AYUB 33 - Allah Wene Fano Wene Hupla Inane

Allah nen yi wene ti wene oba lithigik afuni yagaisasikhe wene

¹ Ayub ao, yogondak he an nen nane ikhi lagi mene yi, hesanggo fifurogo holin o.

² An nane igin mene re, mondogat fik-fougeti.

³ Nen, an he nendawimo mondok higithogo logolik nane ikhi lagimo re, an nen ikhi lagi mene yi re wene eberogo mene ikhi lagi.

⁴ At Allah Areagun nen he an elalinafesik he, an neluk logouwageluk Omame Hokho meneba hilingnobagasikhe.

⁵ Arigini'mo re haren an onggo yaganesu hak halok he, an yaganesigin mene fanorogo fouge'no,

⁶ At Allah nen he nit ninebe pirenet kweang tangge meneba elalninafikhemo re, hat inom an inom nemberek higitsek welago.

⁷ Arigini'mo re an nen mabenet hobagagin lek enggere haren an faget hailo asu fuk.

⁸ Hun haren hane ikhi lagen mene andoma an mondogat nesanggo holhi, nen haren hendawi anggegendik ikhi lagen mene andoma ogo an futfigi nek.

⁹ Haren ikhi logolik he, ”An he wene ekhe taganhogo hilingiti lagi le'ma nebe nagap horek welagi. Nen An nen weak mene ekhe hilingiti mene ekhe werek lek, an nebe selekhogo welagi.

¹⁰ Oba nen he At Allah nen an noba eilnafesik he enggin mene noba fikhi logolik, Aren he an a'nogo aselei mene hakhogo nobagakhi logolik werek.

¹¹ Nen an neiso'ma re hele posiemanggen mene elangek meneba puget nobagaikhesik he, an nobabut hilingitu mene a'nogo faget kagalnarek werek,” iluk ikhi lagen.

¹² Ayub ao, afuni re mondok endep kwelek At Allah andi re Ebe Hokho agun hilingi'mo re, Haren anggegendik ikhi lagen mene andoma re mondok heranhogo wene ikhi lagen!

¹³ Afuni nen At Allahba inane yagatu mene holhi'lek hilingiri'lago andoma nenahalok iluk, haren At oba wene fikhi lagen?

¹⁴ At Allah ane re, ero ekhe meneba-ekhe meneba ugu werek; oba nen he ap misigen iluk ogo At ane ugu mene a'nogo fut fili'lagwi lek.

¹⁵ It afuni o hubanggo nogo homokhogo ugu kwelek, At Allah nen hinabiba inom, inabikanggo inom wene yagaisikherek.

¹⁶ At Allah nen he it inesanggo holuageluk yagaisigik, ane fagisikherek oba youk wulaginafik, ikherek.

¹⁷ A'nogo hilingiri'lago andi re it afuni weak mondok hilingitu werek mene a'nogo palfigik, wonoget fakhili'lagwi mene a'nogo herakfisigik uageluk hilingiterek.

¹⁸ Aren he it inebe weaget lakhoageluk herakfisili'lago lek, athe, wa'lagaikharek oba omanogo nen inili waganogo telogo fisikherek.

¹⁹ At Allah nen afuni komorinabigiluk he ou weak mene inoba fikherek, andiba re it inagap oba ou mondok elo'lekhogo hili'lagwi.

²⁰ Ap ou wanherek mene a'nogo re amburu, agai nunggu mene mondogat abit agunem he, nunggu mene enduk miksek meneba nen ogore alabutmo hebak afe ari'lago.

²¹ Ebere mondogat halongo iluk he, oak enek solok-molok ili'lago.

²² At ebere afuni wa'laluk lagaikharek oba omanogo horogat asi laluk werek.

²³ At Allah nen yonggo malaikat inebe 1.000 nen mene omanogo inanggele'ma nen he we misigen enek, afuni nen At eabu hilingitunem eberisa wagarek mene a'nogo nen enek leberisa wagarek.

²⁴ A'nogo we'luk he, endawi mondok sebelek oba ikhi logolik he, At andi re afuni wa'laluk lagaikharek oba andoma re pi lanogo re obogerisani! At ebe enggi lolengge iluk onggo re yi,” iluk i wagaikharek.

²⁵ A'nogo i wagunem enek he, at ebe mondok omame a'luk he, ap souge mene inagap eluk oba higit asigin.

²⁶ Nen, aren samban ugunem he, At Allah nen endawiraterek, at agaiyek oba Allah fogeratunem he, At Allah nen at ebe hilingik mene a'nogo mondogat fanot fikhi logogin.

²⁷ Andiba re afuni hokhorogo inelokhoma nen aren ikhi logolik he, ”Mondok weak mene faget an nen fano mene anggikhi lagimo re naweak hokho mene werego. Ariginik kwelek oba nen he At Allah nen he an unggum wo'nete lek,” iluk igin.

²⁸ Nen an afuni wa'laluk lagaikharek oba omanogo lanogoluk At Allah nen an nanggwe palnafemo, yogondak neluk welagi andi.

²⁹ At Allah nen afuni inagap telogo fisaluk ineluk wogisigik, inagaiyek mene wogisigik, hilingisigiluk,

³⁰ At Allah nen he hundik-hundik a'nogo nek hilingiterek andi.

³¹ Andi halok he Ayub ao, yogondak he an nane ikhi laginggere; hat hane legengge logolik hesanggo fanorogo holek logoin.

³² Oba nen he haren ekhe igin anggegen mene werek halok he in, nen hat hane igin mene eberogo halok he an nen ogo haren igin mene andi eberogo egen igin.

³³ Oba nen he a'nogo igin lek halok he, hane legengge logolik an nen igin mene nek hesanggo holek logoin; an nen he hat hendawimo kagalek mene a'nogo yanggulhabigin enggere,” iluk yagatikhe.