AYUB 37 - Allah Wene Fano Wene Hupla Inane

Allah nen pogot kweang yi mene ti mene elalhikhe mene faget, fogeratikhe wene

¹ Abolok mil-milengge hilingiterek mene andi nen he an nendawimoet leigetik, nen nendawinggenma ogo pong-pongenggeri'lago.

² Hit afuni mondogat yoma sani, At Allah ane igik, At ambelema nen subukhogo wulabi wagik, hilingiri'lago andi holini!

³ O pogot ebene mondogat eilabut kulungeri'lago, o kweangma unggut-unggut andoma mondogat asinandi palogo wulabi'lago.

⁴ A'nogo hilingfuluk he at ane re houwakhogo hugesi pi weri'lago, henaba andoma nen ane tololang eri'lago, nen ane tololang eri'lagoba anggele'ma andoma nen he, eilabut kulunghogo asinandi palogo wulibi'logo.

⁵ At Allah ane miming oba re omame werek mene inom, elalin mene niren futfou elo'lek mene inom, hilingiterek.

⁶ At ane miming oba re meiso es mene kweangma pelabi wagik, At ane yonggoba re meiso sogenggen hokho mene pelabi wagik, ikherek.

⁷ Aren enek hilingitarek iluk inelu asuageluk he, it afuni nen yabu hilingitu mene omanogo mondogat aloget fisikherek.

⁸ Ekhe it yi mene ti mene ineil polok mene omanogo re kweang habulik lekwe inom, helep elema inom, kweang elema inom, inawi wurogo hina'lasi kwagaresik welagaikharek.

⁹ Selatan fikhiren he sogoi sielu funhogo lakfei wagarek, nen utara fikhiren he sogoi aigengge weak mene.

¹⁰ At Allah ele ageba re i agum yagamakhogo yenggelek ebene haro weakhogo hilingfigik, nen iba nen agamhogo es mene helep hakhogo haro weak hilingfigik, ikherek.

¹¹ O henaba re i yenggelfigik, eilabut en he anggulok kut mene omanogoba ombak-bagetik, ikherek.

¹² At Allah ane melalek oba re ohena kweangma yoma mondogat sagarek werek, nen At anebaat yi kwe ti kwe mondogat nikho.

¹³ At Allah nen he kweang amusurogo iluk meiso pelak fei wagik; athe it afuni unggum inoba figik, ikhi logouwageluk hilingite. Ekhere it afuni nen anggikhi logolik At Allah nen endawi hundik hilinginafe andi re mondok-mondok faget iluk inelu asuageluk weinamet fikhe.

¹⁴ Ayub ao, eil misik ya logolik hesanggo holek logoin o, Allah nen mondok elalin hilingisu elo'lek mene hilingite andoma fogesin.

¹⁵ At Allah nen eilabut ohenaba inom anggulok oba inom wialuk loageluk, enegengge hilingfikherek mene andi hat he helu a?

¹⁶ At Allah elu mondok logolik elalinhogo hilingiterek mene a'nogo nen hilingfugunem, anggulok selekwe ta'luk lagarek mene andi re hat he helu a?

¹⁷ Lego, hat he o kweangma yoma sielu selatan fikhit andoma nen funha wagunem aganhan eterek mene andi faget hoak heinet wati lagen.

¹⁸ Hat hebe Allah higit a'luk henggi nen pogot hesagal enggen were'ma andi tualogo foumo re eloga, nen arigin fuluk afuni nen amulirengge eilafumak hangge mene inom, logam hangge inom kweisalogo haro asuageluk hilingfagarek andi hak hilingisumo eloga?

¹⁹ Niren Allahba yagasugun nen, yi'nogo yagaisani iluk nit yanggulninabin. Nit ninungguloa'ma fanorogo wenggelhugu mene re mondok le'ma re, niren yi'nogo ti'nogo u re mondok elo'lek.

²⁰ At Allah nen an noba hilingik mene hinaknobagaluk an nebe alomat nobagaikhe hanogo re, an nen Allah hebe ninom nane igin nen iluk yagasu legat.

²¹ Sogoi en ohena furogo waluk lagunem pogot mondok healherek, yogondak he anggulogen nineil sili pabuk ugunem he yetha mondok elo'lek ari'lago.

²² Yogondak he o eil utara fikhiren he selek mondok ombak-bak mene weinam aga, nen At Allah ombak-bak were'ma re nit ninendawimo fogerasu mene hilingninabi'lago.

²³ Nit nineisena Allah andi re eberogo omame hokho mene were'ma re, niren At horokhogo asi la re elo'lek. Aren he higithogo nek hilingitik, katokhogo nek hilingitik, hilingiterek. Aren afuni enggin-fenggin inoba fuluk sebelinarek welagarek mondok lek.

²⁴ Andiba re it afuni inebe mondogaren At enek along anggaluk legeisogo fikhi logogun fano. Aren he it afuni nen an nendawi werek nagun iluk anggagarek mene andoma faget inoba ebeterek lek,” iluk isikhe.