BILANGAN 15 - Allah Wene Fano Wene Hupla Inane

Warogo nolhi logolik hilingiti logogun mene faget yagaisasikhe wene

¹ Tuhan nen Musa yagati logolik,

² wene melalek yire it afuni Israel mene nen o kweang Tuhan nen wogisagain oba andoma kwilambik hilingiti logobagaigen iluk wogetikhe.

³ Hiren Tuhan obaget warogo nolhu mene inom, inane menfugu mene faget onggo inom athe inendawimo nen anggaluk warogo nolhu mene inom, linggene we mene faget iluk hilingiti logolik warogo nolhu mene faget inom nolhi logolik he: sapi ai mene inom, domba ai mene inom, domba halok ogo kambing halok ogo warogo nolhi logoino. Nen warogo nolugun mene andoma amben nen he Tuhan endawimo agaiyek hikhi logogin.

^4-5 Ap ekhe nen domba hea, kambing hea, fuluk Tuhan faget warogo noligin iluk waluk waga logolik halok he, wam andem ebe lombok inom he tepung satu kilogram inom, zaitun amusu satu liter inom munenegengge fugu mene faget mangorogo inom, anggur agai re satu liter inom waluk waga logoino.

⁶ Hiren warogo waluk waga logogun engge andoma ambi domba ai mene misikhogo wati logolik halok he hiren tepung dua kilogram inom he zaitun amusu setengah liter inom munenogo, amep lek mene fugu mene inom waluk waga logolik he,

⁷ anggur agai re setengah liter inom wogosi waga logoino. Warogo nolugun mene andoma amben nen he Tuhan endawimo healhi logogin.

⁸ Warogo nolhungge andi re sapi ai mene misik halok ogo, athe inane menetu mene faget onggo halok ogo, athe lambulogo fisugu mene faget halok ogo,

⁹ andem faget we'luk halok he, hiren tepung tiga kilogram inom, zaitun amusu dua liter inom munenogo hilingfuluk he, amep lek mene andoma inom,

¹⁰ nen anggur agai re dua liter inom waluk fei waga logoin o. Warogo nolugun mene andoma amben nen he Tuhan endawimo healhi logogin.

¹¹ Nen hiren sapi ai mene inom, domba ai mene inom domba inom kambing inom warogo nolhi logolik fikhi logogun mene re andoma.

¹² Warogo nolhi logoliki wam pire henagan ekhe inom mangorogoat asi lagu halok he, hiren tepung inom zaitun amusu inom anggur agai inom andoma re wam lambulogo hilinglasigin aremnogo higithogo ekhe inom mangotfikhi logogunat.

¹³ Wene andi re it afuni Israel mene inebe lombogen warogo fikhi logolik he a'nogo hilingiti logogun. Nen warogo nolugun mene andi amben nen he Tuhan endawimo healhi logogin.

¹⁴ Ap pok mene misik hit hinanggele'ma elama werek mene nen a, athe femhogo werek mene nen a, nunggu mene andoma ambenhogo nolhu halok ogore wene melalek andi higithogo hilingitunem amben a'nogo nen he Tuhan endawimo healhi logogin.

^15-16 Hit inom, ap pok hit hinanggelekwe werek mene andoma inom Tuhan eilhanem he higit enek hilingi'mo re, hiren ogo, iren ogo wene melalek inom, yi'nogo ti'nogo werek mene andoma inom he, wene andi were'ma oba loukhogo nek hilingirik laga logogun.

¹⁷ Wene melalek yi re, Tuhan nen Musa oba

¹⁸ it afuni inunggulenu Israel mene nen o kweang Tuhan nen it hobuk wokhisagain oba andoma nen hilingiti logogun mene iluk wogetikhe.

¹⁹ Hiren ambi o kweang andi oba enggen ugu omanogo nunggu mene erora'luk halok he, fena re hiren Tuhan wogetu mene iluk amu enogo fikhi logogun.

²⁰ Hiren roti gandum enggen attak-attak palhu mene werati logolik halok he roti andi re hiren Tuhan obaget enogo fugu mene iluk wogeti logogun. Obaget fogoin menere hiren gandum enggen attak-attak sagalek mene fikhi logogun andi higithogo.

²¹ Hinenggi mondok-mondok andomaba re roti gandum attak-attak palogo weratu mene andoma re hiren Tuhan wogetu mene faget iluk amu enogo fikhi logogun.

^22-24 Wene melalek Tuhan nen Musaba fesikhe awene andoma misik ekhe hiren hineranhogo lek oba nen we fetakhogo sagalfuluk halok he, linggene At Tuhan nen wene melalek wogisasikhe huli andi nen pikhit hobuk mondok-mondok logogun huli andoma re, nen iren weak hilingisugun mene andi re it afuni andoma wene melalek werek mene andi inonggothogo hilingisugun, andi nen he it afuni holhu mene omanogo mondogaren he sapi ai mene misik ekhe warogo nolhu mene iluk fikhi logogun. Andi inom seberogo re amep werek lek mene fugu mene iluk inom nen anggur agai fikhi logogun mene iluk huli-huli werek higithogo inom fikhi logogun. Hiren warogo fikhi logogun mene andoma nen he Tuhan endawimo healhi logogin. Andi fulugen he ekhe hit hinaweak onggorabethogo hinobagauwageluk he domba ai mene misik ekhe warogo fikhi logogun.

²⁵ A'nogo hilingi'luk he at imam en afuni inaweak lek hilingisogo fisoageluk inobaget hilingiti logogin. Andiba re, iren hilingisugun mene andi inendawi wenggelfuluk hilingisugun le'ma nen iren ninaweak lek hilingisogo ninobagauwageluk, Tuhan obaget nolhu mene wam waluk wesugun mene andiba re, afuni andi inaweak lek hilingisogo fisikhi logogin.

²⁶ It afuni Israel mene mondogat inom nen it ap pok mene inanggelekwe werek mene inom, iren weak ineranhogo lek oba nen ferekhogo hilingisugun mene andi faget he inaweak lek hilingisogo fisikhi logogin.

²⁷ We ap misik ekhe nen wenggelek le'ma nen ferekhogo weak hilingitu halok he, at andi aweak lek hilingisogo fugu mene faget he kambing helou mene misik ekhe umur satu tahun oba mene halok warogo fikhi logogin.

²⁸ A'nogo fugunem he. it imam en ap a'nogo Tuhan elokhoma nen aweak lek hilingisogo fouwageluk he obaget hilingiti logogin.

²⁹ Ap sa nen weak endawimo nen hilingisigin iluk wenggelhi'lek oba nen hilingisugun mene halok he wene melalek andi re it Israel mene faget inom, it ap pok mene inanggelekwe werek mene faget inom higithogo logogin.

³⁰ Oba nen he afuni Israel mene misigen he a, nen ap pok mene misigen he a, inelu logoligen weak hilingitu halok he, aren he Tuhan sebelogo fagain. Andi nen he unggum he wene oba fembik ebe pinggi wasugun,

³¹ andi re aren Tuhan ane sagalhik, nen elu logoligen Tuhan awene melalek taganhogo hilingitik, hilingisigin andiba, ap andi re onggwarek aweak elekwe ebe wa'lasigin.

Afuni nen linggene Sabat faget wene melalek werek mene sagalhunem hilingiti logogun wene

³² It afuni Israel mene o leimo andoma logolik, ap misik ekhe e oloba nolhu mene faget linggene Sabat sambul wurik nugunem ineilenggen haluk halok he,

³³ at andi ebe hondo'luk it Musa Harun inom nen Allah againafuri hokhorogo were'ma omanogo waluk waga lagaukwa.

³⁴ Woginarek we'luk he, ap a'nogo nen hilingiti laga mene a'nogo ero furek legen he ebe fisogo logolik at oba yi'nogo ti'nogo ekhe hilingiti'lek welagaukwa.

³⁵ Tuhan nen Musaba yagati logolik he, ”Ap andi re ebe pinggi wasugun. At ebe waluk he o sabu wurik mene omanogo abel endakwe fikhit wulibi laluk he, it afuni a'nogo nen helep oba tunghogo pinggi warogo foumo wa'lasigin.” iluk yagatikhe.

³⁶ Andiba re, it afuni mondogat omanogo nen at a'nogo ailoba nen lisogo wulakfei laluk he, At Tuhan nen wene melalogo yagaisasikhe higithogo re ap a'nogo heleben tunghogo wat fugunem wa'laga lagaikhe.

Su wurepkwe yo sili hakhogo mindati logogun mene faget yagaisasikhe wene

³⁷ Tuhan nen Musa mimingiti logolik,

³⁸ it afuni Israel mene inoba yagaisoageluk yagati logolik he, ”Hit hinasu wurep kwe mindagaisogo porogo fugunem he andi ebe lombok oba re yo eil pogot hangge mene kelhigik fikhi logoino. Andi re hiren hundik-hundik andoma hilingitu mondok logogun.

³⁹ Yo lalek kelhi logogun mene andi re inendawi wenggelengge faget, hundik-hundik hiren kumuthaluk he An nawene melalek omanogo ebethaluk higithogo hilingiti logogun. Andiba re, hiren An hinonggora'luk hit hinonggwarek hinendawimo anggugu mene nek hilingiti lagep hanogo.

⁴⁰ Yo lalek kelhi logogun mene andi nen he, hiren An nawene melalek omanogo hologo mondok hilingiti logouwageluk ebethisikhi logogin. Ma re, hit he ibi-eberogo An nonggwarek nanggge mene asugun.

⁴¹ An he hineisena Tuhan Allah re Anaro. An he hit hineisena Tuhan Allah logogiluk, hit hinebe o Mesir were'ma wokhinarek wulibi wagagi o. Tuhan nebere Anaro,” iluk ikhe yagaisano, iluk yagatikhe.