BILANGAN 11 - Allah Wene Fano Wene Hupla Inane

O Tabera andoma nen hilingitukwa wene

¹ Inenggi ekhe sambul he, afuni Israel mene inoba enggin-fenggin hikhi lagaukwa mene omanogo faget he, ”Yigini'mo logou ninabire,” iluk Tuhan oba limamit falhukwa. A'nogo falhukwama esanggo holhikhesik he, a'mage hokhorogo lagasikhesik, endu inoba lakfei wagaikhe. A'nogo lakfei wagaikhemo, inanggele'ma amulok kulung-kalanghogo ninggi logolik, it inawi tenda wurik omanogo abel fenakwe felelenghogo nasikhe.

² A'nogo nasikhemo it afuni omanogo nen, inane ngai-wai ikhi logolik, ”Musa, telninabin o,” iluk yagatukwa. A'nogo yagatukwama, at Musa nen samban Tuhan oba isikhemo, endu a'nogo nagulagaikhe.

³ O andoma Tuhan agandou it inanggele'ma nen yelang-melang nasikhe andi nen o andoma enu Tabera salhukwa andi.

Musa nen afuni Israel mene inogogwi logouwageluk inebe 70 nen heragaisogo menfisasikhe wene

⁴ Afuni Israel mene wagaukwa andi re, afuni pok mene agore inom wagaukwaat. It ap pok mene andi wam nele mondok agaikhemo, it afuni Israel mene inomen, ”Eige. Nabire, nit wam ekhe nelo e.” iluk ikhi logolik, mel isukwa:

⁵ ”Nit o Mesir logolik he, ikan onggo palhi'lek weat helaluk ninggi logolik, kulu inom, hobut hangge enu semangga enggen inom, bawang hangge enu perei inom, bawang merah mene inom, bawang putih mene inom, ninggi lagagu omanogo ninendawimo ebethikhi logo agi.

⁶ Yogondak he, sumburu yi mene ti mene ekhe ninggi'lek, we, manna nek ninggi lago andi nen ninomame mondok lek aga yi,” iluk isukwa.

⁷ Sumburu manna andi ebe re, e enggen migindik-magendek mene hangge elokhe re, mola meneba nen endep pemea hangge.

^8-9 Sumburu manna andi pi we'luk, o hubanggo lilengge inom afuni Israel mene inawi su mene wuri'mo andoma pi waga lagaikhe. A'nogo pi wagunem he, hubet-habet he afuni Israel mene inebe lagik-wagik andogorogo re, sagalogo wul hakhogo enu tepung hilingisogo fuluk kue hombonu menere sabiarogo werati lagaukwa. Enduk he, kue e zaitun enggen amusuba werago mene hangge.

¹⁰ Afuni Israel mene inawi su mene wuri'mo omanogo kwebene ya logalek ta logalek mendek logolik he, ”Yigini'mo yoma logou ninabire,” iluk Allah inendawimo seramet fuluk limamit falhunem at Tuhan a'makwe het-pet isikhemo re Musa endawinggen mondok heiselhikhe.

¹¹ Endawinggen a'nogo heiselhikhesik he, Tuhan mel yagatikhe: ”Haren an nenahalok nendawimo yi'nogo weaget nafi lagen? Hat an nebe habiren hilingnafi lagen a? Afuni inebe mondogat andi faget an nen hilingiti logouwageluk nenggiba fegen andi nenahalok?

¹² An nen it inebe na'ma agarik, taginafi nogo? Haren he, afuni omalik kwalogo woginarek nikharek andi hak, it andi an nen woginarek o inambu inombalak wogisagaluk wene warisasigin oba andomaat loagaluk, yaganeten andi nenahalok?

¹³ Iren, wam wo'nisan, iluk limamit falhu mondok werek andi heilenggen isan o. It afuni mondogat andi faget an wam koma mene heragisagain nogo?

¹⁴ An nen it faget halinafi logou re, enggin mondok hilingi'mo re, elo'lego.

¹⁵ Haren, an noba a'nogo nek hilingnafi logou fugo, hendawit nabin. An noba enggin-fenggin hilingnafi lagen andi, noba selek asuageluk, nebe hendawit nabimbik weak-weagat noasumo fano o,” iluk wenagetikhe.

¹⁶ A'nogo wenageti lagaikhemo, At Tuhan nen Musa mel yagatikhe: ”Afuni Israel mene inebe inaluendek halok, afuni nen he, it andem he, ninogogwi logolik hilingiti logogun inobabut higit, iluk anggagarek mene halok inebe 70 nen andogorogo fisan o. Fisambik he, An neilhanem woginarek nawi su mene wuri'mo fisa we'luk he, hat hera'lu menlasuageluk yagaisano.

¹⁷ A'nogo hilingiten halok, An nebe pi wesimbik he, andemen wene ane yagahetik, An nomame hat wokheti a'nogo mene ekhe it andi wogisigik, igin o. A'nogo wogisamo, afuni yi faget hat hamunek he, hoba engginhogo hilingiti logogin lek. We, iren lebethiikhi logogun o.

¹⁸ Yogondak, haren afuni andi wene mel yagaisan: Hinebe ohealek faget tegelani o. Hit wam nele nen le aga logolik, ninabire. O Mesir fano welagagu mene, iluk ikhi lagep andi, An Hineisena Tuhan hinane nesanggo holhirik, ohealek hit nogoin mene eino werek mene ekhe wokhisugunem nogoin o.

¹⁹ Wokhisugunem ninggi logogun andi, hinenggi misigat oba legat, pireba legat, fuap oba legat, nomoloba legat, sirek fena nen ogo legat.

²⁰ We, tugi misik inukhogo ninggi logogun o. A'nogo nunggu mondok logombik wurep oba re, hinoba ou agik, hebak wutik, ikhi logogun o. A'nogo hilingisugun andi re, An Hineisena Tuhan nebe hinanggele'ma welagi mene andi herak nobagegepsik, ninaiba Mesir herakfisaluk wago andi ninabire, iluk oba ebeti logolik neilhanem le aga lagep andi nen aro, iluk ikhe, yagaisano,” iluk yagatikhe.

²¹ A'nogo yagatikhemo, at Musa nen Tuhan mel yagatikhe: ”Afuni an nen woginarek waga lagi yoma inebe lambukhogo re, 600.000 nen werego. Inebe hokhorogo a'nogo meneat he, haren he, An nen nunggungge eino werek mene ekhe wogisagain o. Higithogo wogisamo tugi misigat oba elok ninggi logogun, iluk egen andi ninggi'nogo nen egen?

²² Wam sapi inom, domba inom, ebe hokhorogo it warogo weragaisogo inalabut ninghogo nogoin mene ebe koma werek. Ikan i laut yenggele'ma welagarek mene andi mondogat waganogo it wogisamo elok nogoin anggegen a?” iluk yagatikhe.

²³ A'nogo yagatikhemo, At nineisena Tuhan nen onggo yagati logolik: ”An nomame we endebat anggikhi lagen a? An nen yagaheti andi eberogo weak-weagat hilinglasigin a? Lega. Ebe hilinglagunemen heilenggen hagain o,” iluk yagatikhe.

²⁴ A'nogo yagatikhemo, at Musa ebe wulifikhesik, wene Tuhan nen yagatikhe mene andi, it afuni Israel mene yagaisa lagaikhe. A'nogo yagaisasikhesik, afuni Israel mene inogogwi inebe 70 nen omanogo andogorogo fisasikhesik he, ”Tuhan awi su mene wuri'mo a'nogo era'lukwe yiling-waling mendek logoni,” iluk yagaisasikhe.

²⁵ A'nogo yagaisasikhemo, Tuhan ebe ohena anggele'ma pi wagaikhesik he, wene yagatikhe. Yagati logolik, Musa ayonggo fesikhesik omame wogotikhe andi mene ekhe ambotkwe waganogo it afuni Israel mene inogogwi inebe 70 nen omanogo wogisasikheat. A'nogo wogisasikhemo, Tuhan Areagun it inoba pelakfei wagaikhemo re, it inane ap Allah ane yagaisagarek mene nen hokhorogo agarek andi hak isukwa meneat he, aninurogo welagi'lek.

²⁶ A'nogo iluk, it afuni Israel mene inogogwi ap inebe 70 nen andi mene inebe pire, ekhe inenu re, Eldad, nen ekhe re, enu Medad, emberek it inagaila'lak inom Tuhan awi su mene wuri'mo a'nogo lagi'lek, inaiba o su mene wuri'mo andoma kamo isukwasik welagaukwa. A'nogo were'ma Allah nen Areagun inoba pelakfei wagaikhemo, it emberek inane hokhorogo ap Allah ane yagaisagarek mene nen agarek andi hak isukwaat.

²⁷ A'nogo isukwa meneat he, ap alage mene misik ekhe nek he Musa oba lagaikhesik, mel yagatikhe: ”It ap Eldad inom, Medad inomen, yi'nogo ili'lagwi,” iluk yagatikhe.

²⁸ A'nogo yagatunem at Yosua ap Nun amlogo ebe alageba nenat Musa lebethikhi lagaikhe mene andi nen esanggo holhikhesik, Musa mel yagatikhe: ”Noe, iren a'nogo ili'lagwi andi kamo uageluk wenagisano o,” iluk yagatikhe.

²⁹ A'nogo yagatikhemo re, at Musa nen he, ”Haren he, at enek ikhi logouwak, iluk noba ebeti lagen andi nenahalok. An nendawimo nen he, nineisena Tuhan Areagun againafuri inebe mondogat wogisaluk he, inebe mondogat at ane yagaisikhi logogun mene nek hilingisogo fiselebe, iluk anggikhi lagi o,” iluk yagatikhe.

³⁰ A'nogo yaga'luk he, at Musa afuni Israel mene inogogwi ap inebe 70 nen omanogo inom inambotkwe o su mene wuri'mo wagaukwa.

Tuhan nen sue yomalmal hangge mene enu puyuh lakfei wagaikhe wene

³¹ A'nogo isukwama, Tuhan nen he, sogoi i laut yenggele'ma higiren lakfei wagaikhemo funha waga logolik he, sue yomalmal hangge enu puyuh andi mene waluk wagaikhemo, kweang oba higit-higit ayogouk satu meter hangge mondok seberogoat funhigik sebeli wagaikhe. Waga logolik, o su mene wurikwe omanogo nen lambulik-lambulik he, era'lukwe mondok yatkweat lambuli wagaikhe.

³² A'nogo lambuli wagaikhemo re, afuni omanogo inendawimo inagaiyek oba o andi sambul inukhogo watik, andogotik, hup inukhogo watik, ohealekwe lingge tomok watik, isukwa. Afuni inebe lombok he, sue enggin 1.000 kilo hangge andogotukwa. A'nogo andogotukwasik, o su mene wuri'mo andoma era'lukwe yiling-waling esi palogo iringlasuageluk let filik lagaukwa.

³³ Sue ebe nunggu kwelegat mondok hokhorogo oba saluk sik-pik isikhemo Tuhan a'mage afuni omanogo inoba fesikhesik, ou wia ou weak mene inoba lakfei wagaikhe.

³⁴ A'nogo inoba lakfei wagaikhemo, inebe hokhorogo wa'lagaukwama re, kweangma salinafukwa. A'nogo hilingitukwa andiba re, o andoma Nunggu Mondok Were'ma Wa'lagaukwaba, iluk, enu Kibrot-Taawa salhukwa.

³⁵ A'nogo hilingi'luk, afuni omanogo o andoma nen he, o enu Hazerot wagaukwasik inawi su mene andoma wutukwa.