BILANGAN 21 - Allah Wene Fano Wene Hupla Inane

Afuni Israel mene nen afuni Kanaan mene ekhe mabenet fisasukwasik inomame agaukwa wene

¹ A'nogo welagaukwasik, o Kanaan i ambutmo andoma higit wagunem, it afuni nen he, ”Afuni Israel mene o Atarim kwe nen weri'lagwi,” iluk isukwama ap kain enupogot awi kota Arad mene a'nogo esanggo holhikhesik he, afuni Israel mene inom weim yafi logolik, inebe ekhe hele warogo fisasikhe.

² A'nogo fisasikhemo, it afuni Israel mene nen he, ”Niren yi'nogo hilingisugun,” iluk, nineisena Tuhan mel yagatukwa: ”Nineisena. Haren afuni inunggulenu andi mene mabenetfisoageluk anggegen halok he, niren afuni inebe inom, inawi kota inom, mondok wulil tagalogo legetfisouwogen he ninomamet ninobagain o, neisena,” iluk inane hombuk palogo wene waretukwa.

³ A'nogo yagatukwama, At Tuhan nen afuni Israel mene nen kino yagatukwa mene andi inane esanggo holhikhesik he, leberisasikhemo afuni Kanaan mene omanogo mabenetfisasukwa. A'nogo mabenetfisasukwasik logolik, inebe inom inawi kota inom mondok wulil tagalogo legetfisasukwasik, o andoma enu Horma salhukwa.

Kisu tembaga mene hilingisogo liafikhe wene

⁴ A'nogo hilingi'luk, afuni Israel mene omanogo o tom Hor andoma herakfisaluk he, o Edom esanggokwe nen kwanirogo i Akaba yenggelek oba louwogeluk lagaikharek andi kwe nen lagaukwa. A'nogo lagaukwa meneat he, inafe morogo la elo'lek agaikhemo re,

⁵ ”Yigini'mo yoma ninabire,” iluk Allah inom, Musa inom, inendawimo seramet fisasukwasik, mel isukwa: ”Nit o Mesir en wo'ninarek wagen andi nenahalok? O leimo afuni le'ma sumburu inom, i inom, mondok le'ma yoma ninebe wa'lasuageluk wo'ninarek wagen a? Enduk mondok lek namuk andi mene nek nunggu-nunggu mondok ninabire,” iluk inane pou fuangorogo yagatukwa.

⁶ A'nogo ikhi lagaukwama, At nineisena Tuhan nen he, kisu afuni inebe inoaterek mene hokhorogo it afuni Israel mene inanggele'ma lakfei wagaikhe. A'nogo lakfei wagaikhemo, aigen afuni Israel mene palinafikhemo inebe hokhorogoat wa'lagaukwa.

⁷ A'nogo wa'lagaukwama, it afuni Israel mene ekhe Musa oba wagaukwasik he, mel yagatukwa: ”Niren he, nineisena Tuhan ninendawimo seramet fogosik, Yigini'mo ninabire, iluk Allah inom, hat inom, lalhinafo andi weagat hilingito o, neisena. Ma re, nineisena Tuhan nen kisu andoma nit ninoba nen lakfisoageluk, samban nit faget inogeluk yagahesi wago o, neisena,” iluk yagatukwama, at Musa nen samban it faget isikhe.

⁸ A'nogo isikhemo, At Tuhan nen Musa yagati logolik, ”Haren kisu tembaga mene ekhe hilingisogo eba telogo fein o. Foumo re, it afuni andoma inebe lombok kisu aigen palinafu mene halok, ineilenggen kisu tembaga mene andi liakha wagu mene halok enek he, inebe lombok fano aga logogun o,” iluk yagatikhe.

⁹ A'nogo yagatikhemo, at Musa nen kisu tembaga mene a'nogo hilingisogo eba liakfesikhemo, afuni inebe lombok kisu aigen libilinafunem kisu tembaga mene andi ineilenggen a'nogo liakhugu halok, arat fano aga lagaukwa.

Tom Hor oba nen he o Moab tonggoma andoma lagaukwa wene

¹⁰ Afuni Israel mene a'nogo nekhengge lagaukwasik he, o kota Obot oba andoma o sabu sali lagaukwa.

¹¹ O andoma herakfuluk lagaukwasik he, o Moab oba nen timur fikhit leimo o Abarim olun pugulhukwaba andoma o sabu sali lagaukwa.

¹² Andi nen he it a'nogo o Zered tonggoma o sabu sali lagaukwa.

¹³ Andoma nen he. it a'nogo lagaukwasik he i Arnon aik fena fikhit afuni Amori mene inawi fikhit o lei mondogat miare'ma andoma o sabu sali lagaukwa. I Arnon andi re afuni Moab mene inaiba inom Amori mene inaiba inom huli-hulimo welagaikhe mene agai re andi.

¹⁴ Andiba re, buku Tuhan nen weim yafarek mene iluk mene andiba re yi'nogo palek welagaikhe, ”Desa Waheb, o Sufa nen tonggo-tonggo andoma, i Arnon

¹⁵ alilu inom olonggo-olonggo o Desa Ar oba nen pikhit he o afuni Moab mene inawi inom huli-hulimo andoma,” iluk palek welagaikhe.

¹⁶ Andoma nen he, it a'nogo o enu Beer agarek oba andoma lagaukwa, o andi re i mogo-mogongge iluk ikhi lagaukwaba. Andoma nen he Tuhan nen Musaba ikhi logolik he, ’Afuni andoma An nen i wogisagain enggere kabogesuakhogo yagaisan o,’ iluk yagatikheba.

¹⁷ Andem oba re afuni Israel mene nen wuni watukwa mene yi, ”I mogo-mogongge yoma nen elesi fulogoumhogo wulabi me, niren he wuni warogo wokhabuogen.

¹⁸ Ap kaindek-kaindegen inom, nen it afuni inunggulenu inap ferinarek welagaikharek mene inarige tomuk a'nogoba inom, nen inarige tomuk enegengge omame werek mene omanogoba inom habulik mene o,” iluk wuni watukwa. O leimo andoma nen he it a'nogo higilogo re o Matana lagaukwa,

¹⁹ Andemen he o Nahaliel lagaukwasik, o Bamot lagaukwa.

²⁰ Andemen he it afuni Moab mene inawi tonggoma Tom Pisga a'nogo punu a'ma elokhe leikwe fikhit hilingi'mo andoma lagaukwa.

Raja Sihon inom Og inom inoba nen inomame agaukwa wene

²¹ Andi nen he, afuni Israel mene a'nogo nen yonggongge hun Sihon, raja Amori meneba wene yi lakfesukwa,

²² ”Nineisena, hat haiba hanggweang kwe oma nen nit logoin nen fano lani iluk yaganisan o. Nit ninebe inom ninanggo inom he taganhogo wulibi laluk, yabukwe inom anggur yago kwe inom kwi lagik, nen hinagai mogo habulikwe andoma yugunat ninggik ugun lego. Nit he ebekwe hokho kwe nen enek pikhithogo laga logombik he, ninoe hat hanggweangma yoma nen obokhogo wulibi louwogen iluk yagaheto o,” iluk lakfesukwa.

²³ Oba nen at raja a'nogo nen he, afuni Israel mene at anggweang kwe andoma loageluk yagaisasikhe lek. Aren he agoromi weim yafarek mene esa logalfisasikhesik he o Yohas leimo andoma sali lagaukwasik, it afuni Israel mene inoba weim wulifukwa.

²⁴ Oba nen he, weim yafukwa mene andiba nen it tentara Amon mene Israel inaben hokhorogo inoatukwa. A'nogo inoatukwasik he, it Israel mene o Arnon oba nen he i Yabok huli it Amon inap inom huli-hulimo andoma sebeli kwisukwa, huli-hulimo andoma ap kagalek werek mene re inomame mondok hokho welagaukwama weim kwisukwa lek.

²⁵ A'nogo hilingitukwa andiba re, afuni Israel mene nen he afuni Amori mene inawi kota inom, o Hesybon inom, o kota endep-endebengge era'lukwe welagaikhe mene inom, telasukwasik he, it a'nogo o andoma femhogo welagaukwa.

²⁶ O Hesybon andi re, raja Sihon awi kota hokho mene sili pumbukhogo welagaikheba. Aren he raja Moab inom weim yafukwasik awi sili andi telikhi logolik he, i Arnon nen uanhogoat andoma huli telasikhe.

²⁷ A'nogo hilingitukwa andiba re, it wuni felalhu inelu mene nen he inane unggut he yi'nogo isukwa, ”O Hesybon, Raja Sihon mene awi kota ba andoma we'ni. Niren he o kota ari nekhengge kerabenggerogo obali'mo wutunem hogoin ninamolo.

²⁸ Wene misigam o kota yiba nen hilingitukwa mene re yi: At Sihon agoromi esa re endu lei ninggerek hakhogo laga lagaukwa. Iren he o Moab en kota Ar a'nogo wolelenggen isasukwasik, o Arnon punukwe andoma huli mondogat sebelasukwa.

²⁹ Hit ap hinunggulenu Moab mene yi sani, eige, hit he alomat lagepsik welagebo! Haren Kamos apne wanhi lagen mene a'nogo mondogat lek aga! Hat he, heisena Allah nen obokhogo lakhobagaikhemo re ap o ekhema halogo kwi lagaikharek hak hilinglagendik welagen! Ha'logomi re raja Amori mene nen fakfisikhesik at a'ma hele warogo fisikhemo werek.

³⁰ Oba nen he yogondak it inambisangma mene omanogo re. Ebekwe o Hesybon nen Dibon lagaikharekwe omanogo inom, o Basyim en he o Nofah lagaikharekwe inom, o Medeba horokhogo lagaikharekwe omanogo lek agaikha,” iluk isukwa.

³¹ A'nogo hilingitukwasik he, it afuni Israel mene a'nogo o afuni Amori nen meneba andoma femhogo welagaukwa.

³² Andi nen, Musa nen ap lakfisikhi logolik o kota Yaezer andoma koma kwe nen inoasi kugun iluk kwe herasi loageluk lakfisasikhe. A'nogo hilingitukwasik it Israel mene nen he kota a'nogo inom nen fena kota endep-endebengge mene era'lukwe werek mene inom sebeli kwisukwasik he, afuni Amori mene o andoma werek mene omanogo mugusogo wulaginafukwa.

³³ Andi mondogat hilingitukwasik he, afuni Israel mene a'nogo haningisogo re kwe o Basan lagaikharekwe nen lagaukwa. Lagunem he, raja Og awi Basan agun a'nogo re agoromi sikhe fisogo mene esa logal fisasikhesik he, afuni Israel mene inoasigin iluk o kota Edrei andoma wagaikhe.

³⁴ Tuhan nen Musa yagati logolik, ”At oba hailo su fuk. An nen hat homamet hobagagin. Haren at omame leget fembik he, at agoromi holhu mene inom, awi anggweang inom haren sebelagain o. At andi re haren raja Sihon afuni Hesybon mene melalinafunem hilingfisegen a'nogo hakhogo at oba ogo a'nogoat hilingfeino,” iluk yagatikhe.

³⁵ Andiba re, ap Israel mene nen he raja Og a'nogo omame leget fesukwasik he ebe inom, agoromi inom, afuni aren melalinafi lagaikhe mene omanogo mondogat inom, felelenghogo pinggi inoatukwa. Misik ekhe lin fesukwa lek. A'nogo hilingitukwasik he it a'nogo o kweang a'nogoba sebela kwisukwa.