BILANGAN 10 - Allah Wene Fano Wene Hupla Inane

Perak meneba trompet hilingitukwa wene

¹ Tuhan nen Musaba yagati logolik,

² ”Trompet tombouwe ane hangge mene ebe pirerogo no perak meneba nek sagalogo hilingisugun mene andem he, afuni kabogesi wesuageluk wolinafik, wilibi loageluk miminginafik, ugu mene faget hilingi'no.

³ Ebe pirenet andem oba ane uanhogo futhugu halok he, afuni inebe hat hera'lukwe walingisogo An Nawi Sabumo solombonma andoma andogosi waga logoino.

⁴ Nen, we misik mene futhugu halok andi re it ap inogogwi kaindek mene omanogo nek hat hebe walingisogo kabogosi waga logogun.

⁵ Nen, trompet tombouwe hangge andi ane horokhogo futhugu halok he, it ap mo ero fikhit o sabu salogo werek mene andoma wilipluk loageluk futhikhi logogun.

⁶ Nen, ane pirenek mene horokhogo futhugu halok he, it ap inunggulenu selatan fikhit werek mene wulipluk loageluk futhikhi logogun. Nen ekhe ane horok-horogen ugu mene andoma re, it Allah againafuri wulipluk loageluk,

⁷ nen ane uanhogo futhugu halok he, afuni holhu mene kabogesi wesuageluk fut hikhi logogun.

⁸ Trompet andoma futhikhi logogun mene re it imam hun Harun amlogomi omanogo nen enek futhikhi logogun. Andi re wene melalek werek higithogo hilingiti logolik hundik-handik hilingitu mondok logogun.

⁹ Nen, hiren hinanggweang oba were'ma it hinaselei mene nen hinom weim yabi wagunem hiren hinanggweang ili waganogo hinom weim yafi logolik he trompet tombouwe hangge andoma futhikhi logogun. A'nogo hilingiti logogun oba re An hineisena Tuhan Allah a'nogo nen hinaselei mene inenggiba nen lebethinafik, telhinafik hilingiti logogin.

¹⁰ Andi nen ekhe sambul hit hinagaiyegen hilingisugun oba inom, tugi ket meneba seni isatik, nen linggene amu-amu sambul omanogo fogeratik, hilingiti logolik andoma inom, hiren wam warogo nolnesi waga logolik inom, nen wam lambulogo fisugu mene faget nolneti logolik inom he, trompet tombouwe ane hangge mene andi futhikhi logoino. Andiba re An nen hit lebethisikhi logogin. Hit hineisena Tuhan Allah re Anaro, iluk yagatikhe.

Afuni Israel mene wulipluk lagaukwa wene

¹¹ Tahun pirenek meneba it afuni inunggulenu Israel mene o Mesir herakfuluk wulibi wagaukwasik he, tugi pirenek meneba tanggal dua puluh werek kwelek he, ohena a'nogo o Tuhan Awi Sabumo tum oba nen lagasikhe.

¹² A'nogo lagasikhemo re, it afuni Israel mene inebe hilingik higithogo attak mene nen he wurep kobokhogo mene huli laga logolik he, o Sinai leimo omanogo herakfuluk lagaukwa, Nen ohena a'nogo re it afuni omanogo o Paran leimo asi wagaukwa hak he o andoma kamo isikhe.

¹³ Tuhan nen wene melalogo Musa ba yagatikhe higithogo attak-attak wulipluk lagaukwa mene re andi.

¹⁴ Fem attak-attak he, it ap Yehuda a'ma andogorek mene esa logalek omanogo tak tendelogo ekhe lagik-ekhe lagik lagunem he, hun Aminadab amlogo Nahason andi re it inunggulenu Yehuda mene omanogo inoe kain logolik halinafi lagaikhe.

¹⁵ Nen, hun Zuar amlogo Nataneel en he it inunggulenu Isakhar mene esa logalek omanogo inoe kain logolik halinafi lagaikhe.

¹⁶ Nen hun Helon amlogo Eliap andi nen he it inunggulenu Zebulon mene esa logalek omanogo inoe kain logolik halinafi lagaikhe.

¹⁷ Andi nen Tuhan Awi Sabu wurik a'nogo meisalfuluk he, it inunggulenu Gerson mene inom, Merari mene inomen o Sabu a'nogo ha'luk laga lagaukwa.

¹⁸ Nen ombo'ne re it Ruben a'ma werek mene omanogo, esa tendelogo ekhe lagik-ekhe lagik laga lagaukwa. Nen hun Syedeur amlogo Elizur en he it inunggulenu Ruben mene omanogo inoe kain logolik halinafi lagaikhe.

¹⁹ Hun Zurisyadai amlogo Selumiel andi nen he it inunggulenu Simion mene logalek a'nogo halinabik laga lagaikhe.

²⁰ Nen hun Rehuel amlogo Elyasaf andi nen he it inunggulenu Gad mene esa a'nogo halinabik laga lagaikhe.

²¹ Andi mondogat lagunem he, it ap Kehat mene re yi mene ti mene horek mene omanogo ha'luk laga lagaukwa. Nen it omanogo o sabu wusugun oba asi laluk halok he, o Tuhan Awi Sabu a'nogo tak wutfikhi lagaukwa.

²² Andi nen it inombo'ne re Efraim a'ma werek mene esa logalek omanogo tendelogo ekhe lagik-ekhe lagik inangge bendera liagaisogo lagunem he, hun Amihud amlogo Elisama andi nen it inunggulenu Efraim mene logalek omanogo halinabik laga lagaikhe.

²³ Nen hun Pedazur amlogo Gamaliel a'nogo nen he it inunggulenu Menasye mene logalek a'nogo halinabik laga lagaikhe,

²⁴ nen hun Gideoni amlogo Abidan nen he it inunggulenu Benyamin mene logalek a'nogo halinabik laga lagaikhe.

²⁵ Andi nen wurep kobokhogo re, it Dan a'ma werek mene omanogo esa tendelogo ekhe lagik-ekhe lagik inangge bendera liagaisogo waluk laga lagaukwa. It andi re esa hokhorogo lagaukwa mene omanogo inombo'ne hobuk agun fangerik laga lagaukwa mene re andi. Nen hun Amisyadai amlogo Ahiezer andi nen he it Dan mene esa logalek andi halinabik laga lagaikhe.

²⁶ Nen hun Okhran amlogo Begiel andi nen he it inunggulenu Asyer mene logalek a'nogo halinabik laga lagaikhe.

²⁷ Nen hun Enan amlogo Ahira andi nen he it inunggulenu Naftali mene esa logalek andi halinabik laga lagaikhe.

²⁸ It afuni Israel mene esa logalhigik ambisangma lagaukwa huli nen wurep kobokhogo lagaukwa mene re andi.

²⁹ Musa nen ombasi Hobab hun Rehuel amlogo o Midian mene a'nogoba ikhi logolik he, ”Nit he At Tuhan nen kweang hit wokhisagain iluk isikheba andoma logoino. Tuhan nen he it afuni Israel mene faget fano mene nek abok yagaisasikhe. Yagaisasikhemo re, niren hat hoba fanothobagagun enggere, ninom louwogo,” iluk yagatikhe.

³⁰ Andi yagatikhemo at Hobab en onggo ikhi logolik he, ”Nombasi fano yaganeten, oba nen an he nambotkwe nawi eroma lagain o,” iluk yagatikhe.

³¹ A'nogo yagatikhemo at Musa nen he, ”Hat nit ninobagaluk lagain lego, o leimo yoma nit o sabu wurik logoin kwere hat mondok helure'ma, nit ninobaget kwe wo'nisugu mene re hat asigin.

³² Nen hat nit ninom logoin halok, Tuhan nen nit ninobaget ekhe mene? ekhe mene fanotninobagakhi logogin mene andoma re, niren ogo hat hobaget hilinghobagakhi logogun aro,” iluk yagatikhe.

Afuni inunggulenu Israel mene wulipluk lagaukwa wene

³³ It afuni Israel mene nineisena Tuhan andom Sinai a'nogoba nen herakfisaluk inenggi henagan oba wagaukwa. A'nogo waga logolik, it inawi su mene wusugun oba obalik herasuogeluk peti Allah nen wene warogo wo'ninafikhe iluk hilingik a'nogo tak waluk waga lagaukwa.

³⁴ It omanogo inawi su meneba wurogo werek oba omanogo nen wesuogeluk wagunem he, o linggene re, ohena Tuhan ebe werek oba a'nogo it inunggulmo higithogo welagaikhe.

³⁵ Peti Allah nen wene warogo wo'ninafikhe iluk hilingik mene a'nogo waluk wesuogeluk halok at Musa nen ikhi logolik he, ”Tuhan nineisena Hebe menlame o! Mendek logolik he, afuni hat haselei mene hebe inabit mene andi heise pugulasuageluk mugisikhi logoin o,” iluk yagati lagaikhe.

³⁶ Nen, peti Allah nen wene warogo wo'ninafikhe iluk hilingik mene a'nogo waluk he, o wusugun oba fei wagu halok he, at Musa nen Tuhan mel yagati lagaikheat, ”Tuhan neisena, nit afuni Israel mene ninagainafuri ninom ninebe mondok hokhorogo inenggi wenasu elo'lek yoma ninoba louk ime o, neisena,” iluk yagati lagaikhe.