AYUB 42 - Allah Wene Fano Wene Hupla Inane

At Ayub en Tuhan oba yagatikhe wene

^1-2 A'nogo yagatikhemo, at Ayub en Tuhan oba mel yagatikhe: ”Hat Homame Mondok Hokho logolik yi mene ti mene mondogat hilingisigiluk anggegendek mene, herakfigi'lek hilingitendek enek a'nogo an mondok nelu o, neisena.

³ Haren heinok an wo'niikhi logolik, An Allah nendawimo kagalek logolik yi mene ti mene hilingitirek meneat he, hat honggot logolik, nane sebeligiluk ikhi lagen andi nenahalok? iluk heinok wo'neegen andi, hat elalin hilingiti lagen mene andi an nen futfigi'lek nonggot logolik igimo o, neisena.

⁴ Haren yaganeti logolik, An Allah nen wene yagahesigin enggere hesanggo holek logoino. Nen, an nen heinok wokhugunem onggo yaganeti logoino, iluk yaganeten mene andi re, a'nogo igimo aro, neisena.

⁵ An attagat he, Hat habok afuni nen yaganetunem nesanggo holhi lagagi, meneat he, yogondak enek he neilenggen tomok hiigi o.

⁶ Andi nen he, an nane igi mene mondogat nendawimo ebethaluk he, nenggali ari'lago. An nendawimo nen he, Nane weak igimo, iluk anggigirik he, nebe kweang alolongengge oba inom, wul oba inom hurek welagi o, neisena,” iluk yagatikhe.

Wene elugun oba Allah nen yagaisigik, fanorinafik, isikhe wene

⁷ At Tuhan nen Ayub a'nogo yagatikhesik, ap Elifas a'nogo mel yagatikhe: ”An nen hat inom, hagaila'lak inebe pire arem inom, hinomen he, wene an nebe faget namingmingengge Ayub en higithogo ikhe hak iren ogo a'nogo egep lek andi nen he An na'mage inoba figi o.

⁸ Andi nen he, yogondak wam sapi ai mene 7 nen inom, nen domba ai mene 7 nenat wanimbik he, Ayub oba we'no o. Wasimbik he, hit faget wam mondogat andi warogo an nolne'no o. Nolnetunem, Ayub en samban hit faget nayonggo fugunem, at ane nesanggo holigin o. Hiren he, An namingmingengge Ayub en An faget higithogo ikhe andi hak igi'lek, herakfisegepsik weak mene egep andi nen, wene hinoba fuluk hinenggali wasugun meneat he, An nen wene hinoba figi'lek herakhinobagagin o,” iluk yagatikhe.

⁹ A'nogo yagatikhemo, it Elifas aiba Teman mene a'nogo inom, Bildad aiba Zua mene a'nogo inom, Zofar aiba Naama mene a'nogo inom, Tuhan nen he, Yi'nogo hilingi'no, iluk yagaisasikhe andi hagat hilingitukwama, Ayub en it faget samban nineisena Tuhan ayonggo fesikhe mene ane esanggo holhikhe.

¹⁰ At Ayub en agaila'lak inebe henagan aremnogo faget samban Allah yagatikhemo, hobuk Tuhan nen at Ayub ebe ambotkwe eilmo wulalhak hilingisogo fikhi logolik, angge yi mene ti mene mondogat attak welagaikhe mene lek agaikhe mene omanogo obulu'mo ebe higithogo wogetikhesik he, hobuk ekhe inom enggi pireba hakhogo oba loukhogo wogetikheat.

¹¹ A'nogo hilingisogo fesikhemo, at Ayub ogogwi inom, erugwi inom, agaila'lak inebe mondogat inom, afuni attak at inom hundik welagaukwa mene mondogat inom, yi enggin, ti enggin Tuhan nen Ayub oba lakfei wagaikhe andi faget, iren ouwak le agik, endawinggen sebelhik, uogeluk, oba andogotukwasik, at Ayub aiba andoma seni isatukwa. A'nogo isati logolik, it inebe lombogen uang inom, senggan emas mene misiktek inom, Ayub wogetukwa.

¹² Attak at Ayub weak oba agi'lek logolik fano welagaikhe meneat he, andi endebat elo'lek hangge, nen weak a'nogo oba agaikhesik oba nen Tuhan nen mondok fanot fesikhemo hobuk fano mondok welagaikhe. A'nogo fanot fesikhemo, hobuk anggo kambing, domba 14.000, nen unta 6.000, nen sapi 2.000, nen keledai 1.000 nen wogotikhemo eise agaikhe.

¹³ Nen, againafuri ap inebe 7 nen, nen helime inebe 3 nen wogotikhe.

¹⁴ A'nogo wogotikhemo, a'logo manggusa mene enu re, Yemima salhik, ombo'ne mene enu Kezia salhik, nen elabo mene enu Kerenhapukh salhik, isikhe.

¹⁵ O ekhema-ekhema mondogat at Ayub a'logomi inebe henagan fano mondok andem hangge ekhe mondok lek. At Ayub en a'logomi andem yagaisikhi logolik, ”Hobuk an nebe wa'lagi halok, naminingengge re hinerugwi hinom fanorogo sumbura'no o,” iluk yagaisasikhe.

¹⁶ A'nogo hilinglagaikhesik oba nen, at Ayub ebe 140 tahun hobuk fano logolik, againafuri, inagainafuri ombalak inebe inom, it inagainafuri inom, eilenggen higit isasikhe.

¹⁷ At Ayub ebe umur a'nogo uanat welagaikhesik, ebe arat yaman agaikhesigen wa'lagaikhe.