AYUB 41 - Allah Wene Fano Wene Hupla Inane

¹ Haren buaya enu Lewiatan andi, matakail ikan watarek meneba elok ke'nokhogo fakfou hak nogo? At amelinggen haren hele kelogo fou hak nogo?

² Haren he, at ambisang oba hele kelogo figik, agaukwak oba matakail ikan watharek meneba folelogo kelhik, u hak nogo?

³ I a, athe, at enggi hele homago mene haren fikhalogo fouwageluk ane elagaik ane yagaheti logou hak nogo? Athe, haren endawirasuageluk ane liokhogo yagahesu hak nogo?

⁴ I a, athe aren hat yagaheti logolik, An nen hat faget hilingitu mondok logogin, iluk wene wathesu hak nogo?

⁵ I a, athe, hat hamingmingengge hemi nen sue inamolo nen hele kelogo kulharek andi hak, haren kombi kelogo eil wasu hak nogo?

⁶ At he, ap ikan wilik nikharek mene nen, at ebe onggo waganogo senggelogo re, it ap onggo wanhik, palhik, agarek mene sumburisa hak nogo a?

⁷ At he, haren sige enggat henagan akhogo kabelek meneba, at agap oba folokhogo figik, sige ikan wathu meneba ungguloa'ma folokhogo potfigik, u hak nogo?

⁸ Haren henggi at ebeba fakfagain halok, hemberek pugasugun mene andi honggoragi'lek eberek mondok logolik, hobuk a'nogo fakfou elo'lek asigin.

⁹ It afuni inebe lombogen, buaya Lewiatan andi nineilenggen hogoin iluk lagaikharek meneat he, ineilenggen haluk inoilo nen inebe talorogo ineil furuk fagarek.

¹⁰ Aren he, An nelokhoma sa mendek logogin nogo, iluk ikherek andi nen he, at nogo ugunem elugethugu halok, a'mage het-perikherek.

¹¹ Afuni ekhe nen at ebe wasuogeluk ugunem, aren aigen libilinafi'lek kamo u hak nogo? Mondok elo'lego. A'nogo hilingiterek andi nen, afuni kweangma mene mondogaren at ebe fakfou re, elo'lego.

¹² An nen at buaya hangge enu Lewiatan andi ebe tiginik, enggi eisok tiginik, iluk pilingisogo yagahesigin. At ebe fano mondok mene re, omame mondok hokho werek.

¹³ Afuni nen it ekhe inasu endakwe mene tiliphogo lakfisigik, sing ugu were'ma folokhogo inoatik, agarek andi hak, at andi a'nogo hilingisogo wasu mondok elo'lego.

¹⁴ At ambisang mondok uan awan, omame hokho, aik mondok ngili ngelerek, hilingi'mo re, inailo lek sa nen, ambele kwialu hak anggegep?

¹⁵ At amboloak he, sing eil oba louk-louk itarek andi hak mondok seleben takhogo hilingi'mo re, helep hangge mondok haro welagarek.

¹⁶ A'nogo mondok seleben takse'ma re, sogoi elonggoma ku re, mondok elo'lek.

¹⁷ At agap ambot oba mondok haro andi nen, a'nogo hundik welagarek mene andi, amu-amu togalhigik fou re, elo'lego.

¹⁸ At buaya Lewiatan andi hasik watunem, eleage ambisang elekwe nen amulit teleng-teleng wulibi wagarek. Nen, eilenggen he, o hubet mo asin andi yegel-yegel liabi wagunem ombak-bak andi hangge hilingik.

¹⁹ Ambelekwe nen endu amulok kulung-kalanghogo wulakfisa wagik, endu enggen tilelogo lagarek andi hak, ekhema-ekhema tilelek walelek lakfisigik, ikherek.

²⁰ Helep ikfugunem endu hule mono'luk lagaikherek andi hak, ambisang elekwe nen wulibi wagarek.

²¹ At ambelekwe nen endu amulok wulakfei wagik, eleage nen, endu enggen hirimetfigik, ikherek.

²² Wam erim esi legetunem awe a'ma ku inailo agarek andi hak, at andi ot oak omame mondok hokhore'ma re, a'ma ku inailo hokho mene agarek andi.

²³ At agap oba lebelek mene ekhe werek mondok lek, nen at ebeba posiemanggen enu baja andi hangge serelasu mondok elo'legat.

²⁴ At endawinggen mondok helep hangge hilingi'mo re, endawimo pukhogo logolik, helep yi mene ti mene sagalharek mene mondok haroweak omame hokho andi higit, endawimo wurikhogo welagarek.

²⁵ At ebe menlagunem he afuni inomame hokho mene ogore, youk laluk, inailo hokho agunem he iren yi'nogo ti'nogo ekhe hilingisu re mondok elo'lek.

²⁶ At ebe wasu re, karok oba elo'legat, nen, tok, sige inom, suepak oba inom wasu re elo'legat.

²⁷ At eilenggenma re, posiemanggen mene re, engga puk mene hangge anggikherek. Nen, tembaga re, e fili mene hangge anggikherek.

²⁸ At ebe tok pisinget haluk mugusogo lakfou re mondok elo'lek. At hebe helep oba fuget hugunem he, engga puk mene hangge anggikherek.

²⁹ Yei e mene at eilenggenma re, engga puk mene hangge anggikherek. At ailo asuageluk afuni nen sige obakhe fagaisogo abologet hugunem he, endo yaginaferek.

³⁰ Agap alabut oba re, pilibuk serelek mene enggat kabelek mene hangge hilingi'mo re, oba fesi lagunem he, fesi healogo obalik hilinglagarek.

³¹ I laut yenggelek meneba sapuget hugunem he, i isakfugunem huluk eterek hak hilinglagik, minyak panci elema isatunem aganhan nen wesilagap mondok hilinglagarek hak hilinglagik, ikherek.

³² At eisok sebelfilik lagunem, obuluk lagarekwe re amulireterek, nen i laut agum a'nogore wesilagap mondok langgi-langgi lagaikherek.

³³ O kweangma yoma yi mene ti mene An Allah nen elalogo fesigi mene, eluk welagarek mene oma mondogat, at ailo mondok lek andi hak ekhe inom higit mene werek lek.

³⁴ Aren he, wam, mene, sue, paik, yi mene ti mene fano logolik, endawimo fogerakhikherek mene mondogat he, endawimo nen sebel fisikherek enek. Andi nen he, wam maro mene inom, mene olo mene ekhe inobabut weak mene mondogat he, inoe kain mene raja re at amuat welagarek andi,” iluk yagatikhe.