BILANGAN 14 - Allah Wene Fano Wene Hupla Inane

Afuni Israel mene nen Musa Harun emberek inoba limamit fesukwa wene

¹ It ap o Kanaan ineil wani lagaukwa omanogo nen afuni Israel mene mondogat inendawimo kagalhukwama inesanggo holhukwasik he, ”Ninggi'nogo hilingisugun he,” iluk o hup hundik inane hokhorogo le agu mondok kamo isukwa.

² A'nogo ikhi lagaukwasik, Musa Harun emberek inoba limamit palogo mel yagaisasukwa: ”Nit ninebe o Mesir a'lima he a? O leimo afuni le'ma yoma he a, wa'la'loma fano mene. Nit ninebe wa'lasumo fano o!

³ It afuni andoma nen nit ninebe ninoa'luk, ninagagwi inom, ninagainafuri inom, hele warogo fisoageluk Tuhan nen o andoma wo'ninarek lageluk waga andi nenahalok. Ninambotkwe o Mesir lamo elo'lek nogo? Elok lagoin aro,” iluk yagaisasukwa.

⁴ A'nogo yagaisasukwasik, it-it ekhe nen ekhe yagati logolik, mel isukwa: ”Nit ninambotkwe o Mesir wo'ninarek loagen he, ninoe ekhe heragaisogo menfouwogo,” iluk isukwa.

⁵ A'nogo yagaisasukwama, it Musa Harun emberek it afuni omanogo mondogat ineilhanem ineindep awi yagaisogo nen hai warinafukwa.

⁶ A'nogo hilingitukwama, it afuni ineil penesi lagaukwa omanogo mene inebe pire, ap Nun amlogo Yosua inom, Yefune amlogo Kaleb inom, emberek it afuni nen he, ”Inendawimo weak agasigen hilingita,” iluk futfouwageluk inasu ugu mene tiliphogo lakfisasukwa.

⁷ A'nogo lakfisasukwasik, it afuni omanogo mondogat mel yagaisasukwa: ”O nit nineilengen penesi lagosik, pen fuluk wagoba andoma re, fano mondogo.

⁸ Ma re, nineisena Tuhan nit ninoba liok ikhe halok he, Aren o andoma wo'ninarek lambik, kweang mondok muli fanoma yi mene ti mene hokhorogo were'ma andoma re nit wo'nisagain o.

⁹ Niren it afuni andoma mene elok mabenet fisogoin andi nen he, hiren nineisena Tuhan hinom weim palek welagik, Afuni o andoma welagaikharek mene ninailo, iluk igik, u fugo. It ferinarek welagaikharek mene it herakfisaluk wulifa meneat he, nit nineisena Tuhan enek he, fetninarek ninom mondok werek andi nen he, hinailo agubo,” iluk yagaisasukwa.

¹⁰ A'nogo yagaisasukwama, it afuni omanogo ina'makwe het perisukwasik, helep oba tung-tanghogo inebe mondok pinggi inoasuogeluk isukwa. A'nogo isukwa meneat he, aremnogoat Tuhan ombak-bak fogeratarek mene o At awi su mene wuri'mo tum oba weinam agaikhesik yararet hasikhemo, it afuni omanogo ineilenggen yethasukwasik he, kamo isukwa.

At Musa nen, afuni Israel mene telinabuageluk samban isikhe wene

¹¹ A'nogo weinam agaikhesik, Tuhan nen he, Musa mel yagatikhe: ”Afuni oma nen inenggi miren oba An ninom weim palek hangge hilingiti logogun nogo? An nen it futfouwageluk inanggele'ma hilingisu lek mene elalin mene hokhorogoat hilingitu kwelek meneat he, huli kiba nen inendawinggen An noba himbiretfogoin inabit nogo?

¹² An nen, it inebe mondok legetfisageluk, ou ekhema nen ekhema higilogo lagik ikherek mene inoba lakfei wesigin o. A'nogo meneat he, harenek he, hunggulenu ekhe it hangge mene lek, we, hunggulenu mondok hokho homame werek mene hilingisogo hobagagin o,” iluk yagatikhe.

¹³ A'nogo yagatikhemo, at Musa nen he Tuhan mel yagatikhe: ”Neisena. Hat homameba nit o Mesir en wo'ninarek wulibi wagagindik wagen meneat he, Haren nit a'nogo hilingninabigin andi, afuni Mesir mene nen inesanggo holugun o.

¹⁴ Inesanggo holimbik he, iren afuni o yoma mene yagaisogoin aro. Attagat it afuni ekhe nen he, afuni Israel mene ineisena Tuhan nen ferinarek mondok werek. Allah ebe linggene halok ohena anggele'ma menla'lugen he, hubanggo halok he endu anggele'ma menlarik weri'lago. Afuni Israel mene inelokhoma arigini'logo mene andi re it afuni o yoma mene inesanggo holha meneat he, hobuk Haren a'nogo hilingninabigin halok, it afuni Mesir mene nen it afuni yoma mene yagaisogoin aro.

¹⁵ Haren hagainafuri inebe andi mondogat inoasigin halok he, afuni inunggulenu lombok ekhe nen hat habok o yi awi ti awi lagunem inesanggo holha mene andi nen he,

¹⁶ At Allah nen againafuri o it wogisagaluk wene warisasikheba andoma woginarek lagain omame legen he, o leimo afuni le'ma andoma inoate, iluk it ekhe yagaisogoin aro.

¹⁷ A'nogo yagaisogoin andi nen he, hat homame inuknisambik, yi'nogo hilinghinabigin, iluk wene wa'nisasigin andi hagat hilingi'nogeluk kino yagaheti o, neisena. Haren he, mel yaganisasigin anggigi,

¹⁸ ’An hineisena Tuhan nobabut he, weak-weak na'makwe het-periluk wenagisigirek lego. Nen, hokhorogo nendawirinafik, herakfisigi'lek ferinarek mondok welagik, afuni weak hilingitarek mene inom, inaselei mene hangge hilingnafarek mene inom, sagalogo legetfisigik, igirego. It a'nogo hilingitu kwelek meneat he, it weak hilingiti logogun andiba, onggo re, iren tagongge mene attak ta'lagik, ombo'ne ta'lagik, hobuk ekhe ta'lagik, huli 4 oba ta'lasugun mene inomat inoba fagain o,’ iluk isigin anggigi.

¹⁹ Ma re, Haren hokhorogo hendawirinafik, yi'nogo hilinghinabigin, iluk wene wa'nisasigin higithogoat hilingninafik egendek andi nen, yogondak it afuni Israel mene o Mesir en herakfisaluk wulibi wesuageluk weak hilingiti lagaukwa mene sagalogo legetfisikhi lagagin andi hak, yogondak it weak hilingita mene andi sagalogo legetfisanogen iluk yagaheti o, neisena,” iluk yagatikhe.

²⁰ A'nogo yagatikhemo At Tuhan nen he mel yagatikhe: ”Fano. An haren kino yaganeten higithogoat it weak hilingita mene andi sagalogo legetfisagain o.

²¹ A'nogo meneat he, An netok mondok logolik, afuni kweangma yoma welagaikharek mene eise welagirek mene a'nogo Nonggwarek nenu hombuk palogo wene yi wathisak.

²² An nombak-bak mondok yararethigirek mene andiba, iren futfouwageluk, elalin mene o Mesir en hilingitunem ineilenggen higik, o leimo afuni le'ma nen hilingitunem ineilenggen higik, ili'lagwi meneat he, An nane hologo hilingisu mondok inabit logolik, iren he, omame werega? Lega, iluk nobabut paluogeluk lalnafu mondok werek andi nen, afuni it aroma mene ebe eluk ekhe inom hogo logombik, An nen o it inombalak wogisageluk wene warisasigiba andoma logoin mondok lego.

²³ It o andoma logoin mondok lego. Afuni it mene ekhe An ninom weim palek hangge hilingnabi'lagwi mene o andoma ap misik-masikhogo ineisok ekhe sebelhogoin mondok legaro.

^24-25 A'nogo meneat he, An namingmingengge Kaleb, An faget obabut mondok hombunhogo hilingiterek mene andi amunek he, An nen at attak lagasik wagaba andoma waluk lagain o. O andoma re, kweang mondok fano lio'layokse'ma yogondak afuni inunggulenu Amalek mene inom, Kanaan mene inom, welagaikharego. A'nogo meneat he, hobuk o andoma namingmingengge Kaleben tagongge mene eise asugun. Ma re, ohealekwe re hit hinambotkwe o leimo afuni le'ma i Akaba yenggelek higit andoma lani o,” iluk yagaisasikhe.

Afuni Israel mene nen Musaba limamit falhunem Tuhan nen wene inoba fesikhe wene

²⁶ At Tuhan nen a'nogo yagaisasikhesik, wene ekhe Musa Harun emberek mel yagaisasikheat:

²⁷ ”Afuni inobabut weak mondok hilingitarek mene o andoma nen An na'mage lagauwageluk, yigini'mo yoma ninabire, iluk inenggi miren oba nen yaganeti logogun nogo. Iren, nabire, iluk inane yi'nogo ti'nogo yaganeri'lagwi mene andi An arat nesanggo holhi o.

²⁸ Halok, iren a'nogo yagahisugu halok, hiren he, nineisena Tuhan nen mel ikhe, iluk yagaisano: An nen he, hiren yaganeti lagep andi higithogoat hilinghinabigiluk, An nonggwarek nebe netok mondok welagirek mene nenu hombuk palogo yagahisigi o, iluk, An hineisena Tuhan nen arat yagahisigi.

^29-30 Hiren an na'mage lagauwageluk, yigini'mo yoma nabire, iluk arat yaganetebo. A'nogo yaganetep andi nen, hit hinebe mondok wa'lasimbik, warek o leimo afuni le'ma yoma yalin-talin herakhinobagagin o. O An nen hit wokhisageluk wene wathisasigiba andoma hinebe umur 20 tahun huli abel ponggwe mene misik halok ekhe kugun mondok lego. We, it Kaleb Yosua emberek enek kugun o.

³¹ Hiren ikhi logolik he, Afuni nen, nit ninebe ninoati logolik he, ninagainafuri hele warogo fisanogo o, iluk egep meneat he, An nen it o hit herakfisegep oba andoma woginarek lagunem he, o andoma it eise asimbik, inebe ta'lagaukwaba higit inawi eisewerek hilinglasugun o.

³² A'nogo meneat he, hirenek he, hinebe o leimo afuni le'ma yoma wa'lasugun o.

³³ Nen hit hinobabut lombukhogo hilingiti lagep lek andi nen he, hit hinagainafuri o leimo afuni le'ma yoma 40 tahun logolik wam konik nikhi logogun. A'nogo hilingirik nugunem enggin-fenggin hikhi logogun-logogun he ambisangma nen inagainafuri andi mene wurep kobokhogo wa'lasugun.

³⁴ Hit o andoma hineil peneti logolik, hinenggi 40 hari welagepsik wagep mene andi, weak hilingiti lagep andi nen wene 40 tahun oba logolik weak hikhi logogun aro. Hinenggi welagep mene andi, misik sambul welagep faget, tahun misigat mene emberek higit aga iluk wenasugun o. Hiren An heraknobagaluk ninom weim kagalhi lagep andi nen, wene hirat hinoba agunem hinelu asigin o.

³⁵ Hit mondogat arat hegepsigen An ninom weim kagalhi lagep mene mondogat hinebe o leimo afuni le'ma yoma wa'lasubagaigen hilinghinabigiluk An Tuhan nen nonggwarek nenu hombuk palogo yagahisigi o, iluk ikhe yagaisano o,” iluk yagaisasikhe.

^36-37 Ap o andoma ineil penesi loagaluk at Musa nen lakfisasikhe mene omanogo o andoma arat ineilenggen pene'luk wagaukwasik, ”O andoma yi'nogo haluk wago,” iluk ineranen wene labelogo afuni Israel mene yagaisa wagaukwa andiba, it mondogaren he, Allah a'mage lagauwageluk, ”Yigini'mo yoma ninabire,” iluk Allah yagatukwa andi nen he, At Tuhan nen, it ap o ineil penesi lagaukwa mene omanogo ou inoba fesikhemo inebe wa'lagaukwa.

³⁸ It ap inebe 12 nen ineil penesi lagaukwa mene andi mondok felelenghogo wa'lagaukwama, we, Nun amlogo Yosua inom, Yefune amlogo Kaleb inom, it emberek enek ineluk herakfisasikhe.

Afuni o andoma mene mugusogo wulakfisouwogeluk attak-attak walhasukwa wene

³⁹ At Musa nen he, ”Nineisena Tuhan nen yi'nogo hilinghinabigin ikhe,” iluk afuni Israel mene a'nogo yagaisasikhemo, inendawimo mondok weak agaukwasik le agu mondok welagaukwa.

⁴⁰ A'nogo welagaukwasik, ohealekwe huberat siakhogo re, tom unggul punu ebeba lagauwogeluk yi mene ti mene tegelogo fesukwasik, Musa mel yagatukwa: ”Nit weak eberogoat hilingitoma aro. A'nogo meneat he, nit yogondak nineisena Tuhan o abok yaganisikheba andoma louwogeluk hilingiti lago,” iluk yagatukwa.

⁴¹ A'nogo yagatukwama, at Musa nen it mel yagaisasikhe: ”Hit yogondak he, nineisena Tuhan nen, hit yi'nogo hilingi'no iluk yagahisikhe mene a'nogo nenahalok ane sagalogo hilingisuogeluk egep. Hiren anggegep mene andi hiling lasigin mondok lego.

⁴² Ma re, hit logoin mondok lego. At Tuhan hit hinom logoin mondok lek andi nen he, hit andoma lagunem hinaselei mene nen mabenet hinobagambik hinoasugun o.

⁴³ Hit hinebe afuni Amalek mene inom, Kanaan mene inom, inelokhoma asi lambik, hinom weim yafunem, hit hinoasumo wa'lasugun o. Hiren nineisena Tuhan ane hologo hilingisu hinabit andi nen he, at ebe hinom logoin mondok lego,” iluk yagaisasikhe.

⁴⁴ A'nogo yagaisasikhesik, at Musa ebe inom, Peti Wene Warogo nineisena Tuhan nen wo'ninafikhe iluk hilingik welagaikhe a'nogo inom, o su mene wuri'mo andoma herakfisaluk wulibi wagi'lek werek kwelek meneat he, it afuni Israel mene omanogo tom oba a'nogo lagauwogeluk mondok ninghogo isukwaat.

⁴⁵ A'nogo isukwasik lagagunem, afuni Amalek mene inom, Kanaan mene inom, o andoma welagaukwa mene nen, it afuni Israel mene omanogo mabenetfisaluk inoarik-inoarik o enu Horma andoma fisa wagaukwa.