AYUB 32 - Allah Wene Fano Wene Hupla Inane

ELIHU NEN ISIKHE MENE At Elihu nen, an nendawimo ebeti mene fakhogo igin, anggasikhe wene

¹ At Ayub en an weak hilingiti lek iluk endawinggenma nen eberogo anggikhi lagaikhemo re, it agaila'lak inebe henagan aremnogo nen ogore at ane wurep wanhu aple herafisasukwa.

² Oba nen he andoma ap misik ekhe enure Elihu hun Barakheel amlogo, it inunggulenu Ram meneba nen he hun Bus ambisangma mene andi welagaikhe. At were'ma andoma Ayub en Allah oba hikhip hikhi logolik he at Ayub endawimo nen he an fano hilingiti lagi iluk ikhi lagaikhe mene a'nogo faget, at Elihu a'mage lagasikhe mene a'nogore sebelha elo'lek aga lagaikhe.

³ Aren ogore it agaila'lak henagan aremnogo nen at Ayub en ugu mene omanogo ane oak sagalogo yagati logou mene re, we iren at weaget fogoin mene nek hilingiti lagaukwama re it aremnogo wenagisasikhe.

⁴ It ap inebe welagaukwa mene aremnogo nen he at Elihu re it inagot mene hilingik welagaikhemo re it fenakwe tak umo nen aren igin iluk nenangot isikhi lagaikhe.

⁵ Oba nen he it ap henagan aremnogo nen onggo u elo'lekhogo hilingitunem futfisasikhesik he, aren it inoba a'mage fesikhe.

⁶ A'mage inoba fesikhesik aren ikhi logolik he yi'nogo isikhe, ”An he nebe sougerek welagi, nen hit he ap hinalue mene welagep, andiba re an nendawimo anggigi mene yagahisa re, nailo nabi'lago.

⁷ Wene elonggoma hinago mene re inaluendegen enek yagaisagarek hilingi'mo re, An nendawimo nen he hiren hinane ilep anggikhi lagi.

⁸ Oba nen he afuni inendawinggen kagalek mene wogisikherek andi re we At Allah Areagun Omame Hokho mene a'nogo nen enek wogisikherek.

⁹ Ap inendawinggen hebelek mene hilinglagaikharek andi re, it inebe mondok yaman asi lagaikharek andiba re fuk, athe ineluk uanhogo welagaikharek andiba re fugat.

¹⁰ Andi halok he an nen ikhi lagi mene yi hinesanggo holini, an nendawimo anggigi mene andi igin nen he fano in iluk yagane'ni.

¹¹ Hit hinane ugunem an nesanggo holek logolik nabolok lek welagi, nen hiren hinane hebelek mene ninggi'nogo ugun iluk heratunem andoma re nenangot hisikhi logolik welagiat.

¹² An nen hit fi-furogo kwelakhinarek were'ma re hiren ikhi lagep mene andoma holhugunem he, u elo'lekhogo nek ugunem hisikhi lagi, nen at Ayub en ugu mene omanogo re, ah, yi re weak mene ikhe iluk ogo hiren u re, elo'lek hilingi'mo hisigi.

¹³ A'nogo hilingiti logoligen meneat he hiren ikhi logolik, inendawinggen kagalek mene a'nogo niren mondogat hogo ikhi lagep? Andi nen he hit hinebe a'nogo ningginu-ningginu re hinane u lek hak aga andi. Nen we At Allah nen he Ayub en ugu mene omanogo nek he onggo u hak hilingi'mo higi.

¹⁴ At Ayub en he an noba ikhi laga lek, athe hit hinoba ikhi laga, oba nen he an nen he hiren ikhi lagep andem hakhogo onggo u lek hak.

¹⁵ Ayub ahwi, it he inendawinggen suk-sak ikhemo re onggo yagahesu re elo'lek aga, iren inane u aplere mondok nong-hong ikhe.

¹⁶ It he inane igi'legengge mendek logolik enek werek. It inane igi'lek aloksek mondok werek kwelek he an nen nenangot hikhi logolik logogin a?

¹⁷ Lego, yogondak he an nen onggo ikhi lagi andi, an nendawimo anggigi mene yagaheti lagi andi.

¹⁸ An nenagot hikhi logolik logou re elo'lek nabi'lago, an nane igin iluk welagi mene a'nogo sebelha re elo'lek.

¹⁹ Nen an nane higi'lek mondok welagi halok he iwak anggur amusu ele sophogo hinago mene enggin nen sokhogo wuliferek andi hak an nendawimo peterogo werek mene omanogo sokhogo wulabi wesu hago.

²⁰ An nendawimo hambuguakhogo re nane igin fano, an nane wulagaisogo wene onggo yagahisagain fano.

²¹ Wene yiba re ap tiha-tiha iluk an nen inili waganogo inebikhit asu lek hak, nen ap misik meneba ogo an nen agaukhogo fogerasu lek hagat.

²² An he ap agaukhogo liak fisagarek mene andoma ogore mondok nonggot. Nen an nen a'nogo hilingisumo nen ogore At Allah nen weak-weak an unggum wo'nesu hak.