BILANGAN 18 - Allah Wene Fano Wene Hupla Inane

Ap Lewi mene inom imam mene inomen eiserogo logolik hilingiti logogun wene

¹ Tuhan ane Harun oba yagati logolik, ”Hat hebe inom, hat hagainafuri inom, ap Lewi mene inomen he, An Nawi sabumo nen weak hilingisugun mene andoma onggo re hikhi logogun. Oba nen he, we hat inom hagainafuri inom enek he it imam en yabu hilingiti logolik weak hilingitu mene andoma ambisangma hikhi logogun enek.

² It hagaila'lak hinunggulenu Lewi mene re, hat yabu hilingitunem inom it hagainafuri yabu hilingitunem inom lebethinafi logouwagen kwelaginafi logoino.

³ Inunggulenu Lewi mene re, iren hat hobaget hilingisuageluk werek mene andoma hilingitik, nen An Nawi sabu wuri'mo andoma hilingisuageluk werek mene omanogo hilingitik ikhi logogun. Oba nen he, iren mezbah horokhogo wagu aple ogo athe yi mene ti mene hilingitungge mondok horek mene andoma O Senggelek Hore'ma werek mene andoma ogo senhikhi logogun mondok lek. Iren wene melalek werek mene andi taganhogo hilingisugun halok he harogo irogo wa'lasugun.

⁴ It he, yabu hit hinom seberogo hilingiti logolik, An Nawi sabumo andoma hilingitu mene nek hilingiti logogun oba nen he, it eiserogo hilingisuageluk werek lek mene re hit hinom seberogo hilingiti logou fuk.

⁵ An nen afuni Israel mene inoba ekhe na'mage figi hanogo re yabu O Senggelek Hore'ma a'nogo inom, nen mezbah oba andoma inom he, we hat Harun inom, it hagainafuri inomen nek hilingiti logogun.

⁶ Ibi eberogo An nen hinagaila'lak Lewi mene andi hit hinunggulenu Israel mene hinanggele'ma nen hat hobaget enego hobagagi. It An Nawi Sabumo andoma An nobaget hilingiti logouwageluk enogo fisigi.

⁷ Oba nen he yabu mezbah oba andoma hilingitu mene inom, nen O Senggelek Mondok Hore'ma a'nogoba werek mene faget inom he, we hat inom it hagainafuri hinomen enek yabu imam mene andi logolik hilingiti logogun. An nen hat hoba yabu imam mene andi hilingiti logouwageluk hobagasigimo re, haren eiserogo logolik hilingiti logogin mene re andi. Afuni it andi inoba andoma hilingiti logouwageluk werek lek mene oba nen yi mene ti mene mondok horek mene andiba horokhogo asi lagu halok he wene inoba fuluk pinggi inoati logoino.” iluk yagaisasikhe.

It imam inalolegengge logogin mene iluk wogisasikhe wene

⁸ Tuhan nen Harun oba yagati logolik, ”An nobaget enekhogo fuluk wo'netu mene andoma mondogat endu nolhi'lek mene andoma re hat mene. Andoma mondogat he hat mene iluk wendeberogo were'ma re mondok-mondok logogin. A'nogo were'ma hat inom haren tagongge mene inom An nen wokhisikhi logogin.

⁹ An nobaget fugu mene andoma mondogat he ebe horek mene mezbah amboloba nolhi'lek mene andoma re hat mene aga logogin. Andoma ebere An nobaget amep lek mene wo'netu mene inom, ninaweak lek hilingisogo ninobagauwageluk fugu mene inom, ap inangge alomat fuluk obali'mo fugu mene inom. andoma mondogat he horek mene iluk fikhi logogun oba nen hat inom it hagainafuri inom hinobaget logogin.

¹⁰ Andoma re hat hobaget mondok horek mene were'ma re, nouwogeluk halok he obalik mondok fano horek oba nenat, ap halok enek ninggi logogun.

¹¹ Yi mene ti mene afuni Israel mene nen An nobaget enogo fei wagu mene andoma ogo re hat hobagerat logogin. An nen hat inom hat hagainafuri ap mene inom helime mene inom hinobaget wokhisasigi. Nen wene melalek andire hinenggi hundik-handik andoma a'nogo nek logogin. It hat homolo lekwe nen inebe emerek lek mene re andoma ninggi logogun fano.

¹² Afuni Israel mene nen tahun hundik-hundik andoma An nobaget iluk zaitun amusu inom, anggur agai inom, gandum inom wo'nesi wagu mene andoma attak-attak taganhu mene halok, nen enggen palek mondok fano mene andoma re An nen hat wokheti logogin.

¹³ Mondogat andoma re hat hobaget enek were'manggere hat hagainafuri heisok erokwe mene inebe emerek lek mene re andoma ninggi logogun fano.

¹⁴ Yi mene ti mene kweang Israel meneba nen An nobaget enogo fagama werek mene andoma re hat mene asigin.

¹⁵ Ap inagainafuri inom wam eagwi inomen attak-attak tago mene afuni Israel mene nen An nobaget fei wagu mene andoma re, hat hobagerat werek. Oba nen he hit hinagainafuri manggusa mene inom wam saliok mene eak attak tago mene inom andoma re onggo palugun.

¹⁶ Afuni inagainafuri re inebe umur tugi misik hilingi'mo inonggo palhi logogun. Onggo andi faget femhogo werek mene re uang perak 5 nen oba, onggo andi An Nawi Sabumo hilingik higithogo palhi logogun.

¹⁷ Oba nen he sapi, domba, kambing attak tatu mene halok he onggo palu fuk. Wam andoma re An nobaget mene hilingi'mo re warogo fikhi logogun. Amep he mezbah a'nogo ebene kweisal isaluk he aseire warogo nolhu mene iluk nolhi logogun. Andi amben nen he An nendawimo healhi logogin.

¹⁸ Eino re hit mene logogin meneat he amik inom eisok ebekwe inom he An nobaget inuknealuk fikhi logogun mene a'nogo emberek higit logogin.

¹⁹ Hinenggi mondok-mondok andoma, afuni Israel mene nen enogo fugu mene waluk An wo'nesi wagu halok, An nen hat inom hagainafuri ap inom helime inom wokhisikhi logogin. Wene melalek andi re hinenggi mondok-mondok a'nogo were'ma re wene warek andi An ninom haren tagongge mene inomen sugwi agi'lek tiphogo nek hilingitu mondok logogun.” iluk yagatikhe.

²⁰ Tuhan nen ane ekhe inom Harun yagati logolik, ”Hit he hinangge hinalolegengge mene ekhe logogin lego. O kweang An nen abok wokhisasigiba andi mene ogo re hit faget kweang huli misik ogo ekhe logogin legaro. We, hit hinalolegengge higit he An hineisena Tuhan nebe aro,” isikhe.

Ap Lewi mene inalolegengge faget isikhe wene

²¹ Tuhan ane Harun oba yagati logolik, ”It afuni Israel mene nen 10 mene An nobaget fugu mene andoma re An nen it ap Lewi mene wogisikhi logogin. Andi re iren An nobaget An Nawi Sabumo andoma yabu hilingiti logogun mene faget inangge helikhi logouwageluk wogisigi.

²² It afuni Israel amu mene andoma re An Nawi horokhogo wagunem iren weak mene inom nen inebe wa'lagaikharek mene inom inoba asi wesinogo re horokhogo andoma waga logogun mondok lek.

²³ O yogondak huli nen he it ap Lewi mene nek An Nawi Sabumo neabu hilingiti logolik it eiserogo hilingiti logogun. Wene melalek andi re hit hinagainafuri hinerembul oba nen ta'lasugun mene andoma ogo a'nogo nek hilingiti logolik mondok-mondok logogun mene faget igi. Ap Lewi mene re it Israel mene were'ma andoma inalolegengge ekhe logogin lek,

²⁴ it faget inalolegengge logogin mene re An nobaget afuni Israel mene nen enogo fuluk wo'neti logogun mene andoma wogisigi andi. Ma re it ap Lewi mene faget An nen ikhi logolik afuni Israel mene inoba andoma it inalolegengge mene ekhe logogin lek igi andi.” iluk yagatikhe.

Ap Lewi mene nen 10 mene a'nogo fikhi lagaukwa wene

²⁵ Tuhan nen Musa oba mimingiti logolik,

²⁶ wene melalek yi ap Lewi mene inoba yagaisano: Afuni Israel mene nen Tuhan faget 10 mene fugu menere hit mene agunem, hiren omanogo mene An nobaget 10 mene enogo fuluk wo'neti logogunat.

²⁷ Hiren An nobaget enogo fikhi logogun mene andi re gandum enggen attak palogo fugu mene inom, anggur agai attak keralogo fugu mene andoma inom higitsek anggikhi logogun.

²⁸ A'nogo hilingiti logogun oba re hiren ogo re it afuni Israel mene nen 10 mene fei wagu mene omanogo nen fenakwe re Tuhan obaget mene iluk enogo fikhi logogun andi. Hiren enogo fikhi logogun mene andi re hun imam Harun a'nogo wogeti logogun.

²⁹ Hiren helikhi logogun engge andoma mene re mondok fano mene nek wogeti logogun.

³⁰ Hiren andi mene mondogat woge'luk enek he fena minggilik mene andoma hit helikhi logogun, andi re it ap yabu wanhu inaben An wo'netu mene tak waluk we'lugen, it mene tindel agunemen hobuk helagarek a'nogo hakhogo hilingiti logogun.

³¹ Tindel agu mene andoma re hit inom it heneisok erokwe mene inomen o koma nen halok ogo ninggi logogun enek, andi re hiren yabu An Nawi Sabumo hilingiti logogun mene andi onggo.

³² Hit ninggi logogun mene andi re weak fuk, oba nen he mondok fano mene omanogo tak Tuhan obaget mondogat fuluk enek he a'nogo hilingisugun fano. Afuni Israel mene nen Tuhan obaget amu enogo fuluk fei waga logogun mene hilingi'mo, hiren enogo figi'lek logoligen nogoin halok he emetfegep hanogo. Hiren wene melalek yi sagalogo fuluk hilingisugun halok he, hit hinebe wa'lasugun.