AYUB 35 - Allah Wene Fano Wene Hupla Inane

Afuni enggin-fenggin hugu were'ma Allah nen futfisikherek, isikhe wene

^1-2 Ayub ahwi, haren anggikhi logolik, an weak hilingiti'lek iluk anggikhi lagen mene andi re, mondogat hendawinggen nong-hongsek logolik ikhi lagen.

³ Haren futfein o, aben heinok wokhikhi logolik, hat weak hilingiten oba re, At Allahba ninggi'nogo hilinglasu hak, nen hat weak hilingiten lek halok ogore ambisangma nenangge saburegen ha?

⁴ We wene andi faget an nen enek hat inom it hagaila'lak fenakwe omanogo inom onggo yagahisagain o.

⁵ Hineilenggen pogoroba liakhambik he, o pogot anggulok walek po'lima werek andi fogera'ni o.

⁶ Hat haweak hilingiten halok ogore At Allah nen nenahalok hilingite iluk angga lek hak, nen haren kwanirek mene hokhorogo hilingiten halok ogore At Allah oba yi'nogo ti'nogo asu mene ekhe werek lek.

⁷ Nen, haren fano hilingituba mene ogore At Allah haren lebethegen mene ekhe werek lek, ibi-eberogo nen, At Allah re, haren lebetha mene ekhe werek lek.

⁸ We hat haweagen he it agaila'lak hinom welagep mene omanogo weaget fisikhi lagen, nen haren fano hilingiti lagen halok he it inoba fano mene leberisikhi lagen.

⁹ Afuni sebelogo fisagarek mene omanogo re neneik eri'lagwi, nen iren he lebetninapni agwi iluk he inane kwetu werek.

¹⁰ Oba nen he inendawimo weakhogo logolik andoma re, iren At Allah inebe elalinafikhe mene elok telinabu hak mene a'nogo oba wagi'lek,

¹¹ nen yi mene ti mene inom, sue, paik o kweangma werek mene omanogo wenggelhu mene endep hak wogisasikhe oba nen he afuni inendawinggen mondok kagalek mene wogisikherek mene a'nogo oba re weri'lagwi lek.

¹² It afuni enggin-fenggin hagarek mene andi nen inane hokhorogo kweri'lagwiba nen he, iren weak mondok hilingiti logolik wonoget fakhagarek andiba re At Allah nen inane holhi'lek halolot fisaluk werek.

¹³ At Omame Lego werek mene a'nogo eilenggen isigi'lek, esanggo holhi'lek werek kwelek he, iren inane omameba kweri'lagwi mene andoma re we alomarogo kwetu werek.

¹⁴ Ayub ao, haren ikhi logolik, an he At ebe hikhi lagi lek iluk igik, nen an nawene re At mondogat elu agama re, At ebe nek nenangot hugu welagi igik, ikhi lagen mene andi re ebenagaik alonghogo re andi aro.

¹⁵ Haren anggikhi logolik he, an weak hilingiti lagi mene inom, wene melalek taganhogo hilingiti lagi mene inom, oma re At Allah nen unggum wo'nesigin lek, iluk anggikhi logolik ikhi lagen a?

¹⁶ Hat hane ikhi lagen mene andoma re eberogo honggwarek honggot logoligen ikhi lagen andi arat weinam aga o, arigini'mo re hat hane lisogo ugu mene andi re we elalinat ikhi lagen o.