BILANGAN 19 - Allah Wene Fano Wene Hupla Inane

Sapi esi mep mene nolhi logogun mene faget isikhe wene

¹ Tuhan nen Musa inom Harun inom inoba,

² wene melalek yi afuni Israel mene yagaisano iluk miminginafi logolik he: Sapi helou oba nen ebe esi mep mene halok ebene agambut palek lek mene enggin engge oan hatherek lek mene ekhe waluk,

³ imam Eleazar wogosi we'no. Fei wagu mene andi re O Sabu wuri'mo nen waluk enda'ma wulibi laluk, ap imam inelokhoma nen wati logogun.

⁴ A'nogo hilingfuluk he imam Eleazar en sapi andi amep endebengge waganogo waluk Tuhan Awi Sabu fikhit andoma 7 nen kweterisikhi logogin.

⁵ Sapi andi agap inom, eino inom, al inom, amep inom, mondogat he imam elokhoma andoma endu nolhi logogin.

⁶ Andi nen he imam en e aras endebengge inom, hisop enggi tamulik inom, yo eil mep mene lalek misik inom, waluk he endu sapi nolek mene nunggunem andi inom noageluk nolfikhi logogin.

⁷ Andi hilingfuluk he imam a'nogo asu sobalhik kume watik, ikhi logogin. A'nogo hilingfuluk enek he aren o sabumo andoma kwikhi logogin, oba nen he at ebe emerek were'ma nen enek he mo ubuk ikhi logogin.

⁸ Ap sapi andi noligin agun andi ogo re asu sobalogo kume warogo hilingisigin. At ogore ebe emerek werek kwelek enek he mo ubuk ikhi logogin.

⁹ Andi nen ap misik ekhe emerek lek mene nen wul sapi nolugun oba aremnogo andogorogo waluk he, o sabu abel endakwe obalik mondok fanore'ma andoma fikhi logogin. Nen, wul andi re andoma foukhogo were'ma, it afuni Israel mene inaweak horinabuageluk hilingiti logolik i inom horinafu mene faget andoma logogin.

¹⁰ Ap sapi wul andi andogoti logogin mene andi asu sobalhi logogin oba nen he, ebe nek he emerek werek kwelek enek mo ubuk ikhi logogin. Wene melalek andi afuni Israel mene inom ap pok mene femhogo it inanggelekwe logogun mene faget inom mondok-mondok logogin.

Ap warek inenggi fagisugu mene faget isikhe wene

¹¹ Ap ekhe nen ap warek mene ekhe enggi fakhagain halok he, ap andi ebe emerek werek kwelek enek he linggene 7 huli nen logogin.

¹² Linggene henaganek meneba inom, linggene sabit enggeba inom andem he at ebe emerek logolik ebe i sobalhu mene a'nogoba horagain. Oba nen he linggene henagan meneba inom, linggene sabit enggeba inom andem oba horigi'legat logogin halok he, at ebe emeregat logogin.

¹³ Ap warek fakhikhesigen at ebe horigi'lek halok he, at ebe ho'lasuageluk i ebene kweisalhu mene a'nogoba sobaligi'lek andi nen he, at ebe emeregat logogin. Aren o Tuhan Awi sabu a'nogo emerogo fagain andiba re at ebe Allah againafuri mene werek anggogoin lek.

¹⁴ Afuni ekhe o sabu elonggoma wa'lagu halok, afuni o sabu andi elonggoma logogun mene inom, o andiba kugun mene inom andi waregen sebelinabiginmo re linggene sabiren inebe emerek logogun.

¹⁵ Iwak kendi inom waruk periyuk inom andoma ogo ambe sa'lip warek legengge logogin mene ogo, emetlasigin.

¹⁶ Ap ogo hemi ogo afuni nen pinggi inoatunem warek halok ogo, amu yabumo nen wa'lasigin halok ogo, andomaba fagisogoin halok he at ebe emerek werek kwelek enek linggene 7 nen logogin. Andi hak he ap wa'lagu mene inoak fagisogoin mene ogo, warek salegoba fagisogoin mene ogore emerek enek logogun.

¹⁷ Ap emerek mene a'nogo inebe sobaluogeluk logolik he, wul wam sapi tugum mene esi mep mene afuni inaweak horinafu mene faget iluk nolugun mene a'nogo we endebengge halok waluk he, wul andi waruk misik ekhe elema kwelakfuluk, i lagu agai meneba hinagaisogo werek mene a'nogoba, kweisalogo elema kwelakfogoin.

¹⁸ Wene attak mene andiba re, ap wa'lasugun mene o sabu elonggoma nen wa'lagu halok, ap emerek lek mene nen hisop omolo misik ekhe waluk i a'nogoba yugul haluk he, o sabu andi inom yingge-tingge o sabumo andoma werek engge andoma inom hosugun, nen ap andoma werek mene ogo horinabugunat. Nen wene pirenek meneba re, ap ekhe ap warek mene inom, ap warek oak siling inom, salinafuba inom senetu halok he, it ap emerek lek mene nen attak mene faget hilingisugun mene a'nogo higithogoat horinabugun.

¹⁹ Aren he i a'nogo linggene henaganek mene inom oba, linggene 7 nen mene inom oba kweisalinafi logogin. Linggene sabiren mene andiba aren ap emerek mene horinafu aple andi arat wurep kobokhogo hilingiti logogin. Ap andi re asu sobalhik, ebene kume watik ikhi logogin. Nen mo ubuk ugu kwelek andem he at ebe mondogat pugunsek mene aga logogin.

²⁰ Ap ekhe emetlasigin mene nen onggwarek ebe ho'nabuageluk hilingisigin lek halok, ap i horinafi logolik kweisalinafu mene a'nogo oba hosugun le'ma ap andi ebe emerek logogin. Aren Tuhan Awi wurik oba a'nogo emetfagain andi nen he, Allah againafuri mene werek anggikhi logogun lek.

²¹ Wene melalek andire mondok-mondogat andoma logogin. Ap ekhe iba afuni inebene kweterisagain agun andi ogo asu sobalagainat, nen ap i andi mene ekhe fakhikhe halok he at ebe emerek were'ma nen enek mo ubuk ikhi logogin.

²² Yi mene ti mene ap emerek mene nen fakhagain mene halok he andoma abirengge emetlaga logogin, nen ap amu mene nen fakhogoin mene ogo re emerek werek kwelek enek mo ubuk ikhi logogin.