ikhi logolik, singa andi nen sue paik ekhe at ninggerek mene ebe warogo felelenghogo amep inomat ninggi'lek logolik ebe weinglagarek lek andi hak hilingiri'lagwi o,” iluk yagatikhe.

²⁵ A'nogo yagati lagaikhemo at Balak en he, Bileam mel yagatikhe: ”Arat egen. Haren it inunggulenu andi mene homan fisagain lek halok he, it fanot fisagain legaro,” iluk yagatikhe.

²⁶ A'nogo yagatikhemo, at Bileam en he, ”An he, Tuhan nen, Yi'nogo ti'nogo ino o, iluk yaganeterek mene nek igirek iluk yagaheti'lek nogo? Arat yagaheti anggigi,” iluk yagatikhe.

Wene hobuk hilinglasigin mene faget enggi henaganek mene yagatikhe wene

²⁷ Hobuk at Balak en Bileam mel yagatikhe: ”Nit o ekhema louwogo. O andoma nen, haren afuni Israel mene an faget homan fisanogen iluk Allah nen hilinghobagau mene faget hanogo,” iluk yagatikhe.

²⁸ A'nogo yagatikhesik, Bileam waluk he, tom Beor elokhe leikwe fikhit hilingi'mo andoma lagasikhe.

²⁹ A'nogo waluk lagasikhemo, at Bileam en Balak mel yagatikhe: ”Yoma wam warogo Allah nolesugun oba obuluk 7 nen ekhe wutfembik, wam sapi ai mene 7 nen, domba ai mene 7 nenat fologo fein o,” iluk yagatikhe.

³⁰ A'nogo yagatikhemo, at Balak Bileam en yagatikhe hagat hilingitikhe. Aren he, wam warogo Allah nolesugun oba obuluk wutikhe omanogo ebe lombok amboloba re, wam sapi ai mene misik inom, nen domba ai mene misik inom emberek wuthigik warogo nolik lagaikhe.