AYUB 9 - Allah Wene Fano Wene Hupla Inane

At Ayub en onggo isikhe wene

^1-2 A'nogo isikhemo re, at Ayub en onggo ikhi logolik he, ”Eberogo, haren ikhi lagen andi re heranhogo wene ikhi lagen lek, andoma mondogat he an nelu welagi. Oba nen he, Allah elokhoma afuni fano hilingitarek mene ekhe werek nogo?

³ At Allah nen wene enggi seribu nen hakhogo heinok wogisamo nen, afuni nen heinok wene andem misik-masik iluk ogo ekhe onggo u lek hak.

⁴ At Allah andi re hebelek mondok logolik along werek agun hilingi'mo re, ap sa hagen, At ane sagalogo fulugen eluk mondok logou hak nogo?

⁵ Afuni inonggot werek kwelek At Allah nen enek o tom oma hambokhogo ale'ma fei laluk, a'mageba enden-fenden isikherek.

⁶ At Allah nen enek o lugul langet hugunem kweang abolok mondok ikherek, kweang ari a'ma tik warogo liabek were'ma legeisogo werek mene a'nogo mondok abolok ikherek.

⁷ At Allah nen hubet mo liabi wesigin lek iluk ili u hagat, nen hesagalenggen o hubanggo ombak-bak esugun lek iluk kwe palu hagat.

⁸ At amu nen enek pogot selekwe tiaganhogo fesikhesik, kisu naga i laut elema welagarek mene a'nogo eisogen tandamhogo fesikhe.

⁹ Aren enek hesagal enggen huli warogo selatan fikhit logogin mene figik, hesagal enu Biduk inom, Belantik inom, Kartika inom andoma figik, hilingitikhe andi.

¹⁰ Aren mondogat walhasikhe mene andoma re, mondok hokho-pokhorogo hilingi'mo re, wenasu re mondok elo'lek, Aren elalin mene mondok alonghogo hilingitikhe mene andoma niren mondok higithogo wenasu re elo'lek.

¹¹ At ebe an nelokhekwe lagunem he, an neilenggen ha re elo'lek, At ebe an nera'lukwe lagunem he an neilenggenma re weinam asu lek hak.

¹² Aren telhunem he, ap sa nen ambong serogo At oba nangge iluk ili wanu hak nogo? Athe at heinok wokhikhi logolik, ”Ao, Hat he, ningginhi lagen,” iluk heinok wanu hak nogo?

¹³ At Allah a'mage lagaikherek mene inom, oba haro agarek mene inom andi re sebelha mondok elo'lek, At ekhe obabut mondok leget fakhikherek mene oba nen ogore Allah elok a'ma sebe u hak.

¹⁴ Arigini'mo re an higit he Allah ninom wene elok palu hak nogo? nen nane ninggi'nogo mene heragaisogo At oba onggo igi ha?

¹⁵ An weak hilingiti'lek oba nen ogore, an nen At oba nane ninghogo u lek hak, we At Allah an nawene katokhogo tegeterek mene andiba hendawi nean iluk enek he yagasu hak.

¹⁶ An nen At yagatunemen, At esanggo holiluk onggo yaganetuba nen ogore, An nen igi mene andi re eberogo At esanggo holhesik iluk nendawimo angga lek hak.

¹⁷ Aren wene yi'nogo ti'nogo lek kwelek oba nen enggin-fenggin ekhe inom noba fugunem, an nebe sogoi hokho mene anggele'ma al perelogo nobagaikhemo welagi.

¹⁸ Aren an eil misik set waloageluk hera'nobagali'lago mondok lek. Aren aleweak mene mondogat hil-halhogo noba fugunem welagi.

¹⁹ Nen ninebe ninomame hilingik welago mene inom wene katokhogo palhu mene inom andi re An ninom walhamo nen he, At enek he omame mondok hokhorek logolik, katokhogo hilingitu agun werek.

²⁰ An nen tiphogo nek hilingiti logolik weak ekhe hilingiti'lek iluk ikhi lagiba nen nambeba nen he agaumsek mene wulibi weri'lago. An nane igin iluk nambeba nen ikhi lagi mene andoma re, At Allah weaget fikhi logolik hakhogonek ikhi lagi.

^21-22 An weak hilingiti lek oba nen he, an nonggwarek nebe faget he wenggel hikhi lagi lek. An neluk yi faget he esin mene ekhe werek lek andi nen he, an neluk ekhe inom werek mene faget ebeti lagi lek. Afuni weak hilingitarek mene inom, fano hilingitarek mene inom andi re Allah elokhoma re higit enek hilingi'mo re Aren enek inebe pirenet mondogat legaphogo fisagain werego.

²³ Ap weak hilingiri'lagwi lek mene andi inebe ferekhogo wa'lagu halok he At Allah re we endo ari'lago.

²⁴ Kweang yi re At Allah nen it afuni kwanirogo hilingitarek mene inoba wogisasikhe, nen it ap wene katokhogo pilingitarek inap hakim omanogo re Aren ineilenggen pukhogo fisikhe. Nen At Allah nen hilingi'lep lek halok he, ap sa nen ekhe hilingi'lep anggegep?

²⁵ Linggene an neluk welagi yi re, afuni kwe funget hagarek hak ferekhogo nek lagunem he, we nagaiyek endep ekhe higi'le'ma longgo nek i lili'lago.

²⁶ Perahu i ambolebene kulunghogo lagarek hak, nebe neluk welagi mene yi re a'nogoat lili'lago, nen sue kuri nen paik herakfuluk sebeligin iluk toin pikherek hak hilingiri'lago.

^27-28 An nambenggutmo mumungisogo nagaiyegen endo aga logolik, ou-pou hikhi lagi mene omanogo nonggoret fagain iluk walhikhi lagiba nen he, nendawimo ou hikhi lagi mene a'nogo nekhengge an mu'narek weri'lago. At Allah nen, ”At weak hilingite, iluk an weagerogo nobagaikhe mene andi re an nelure'ma re a'nogo hilingnobagali'lago andi.

²⁹ Nen, an wene noba a'nogo nek fugu werek kwelek andi re ninggi'nogoluk elalinat wenggelhi logolik enek logogin nogo?

³⁰ An naweak hosuageluk he sabun ekhe werek lego!

³¹ At Allah nen he an a'nogo fesi ninuk amben weak meneba wula'laget niikhemo re an nonggwarek nasu laberek welagi meneba nen ogore, an na'ma aldo nabi'lago o.

³² We At Allah andi afuni higit logoumo re an nen at oba onggo yagasilesik he, nemberegat wene katukhogo pilingitarek oba omanogo nit ninom minggirik welago mene andi faget pilingisogo leget nisoageluk kwi lelo.

³³ Oba nen he, at hilingi'luk an hilingi'luk tulem andem he ap unggum pilingi'luk wene tegetu mene ekhe, hat weak hilingiten, hat fano hilingiten iluk yaganisa mene ekhe werek lek.

³⁴ We At Allah amu nen enek an unggum noba fugu aple herakfuluk he, Aren elo'lek mene noba fili'lago mene andoma waganogo yatma fei loak.

³⁵ An nonggwarek nendawimo mondok nelure'ma re, an nen At oba nane ugu aple faget he an nailo anggikhi lagi le'ma re, yogondak nane ikhi lagi yi.