AYUB 38 - Allah Wene Fano Wene Hupla Inane

Tuhan nen Ayub onggo yagatikhe wene

¹ A'nogo isikhemo, At Tuhan ebe ane mil-mil ikherek oba anggele'ma omanogo nen Ayub wene yi'nogo yagatikhe.

² ”An nendawimo kagalek logolik hilingitirek mene andi re, hendawimo seramet fegendik kembu mene nen yugunengge agarek hangge, honggot logolik andi re hat sa nen ikhi lagen nogo?

³ Yogondak, hat hobabut abat logolik, an noba wesimbik wene heinok yi'nogo wokheagain yi, onggo yagane'nogen hafe hebelogo we'no ta.

⁴ Hat hebe werek kwelek, an nen kweang tik warogo walhasigi nogo a? Hat helu mene andoma hokhorogo werek halok he, an yaganom o.

⁵ Kweang talek welagarek mene yi, sa nen walhasikhe nogo? Hele ilirenggeba uankwe tiba logouwak, horokwe tiba logouwak iluk, sa nen walhasikhe nogo? Haren onggo elok yaganesigin aro!

⁶ Kweang tik ninghogo legeisogo fisogo welagarek andi ninggi'nogo? Kweang ero-ero elugunmo andoma tik ninghogo abolo'lek warogo fesikhe andi sa nen nogo?

⁷ A'nogo warogo fugu kwelek, hesagal wap o hil liabi wagu kwelek lagai wagarek mene, mondogaren wuni watik, Allah nen elalinafikhemo ineluk pogoroba welagaikharek mene inendawimo inagaiyek hokhorogo agaukwasik inane amit-mit sup-sap, isukwa andi.

⁸ I laut yenggelek mondogat kweang elema nen wulibisogo yenggelhunem, i ele'lagat oba heilanghogo wulibinogo iluk sa nen sa'lip warogo fesikhe nogo?

⁹ An nenat, i laut yenggelek andi ohenaba sebelogo figik, mum weak meneba yinggilogo figik, isigi andi.

¹⁰ I laut yenggelek andi mondogat an nen huli warogo fesigisik, ambe ela'lagat hilingisogo fesigi andi.

¹¹ A'nogo fesigisik, mel yagatigi: Hat huli yibaat logoino, ela'lagat huli warek werek mene yiba heilanghogo lagai wesigin mondok lek. We, misi'mo logolik, ha'labu aninirogo fonyalek lenggalek huli yi huli hilingiti logoino o, iluk komoratigi andi.

¹² Ayub, nailo e. Hat hane misigam ekhe, O wei uagaluk yagatigindik nogo a?

¹³ I a, athe, o hil yagati logolik, Haren kweang esanggo henggi fago logolik, afuni weak hilingitarek mene inebe hinagoma welagaikharek oba nen, wulibi wesuagaluk, abologet han, iluk ekhe yagatigindik nogo a?

¹⁴ Cap hangge kweang abiweak meneba fugunem helal hangge palagik, su siratunem, sirogo hilinglagik, ikherek andi hak, o wei ugunem he, punukwe inom, tonggokwe inom mondok weinam yethagarek o.

¹⁵ It afuni ineisena Allah an heraknobagaluk weak hilingitarek mene andi, o linggene lia mondok agunem he, inobabut weak hilingitarek mene andi hilingisu elo'lek agarek.

¹⁶ Hat hebe i laut yenggelek mene a'ma, i elesi lagai wagarek oba ma'lima pisigin mene ekhe werega? A'nogo pisigindik ial pililirekwe ma'lima nikhi lagagin mene ekhe werega?

¹⁷ Afuni ekhe nen, afuni wa'la'luk lagaikhare'ma o mum mondok hik-hakse'ma kwe ambe pale'ma andoma yagahetukwa mene ekhe werega?

¹⁸ Hat he, o kweangma yoma, esanggo huli taba werek, iluk helu nogo a? Helu halok he, onggo yaganom o.

¹⁹ O lia andi ero toma nen wagarek, iluk helu nogo a? Mum andi eberogoat aiba ti mene, iluk helu nogo?

²⁰ Haren, o mum inom lia inom emberek huli warek werek mene andi, helumo elok yagaisagain a? Nen, haren it mum inom lia inom andi, Hinaiba hinambotkwe lani, iluk yagaisamo, elok nogo a?

²¹ An nen pogot, kweang walhigi'lek werek kwelek, hat hebe attagat ta'lagagindik hebe umur uanat welagendik, yogondak arat yaman agen andi nen he, helu welagen higi o,” iluk ane lagokhogo yagatikhe.

^22-23 ”An nen o salim agunem, afuni weim yabi lagik, yabi wagik ikhi la'luk, meiso sogenggen mene inom, meiso henanggulok hangge enu salju inom, nunggunem, yi mene ti mene andogorogo figirek kwe andoma obalik heilenggen halagendik nogo a?

²⁴ Hat he, o mo eroma nen yegelogo lagai wagarek oba andoma heilenggen hegendik nogo a? I a, athe, sogoi ero, o mo wulibi wagarek fikhiren funhogo wialasi wagarek andi helu nogo a?

²⁵ Meiso hokho mene noagaluk sa nen su'lenggerogo hilingiterek nogo. Nen, unggunggu ane pak igik, eilabut yararethigik, uageluk sa nen hilingiterek nogo?

²⁶ Sa nen meiso o leikwe pelabi wagik, kweang afuni inebe welagaikharek lekwe pelabi wagik, ikherek nogo?

²⁷ Sa nen, o leik esi mondok lekwe andoma, i kweisalhunem engga mondogat fulelherek nogo?

²⁸ Meiso eisena tatikhe mene werek nogo a? Nen, lilengge eisena sa nogo?

²⁹ Meiso sogenggen mene andi agaisa werek nogo a? Nen, lilengge mayu hangge aigengge weak mene andi sa nen tatikhe nogo?

³⁰ Sa nen i mene es helep hangge hilingisogo figik, i mogo yenggelek agumkwe unggulasu haroweak es hilingisogo figik, isikhe nogo?

³¹ Haren hesagal esa misi'mo logalek enu Kartika andi mene hele homatik, enu Belantik andi mene hele fikhalogo figik, u hak nogo a?

³² Hesagal esa logalek weinam agarek sambul ebe lombok haren woginarek wulibi wesu hak nogo? Nen, hesagal esa logalek e so hangge iluk enu Biduk hokho mene inom, endep mene inom, Kwe ti kwe lani, iluk yagaisa hak nogo?

³³ Pogot walingik andi awenenggak helu nogo? Nen, wene andiba higithogo kweangma hilingiti logouwagaluk haren yagaisa hak nogo?

³⁴ Ohena nen meiso hokhorogo hoba pelabi wesuagaluk hane hokhorogo yagasumo, elok pelabi wesu hak nogo?

³⁵ Haren eilabut yegelogo lakfei wesuageluk yagatunem, ebe hoba wesimbik he, Noe, wagi, iluk yagahesigin nogo?

³⁶ I Nil andi hobuk hetokhogo lagagin, iluk sue enu ibis andi sa nen yagatunem elu agarek nogo? Nen, o hobuk meiso nagain, iluk sue ayam ap mene andi sa nen yagatunem elu agarek nogo?

³⁷ Sa endawimo mondok kagalek logolik ohena enggi wenatik, meiso pi wesuagaluk, abel endenhigik, u hak nogo?

³⁸ Kweang enggen talelek mene meiso andi nen, harotfigik, kweang haletse'ma, abungusogo figik, ikherek andi, haren hilingisu hak nogo?

^39-40 Haren sue paik heragaisogo warogo, mene olomene hangge enu singa ebe oumo kwe were'ma he a? Awi wuri'mo were'ma he a, noagaluk, isa wogotik, eagwi inalabut engginetfisigik, u hak nogo?

⁴¹ Sue pim hangge mene enu gagak andi amburu nele nen, at ninggerek mene herarik yugunat lagik, wagik ugunem, sa nen lebethikherek nogo? At eagwi amburu wogosuagaluk inane hokhorogo kino yaganetunem sa nen wogisikherek nogo?