AYUB 5 - Allah Wene Fano Wene Hupla Inane

¹ A'nogo yagatikhesik, ekhe mel yagatikhe: ”Andi nen he, Ayub noe. Haren onggo u mene ekhe werek halok he hane in he? Hat lebethabuageluk malaikat he sa ayonggo fegen ha?

² We ap mondok kembu mene nek he, inendawi ou ikhi la'luk wa'lagaikharek andi.

³ Ap kembu mene ekhe yi'nogo were'ma hasigi. Ap andi ebere omame mondok hokho agun welaga, oba nen he, aremnogoat an nen at ebe welagaba aremnogo homan potfisigimo re,

⁴ at againafuri omanogo re it ekhe nen telinabu lek hak hilingi'mo re; O wene pilingituba andoma nen wene it inoba mene pilingitunem he, it ekhe nen inebikhit a'luk leberisa re elo'lek hilingik welaga.

⁵ It ineabumo inangge yi mene ti mene yakfakhaluk enggen palogo fugu mene omanogo re, it ap inamburu ouwak inelokhoma hoporek mene nen inenggi abisak helaluk nunggu welagik, Nen gandum e alok agayo anggelekwe yago mene ogore, it ap sumburu nele mene andi nen felelenghogo nunggu welagik, ikhi logogun o. Nen, it inangge mene andoma inom, yi mene ti mene inenggi werekhogo werek mene andoma inom he, it ap, ninangge yi mene ti mene logoilebe, iluk anggili'lagwi mene andi nen ineilenggen lourek mondok logogun.

⁶ Wene weak mondok hilingitarek mene andi ero re o kweangma yoma nen weinam ari'lago re lek, kweang elema yoma nen weinam ari'lago re legat.

⁷ Lego! We, endu enggen talelogo inoba lagarek andi hak, afuni ta'lagaikharesik oba nen yi weak ti weak andi inoba agarego.

⁸ Hat hoba hilinglaga mene ari, an noba hak hilingla'lepma re, an nane hokhorogo Allah yagati logolik, wene noba mene andi at Allah enggiba horogo feile o.

⁹ At Allah nen, elalin mene mondok hokhorogo hilingiri'lago mene andi, niren futfigik, ninenggi wenatik, u re mondok elo'lek. At Omame hokho meneba hilingiri'lago mene andoma re mondok hokho-pokhorogo hilingi'mo re legasu lek hak.

¹⁰ Aren enek meiso kweangma pelabi wagunem, yabukwe inom, o leikwe inom sakhorarik lagarek.

¹¹ At Allah nen he, afuni sebelek mene legeisogo fisigik, inendawimo weak were'ma, fanorinafik, ikherek.

^12-13 Aren, afuni inendawimo kagalogo lalinafarek mene andi inebe fakfisigik, iren, Yi'nogo hilingisugun iluk, agarek mene sugit fisigik, ugunem he, it anggagarek mene sugi agik, it inendawimo ebetharek andiba inonggwarek inebe laligik, agarek andi.

¹⁴ O lingge werek kwelek meneat he, it ineilmo re hubanggo higit hilinglagunem he, inenggi ya fak ta fak hilingitarek andi.

¹⁵ Oba nen At Allah nen he, it afuni yi mene ti mene inelagaikhogo werek mene re wa'lasinogoluk telinafik, afuni inawe a'ma sebelek welagaikharek mene it inomame werek mene nen fakfisanogoluk telinafik, ikherek andi.

¹⁶ Afuni ekhe inawe a'ma hangge sebelek welagaikharek mene ogore, Allah nen lebetnisagain werek iluk inendawimo eberek welagaikharek. Nen, Allah nen afuni weak hilingitarek mene andi, inambe te'met fisikherek.

^17-18 Allah nen he, inendawimo weak asuagaluk hilinginaferesik, hobuk inendawimo fanot fisigik, yei inoateresigen hobuk inoba lombugeratik, ikherek andi nen he, Aren wenakhetik, komothafik, ikhe halok he, hendawimo nen, nabire, iluk anggigi'lek hagaiyek hugu mondok logoino o.

¹⁹ Nen hat hoba weak mene asi wagu halok he, hundik-hundik hili wokhafi logogin o.

²⁰ Sumburu ouwak mondok hokho mene lagagunem hebe wa'lasinogoluk, Aren telhabigin werego. Nen weim mondok aninirogo wagunem hoasinogoluk tok ambisangma nen telhabigin weregaro.

²¹ Afuni ineranen wene hanggomo weak palhunem, Allah hat hebikhit fetharek logogin werego. Nen mondok weak mene hoba wesigin halok he, hailo agi'lek hendawimo hombunhogo logogin weregaro.

²² Weaget hobagaluk hoasuogoluk ugunem inom, sumburu ouwak agu halok inom, hat he endo yaginafi logogin o. Mene olomene enda'ma mene nen libilhabigiluk wagunem he hailoti logoin mondok lego.

²³ Hat yabu wanhi logogin oba andoma re helep mondok le'ma segetlekhogo wanhi logogin o. Nen, wam maro aigen libilhafi logogin lego.

²⁴ Hat hebe re hawi tenda wuri'mo andoma fanorogo habolo'lek logogin o. Nen, hanggo domba lombolik lagunem he, mondogat longgo igi'lek fano were'ma nek hikhi logogin o.

²⁵ Nen hombalak haren tagomangge mene re engga o leikwe werek andi hak inebe mondok hokhorogo inenggi wenasu elo'lek mene hilinglasugun o.

²⁶ Hat hebe re, gandum enggen wurik agunem palharek andi hak, hebe hagap ket mondok logombik, yaman asimbigen wa'lasigin o.

²⁷ Ayub noe. wene mondogat yagaheti andi re, ebe tiphogo hilinglagunem ikhi lago mene eberogoat mene yagaheti andi nen he, haren herakfisigi'lek hendawinggenma mondok wanin o, noe,” iluk yagatikhe.