BILANGAN 13 - Allah Wene Fano Wene Hupla Inane

Musa nen, ap inebe 12 mene ineil penesi loageluk lakfisasikhe wene

¹ Tuhan nen he Musa mel yagatikhe:

² ”Afuni Israel mene inunggulenu lombok inogogwi misiktek ya kwigik, ta kwigik, o Kanaan An nen wokhisagain oba andoma ineil penesi loageluk lakfisano o,” iluk yagatikhe.

^3-15 A'nogo yagatikhemo At Allah nen isikhe mene a'nogo higithogo Musa nen o Paran leimo andoma logolik lakfisasikhe. Ap inebe andem mondogat he, it afuni Israel mene inogogwi kaindek inanggele'ma ferinarek logolik wene lenggalinafi lagaukwa mene nek lakfisasikhe: Inunggulenu lenggalinafi lagaukwa mene, Ruben mene Syamua hun Zakur amlogo Simeon mene Safat hun Hori amlogo Yehuda mene Kaleb hun Yefune amlogo Iskhar mene Yigal hun Yusuf amlogo Efraim mene Hosea hun Nun amlogo Benyamin mene Palti hun Rafu amlogo Zebulon mene Gadiel hun Sodi amlogo Manasye mene Gadi hun Susi amlogo Dan mene Amiel hun Gemali amlogo Asyer mene Setur hun Mikhael amlogo Naftali mene Nahbi hun Wofsi amlogo Gad mene Guel hun Makhi amlogo.

¹⁶ It ap at Musa nen o andi ineil penerik loageluk lakfisasikhe mene re inebe andem. Hosea hun Nun amlogo andi re Musa nen enu agamhogo ket mene Yosua salhikhe.

¹⁷ At Musa nen it andi lani iluk miminginafi logolik he, it inoba wene yi'nogo fesikhe, ”O abel utara fikhit andoma lambik he, andoma nen o Kanaan kweang oba abel selatan fikhit lano, lambik andoma nen hiling-hiling he tomkwe fikhit andomaba lano.

¹⁸ Lambik he, o kweang andomaba ningginik logogin iluk hineil furatik, afuni o andoma welagaikharek mene inebe hokhorogo werega, athe endebengge werega, nen it inomame werega lega, iluk hineil wanino.

¹⁹ Andi nen o kweang andoma re fano a, weaga, nen afuni o desa-desa welagaikharekwe andoma wogole'ma werega, athe o kota-kota andoma leget waganogo kwelabega iluk fanorogo hineil kogolino.

²⁰ Hinendawinggen hambuget hambik kweang he mulirega, e hokhorogo wilibiga, iluk fura'no. A'nogo fura'luk he e wulibik mene andoma enggen ugu mene ekhe palogo waluk wesugun mene hinonggorasu fuk. Andem oba re anggur enggen iterek mene eroratunem.

²¹ A'nogo yagaisasikhemo it ap a'nogo lagaukwasik he, utara fikhit andoma nen o kweang a'nogo ineil penerik he o Zin leikwe nen abel selatan fikhit en he abel ambolkwe utara fikhit o kota Rehob huli, ebekhe o Hamat lagaikharek oba horokhogo andomaba lagaukwa.

²² Attak-attak he it inebe o kweang andi nen abel selatan fikhit andoma lagaukwasik he o kota Hebron afuni Ahiman mene inom, Sesai mene inom, Talmai mene inom, hun Enak ambisangma mene andoma were'ma asi lagaukwa. O kota Hebron andi re o Zoan Mesir oba a'nogo oan wuti'lek logolik, o andi wutu kwelek 7 tahun nen hilingitukwa.

²³ A'nogo asi lagaukwasik he, it a'nogo o Eskol tonggoma andoma asi lagaukwa. Andemen he iren anggur omolo misik ekhe enggin mondok hokho mene palogo wanhukwasik ap inebe pire mene e yerogo waluk wagaukwa. Iren he e delima enggen fena inom ara enggen fena inom ogo waluk wagaukwaat.

²⁴ It ap Israel mene nen anggur enggen paluk wagaukwa andi nen he o andem enu re Eskol Tonggoma ikhi lagaukwa.

²⁵ At Musa nen a'nogo lakfisasikhemo lagaukwasik o andoma ineil penerik nugu kwelek 40 hari welagaukwasigen inambotkwe wagaukwa.

²⁶ Wagaukwasik he, it Musa inom, Harun inom, afuni Israel mene inebe mondogat inom, o afuni le'ma Paran leimo o enu Kades andoma inebe andogorek were'ma inoba wagaukwasik he, ”Yi'nogo hogo, ti'nogo hogo,” iluk yagaisigik, e enggen palogo waluk wagaukwa mene omanogo inugisigik, isukwa.

²⁷ A'nogo yagaisasukwasik, Musa mel yagatukwa: ”Nit he, o andoma mondogat nineil penogo tukhumet fogo mene re, kweang mondok muli fanoma yi mene ti mene enggen mondok hokhorogo itere'ma hogosik he, enggen endebat ekhe paliluk wago mene re, yoma o.

²⁸ A'nogo meneat he, it afuni o andoma welagaikharek mene inebe re, inomame hokho mene nek were'ma isogo. Nen inawi kota re, mondok hokhondek hilingi'mo re, helep pa'leget waganogo kwelabe'ma hogo. Nen, inebe inobakhe re, mondok hokhondek inoakhuse uandek mene nen tagongge mene were'ma isogoat.

²⁹ Afuni inunggulenu Amalek mene inaiba re, i ambut mo selatan fikhit andoma were'ma isogo. Nen, afuni inunggulenu Het mene inom, Yebus mene inom, Amori mene inom, inaiba re tom oba era'lukwe wuthigik welagaikhare'ma o. A'nogo werek kwelek it afuni inunggulenu Kanaan mene nek he, i laut yenggelek esanggokwe mondogat inom, i Yordan aik fena-fena elesi ambut mondogat inom, it mondok welagaikhare'ma isogo,” iluk yagatukwa.

³⁰ A'nogo yagatukwama, it afuni ekhe nen he, ”Ninggi'nogo hilingisugun, nailo e,” iluk, Musa oba wene palogo yagati lagaukwa mene andi inendawinggen hambuk uageluk, at Kaleb en mel yagaisasikhe: ”Hinailo lek. Nit afuni o andoma mene mabenet fisouwogeluk ninomame elok welago andi nen, yogondak yaat inoasi lambik, inebe mugusogo wulakfisambik he, o andoma nit arat sebeli louwogo,” iluk yagaisasikhe.

³¹ A'nogo yagaisasikhe meneat he, it ap at Kaleb inom ineil penesi lagaukwasik wagaukwa mene omanogo nen he, mel isukwa: ”Nit ninomame lek mene re, it afuni andoma welagaikharek mene inomame mondok hokhore'ma isogongge a'nogo re, niren inoasi logoin mondok elo'lego,” iluk isukwa.

³² A'nogo iluk, afuni Israel mene were'ma kwi lagaukwasik, o ineil penetukwa mene omanogo faget ineranen wene ekhe inom lalogo yagaisilik nikhi logolik mel yagaisasukwa: ”Afuni o andoma mene inobakhe mondok hokhondek mene nineilenggen isogo. Mene re, afuni ekhe kugunem herakfisogoin mondok lek andi nen, nit mondok wenalu asugun o.

³³ Afuni inunggulenu Enak mene nen tago mene andoma re, inebe hokhondek inoakhuse uandek enek nineilenggen isogo, nailo e. Nit ninebe it ninom walhamo re, nit ninebe pulue hangge anggogo. Nen, iren ogo re, nit faget a'nogoat anggagarek,” iluk ineranen wene lalogo yagaisasukwa.