AYUB 36 - Allah Wene Fano Wene Hupla Inane

Enggin-fenggin hogoin mene andi ambisangma inobabut hebelharek, isikhe wene

^1-2 An nen Allah enuba wene ekhe yagahesigin mene oan werek engge re hambuk-hambik hesanggo holek logoin.

³ An elalnafikhe agun andi re Aren kotokhogo hilingiterek enek a'nogo enekse'ma hoageluk he, an nelu welagi mene andoma mondok hokhorogo hilingi'mo re andomaba igiluk welagi.

⁴ An nane ikhi lagi mene andoma re neranhogo wene ekhe werek fuk, it ap inendawinggen hat hoba tibet fuluk werek mene re hit henelokhoma werek.

⁵ Allah andi re anggiluk mondok were'ma re, yi wene ti wene mondogat fut fikherek enek, Aren he ap misik ekhe sebelek hak iluk anggikherek mene ekhe werek fuk.

⁶ It afuni weak hilingitarek mene re ineluk uanhogo logouwageluk hilingfisikherek lek, it afuni inoba ou-pou hagarek mene inoba re Aren katukhogo nek hilingfisikherek.

⁷ Afuni inobabut higithogo hilingitarek mene re, Aren futfisaluk hilingfisikherek, it inebe re ap raja-raja logolik melalinafarek omanogo hakhogo inalong logouwageluk hilingfisugunem he, it afuni nen inenggi hundik-handik omanogo re inalong anggaluk foget fisikhi logolik enek werek.

⁸ Oba nen he it ap ekhe hele posiemanggen meneba homak fisugu halok he, at hilingiterek a'nogo ambisangma ou hikherek.

⁹ Andiba re it inaweak hilingitarek mene inom, it inonggwaregen wonoget fakhagarek mene inom omanogo it fut fouwageluk, At Allah nen weinamet fikherek.

¹⁰ Aren he it afuni inaweak hilingitarek mene a'nogo herakfisaluk, it inendawi wenggelogo iluk yagaisugu mene a'nogo holfuluk logouwageluk yagaisikherek.

¹¹ A'nogo yagaisugunem, iren Allah nen ugu mene a'nogo mu'luk lagik, At oba nek wene kabogetik, hilingitu halok he, it inebe inailo legengge fanorogo nek logolik inangge yi mene ti mene inenggi werek wela'luk wa'lasugun.

¹² Oba nen he iren holfigi'legengge hilingitu halok he, it inonggwarek inendawi morueba wa'lasugun.

¹³ It afuni ineisena tuhan lek mene we yugunat hilingitarek mene nen he ina'mage nek inendawimo wut-warogo fetaluk logolik he, At Tuhan nen unggum inoba fikherek oba nen ogore nit lebetninapni mel agarek lek.

¹⁴ It inebe mondok weak-peakhogo logolik he, it ineluk logolik inoba hilingik mene omanogo hilingisu re elo'lek agunem he, inebe oan alage werek kwelegat wa'lagaikharek.

¹⁵ At Allah nen he it afuni inoba ou hagarek andi bene yanggulinafik, inoba enggin-fenggin hagarek andi bene inendawinggen hebel fisigik ikherek.

¹⁶ Hat hebe mondok wiik-weakhogo were'ma At Allah nen fikhalogo hobagaikhemo re, hebe fani-fanorogo logolik, hagayo meja talek oba andoma hangge nunggungge mondok hoporogo welaga andi.

¹⁷ Oba nen he, hat haweak hilingiten onggore yogondak unggum helikhi lagen yi.

¹⁸ Uang inenggi a'makwe helagarek meneba lalhafik, inenggi werek agaikharek meneba kwe pulema hobagai lagik, hilinghabinogoluk hendawimo fakhambik logoin o.

¹⁹ Afuni inoba lebetneani iluk yagaisikhi lagen mene andoma re we alomarogo ikhi lagen; nen hat homame lek-pekhogo hilingiti lagen mene andoma re we elalinat hilingiti lagen.

²⁰ Nen it afuni inunggulenu mene omanogo mondogat wolelenggenhogo leget fisouwogen he o weak-weak huba'nik agwi, iluk hagaiyek oba ebeti logogin lego.

²¹ Hat hoba ou hikhi lagen andi re haren weak hilingiten mene ari herak fouwageluk hilingitemo re, haren helokhe hebekhogo afuni wene sagalfuluk hilingitarek mene inoba lagen hanogo re hafe hebelogo hilingi'no.

²² At Allah andi re Omame Mondok Hokho mene werek a'nogo hendawi wenggel han. Ap guru welagaikharek mene ogo At higit ekhe werek lek.

²³ At lagainkwe re yi iluk ap sa hagen u hak nogo? Athe Hat weak hilingitenma o, iluk ap sa hagen At Tuhan oba hikhibet ha hak nogo?

²⁴ Aren yi mene ti mene mondok pugun-paganhogo elalhikhe mene faget fogeratarek, nen haren ogore we Arenek fogerati logogin halok fano.

²⁵ Afuni mondogaren he Aren hilingiterek mene omanogo mondogat ineilenggen hagarek, oba nen he ap misigen iluk ogo ibi-eberogo nen fut fagarek mene ekhe werek lek.

²⁶ At Allah ebe re ombak-bak mondok hokho mene were'ma re, afuni nen ebe yiginik agun iluk senggerogo futfou re elo'lek. Athe At welaga mene tahun yi huli iluk wenasu elo'legat.

²⁷ At Allah nen enek i o kweangma yoma nen waluk lagaluk ohena hilingfikherek, oba nen ohena a'nogo agamhogo i tep-tebengge a'luk meiso pelabi wagarek.

²⁸ Ohena hikse'ma omanogo nen Aren meiso afuni inoba kweisalogo pelabi wagarek.

²⁹ Ohena lagarek andoma inom, unggunggu Allah ebe welagarek oba nen suphogo lagarek mene andoma inom he afuni nen futfou hak mene ekhe werek lek.

³⁰ Pogoroba andoma Aren esage ombak-bak oba selegeratu kwelek he, i laut yenggelek mene a'ma ma'lima mondok hik kiruang tengsek mondok werek.

³¹ At Allah nen yi afuni ti afuni inunggulenu lombok ineluk logouwageluk hilingfisigik, inangge nunggu mene hokhorogo wogisigik, ikherek he a'nogo andi.

³² Aren he eilabut enggi nen fakfuluk he, At endawimo anggikherek oba omanogo kulunghogo loageluk hilingiterek.

³³ Unggunggu subugetu halok he meiso wesigin nen hilingiri'lago iluk inelurek, nen wam en ogore sogoi hokho mene wesigin iluk andi re ineluregat.