BILANGAN 12 - Allah Wene Fano Wene Hupla Inane

Allah nen ou inailo mene Miryam oba fesikhe wene

¹ Attagat Musa agwe o Kus mene helasikhe andi nen oba lisin, at Miryam Harun emberegen Musa abok weak ikhi logolik,

² ”Allah nen Musa nek wene yagatunem afuni yagaisasikhe nogo? Nit yaganisasikhemo yagaisasuguat anggigi,” iluk isukwama, wene isukwa mene andi At Tuhan esanggo holhikhe.

³ At Musa andi obabut he, afuni kweangma yoma welagaikharek mene mondogat inom higitsek lek. It ekhe inobabut fetaksek hangge meneat he, arenek he obabut mondok sebelek agun welagaikhe.

⁴ A'nogo were'ma ferekhogo aremnogoat, At Tuhan nen Musa inom, Harun inom, Miryam inom, mel yagaisasikhe: ”Hit hinebe henaganat An nawi su mene wuri'mo we'ni,” iluk yagaisasikhemo lagaukwa.

⁵ Lagaukwama, At Tuhan ebe ohena e higit mendek a'nogo anggele'ma pi wagaikhe. A'nogo pi wagaikhesik, o at awi su mene wuri'mo a'nogo kweba mendek logolik, Harun Miryam emberek wolisasikhemo, siakhogo oba lagaukwama,

⁶ mel yagaisasikhe: ”An nen wene yagahisagain yi hinesanggo holini o. Ap hit mene nen An nane yagaisagarek mene were'ma, An hineisena Tuhan nebe inabikanggoba inelokhoma menlagik, wene inabiba yagaisigik, igirego.

⁷ A'nogo meneat he, An namingmingengge Musa nek he, An nagainafuri mondogat inanggele'ma logolik obabut mondok hombunsek andi nen he, a'nogo yagatirek lek.

⁸ We, at Musa andi nemberek wene ninelhaba lakfigik-wakfigik ikhi logolik, wene hinagaisogo igi'lek, pakhogo yagatunem, nebe eilenggen niikherego. Hiren hinailo legengge An namingmingengge Musa andi oba wene fikhi lagep andi nenahalok,” iluk wenagisasikhe.

⁹ Andi iluk Tuhan nen it inebe pire aremnogo inoba wenagisasikhesik, At ebe lagasikhe.

¹⁰ Ohena a'nogo Tuhan Awi Sabumo nen herakfuluk lagu kwelek aremnogo re he Miriam ebene oumo mondok weak mene saga isikhe, nen agap ebene re elokhe kapas hangge kut mondok hilinglagaikhe. At Harun elokhe hebekhogo, he Miriam a'nogo kwelakhasikhe re ebene mondok oumo saga isikhemo hasikhe.

¹¹ Arigini'mo hasikhesik aren Musa yagati logolik, ”Ninoe nit lebetnisano, nit ninendawi kembu nen hilingito mene andi, weak hilingitoma re, nit hilingito mene andiba ninoba ou-pou mene andoma hilingfisoageluk herakfisagun o.

¹² Herakfisamo at andi omalik ket ta'laga logolik eino fena fikhit fili agunemen waregengge ta'lagarek a'nogo hakhogo asuageluk herak fisagun,” iluk yagatikhe.

¹³ A'nogo yagatikhemo Musa nen Tuhan oba yagati logolik, ”Neisena Allah at ebe Haren fano hilingisino,” iluk yagatikhe.

¹⁴ Yagatikhemo Tuhan nen onggo ikhi logolik he, ”Eisena nen elokhonggen oba wesibak sup helep halok he, linggene sabiren andem oba at enggalirogo logoilep lega? At ebe o Sabu salek oba andoma nen ale'ma logouwageluk wulak fisano. Nen andi mondogat hilingfuluk enek he at nekhengge kwi wesigin fano,” iluk yagatikhe.

¹⁵ A'nogo isikhemo re, at Miriam a'nogo waganogo enda'ma linggene sabiren logouwageluk wulak fisa lagaukwa. Nen it afuni a'nogo re o omanogo nen waganogo ale'ma lagi'legengge werek kwelek enek, he Miryam a'nogo nekhengge o sabumo omanogo kwi wesu higit agaikhe.

¹⁶ A'nogo hilingitukwasik enek he it a'nogo o Hazerot herakfuluk he, o Paran leimo andoma inawi sabu wusi lagaukwa.