AYUB 31 - Allah Wene Fano Wene Hupla Inane

¹ At Ayub en he, wene ekhe mel isikhe: ”Helime yenggerugwi neilenggen yerisaluk, nendawimo nen namolo anggikhi logogin lek, iluk Allah enu hombuk palogo arat igimo o.

² At Allah nen nit faget ninggi'nogo hilingiterek nogo? Afuni inobabut hilingitarek onggo Aren ninggi'nogo hilingfisikherek?

³ Afuni inobabut weak hilingitarek mene andi At Allah nen he, inebe alomarinafik, weagerinafik, ikherek mene inoba lakfei wagarek.

⁴ An nen, yi'nogo hilingisigin, iluk nendawimo ebetfuluk hilingiti lagi mene mondogat At Allah eilenggen niikheresik he, elu mondok werego.

⁵ Nen, an nen afuni neranen wene lalinafik, weak inoba hilingisogo figik, igirek mondok legaro, iluk hombuk palogo igi o.

⁶ An hilingiti lagi mene andoma we At Allah nen enek kilo eberogo meneba walhoago. A'nogo walhambik he, At weak oba le'maat, iluk andi re elu asigin o.

⁷ An higithogo hilingitarek mene andi herakfigirik, weak hilingitimo halok, athe nendawinggen weak mene nen nunggunem hilingiti lagi halok, athe weak an nenggiba nen yogot ekhe wanhi mene werek halok,

⁸ andi re yi mene ti mene an nen yati mene it ekhe ninggik, nen yabukwe yi mene ti mene yago mene re weak akhoago.

⁹ Nen an he ekhe nagaila'lak ninom ninawi horokhogo mene inagagwi inoba nendawinggen ninggemo iluk, kwe sou abel fena hinago logolik fololek elekwe nen kwelago welagi halok ogo,

¹⁰ we an nagwe andi sumburu it ap ekhe mene inom ninggik, ap ekhe inom nogo igik ikhamo fano aro.

¹¹ An nen weak mondok inapsiri mene andi eberogoat hilingitimo halok, wene noba fogoin higithogoat fouwago.

¹² Weak a'nogo hilingiti lagimo halok, endu aik en yi mene ti mene leget fisikherek andi hak, an mene nangge yi mene ti mene andoma re felelenghogo endu noagaro.

¹³ An nen weak hilingitunem, it namingmingengge nen he, Nabire, iluk ugunem, an nendawinggen oba nenat it inane hologo higithogo hilingfisigirek.

¹⁴ A'nogo meneat he, an nen a'nogo hilingiti lagi lek halok, an Allah nelokhoma ferekhogo weinam asumo, an At ninom ninggi'nogo ambi asu hak nogo? Aren an wene noba figik, kotik, igiluk wagu kwelek he an nen wene onggo ninggi'nogo yagasu hak?

¹⁵ Allah nen an nebe nagaisa alabutmo nen agauwak halogo nobagasikhe hak, an namingmingengge mene andi ogo a'nogoat inagaisawi inalabutmo nen inagauwak halogo fisasikhe lek nogo?

¹⁶ An he, afuni inangge mondok inelagaik mene leberisigi'lek kamo igik, hemi sogwe mene nong a'luk logouwagaluk kofologo herakfisigik, ikhi lagi lego.

¹⁷ Nen, an nonggwarek namburu elogat ninggi logolik, yenggerugwi suarek mene inamburu nele logouwagaluk obokhogo herakfisikhi lagi legaro.

¹⁸ An nebe yenggerek oba nenat, inebe kulinapluk, neluk logolik ferinarek mondok welagirek.

¹⁹ Afuni ekhe inangge lek mene inelagaigen inangge yi mene ti mene endebat, inasu onggo pala legat were'ma neilenggen haluk,

²⁰ an nasu nanggo domba esiba kwago mene labet fisugunem he, inoba aganhan a'luk, inendawinggen oba nen agaukhogo hai wa'nafarek o.

²¹ Wene pilingitunem it yenggerugwi suarek mene sebel fisaluk, an nane esinet fogoin iluk, it wene pilingitarek mene inenggiba figimo halok,

²² an nenggi nomolo bene tekhogo lakfisogoin fano iluk, fena-fenaat tekhogo lakfisamo re higiro.

²³ Allah nen wene noba fagain andi nailo nen he, a'nogo hilinginafirek lego.

²⁴ Nendawinggen uang emas meneba himbiret fuluk welagirek lego.

²⁵ Athe, yabu nenggi omameba nangge yi mene ti mene saburogo fakhaluk, neilmo wulalhak welagi iluk fogerakhigirek legaro.

²⁶ O mo yatunem fogeratik, tugi yatunem fogeratik, igirek mondok legaro.

²⁷ It mo tugi andem emberegen an nendawinggen wanhunem, an nen fogerinabigiluk, nailorogo ekhe hilingitirek legaro.

²⁸ Allah Omame Hokho mene a'nogo herakfisaluk, mo inom, tugi inom andem eberogoat fogerinafimo halok, wene noba fembik noasuago.

²⁹ An naselei mene yi enggin ti enggin higik, mondok weagat lagik, ugu halok, nendawimo nagaiyek hikhi lagi legat.

³⁰ An naselei mene inebe wa'lasuagaluk, homan inoba figirek legaro. An a'nogo weak hilingiti hanogoluk, hilingiti'lek welagirego.

^31-32 An nobabut he, ap pok we, koma nen, naiba wagunem herakfisigi'lek woginafirek a'nogo re, afuni yabu an faget hilingitarek mene re inelu o. An naiba ap pok wagunem woginafu mene fagerat welagarek andi nen he, ap pok wagunem ebekhalem nogo i loagaluk herakfisigirek mondok lego.

³³ Afuni ekhe weak hilingitarek mene inendawimo sebelek welagaikharek andi hak, an he a'nogo ekhe hilingitirek lego.

³⁴ Afuni mondogaren, an faget, at weak, iluk nabok igik, nenggali warogo inane asegen wo'niigik, inogo iluk, nenggali nen oloba hina'lagik, nane legat kamo igik, igirek lego.

³⁵ An nane ikhi lagi andi, afuni ekhe inesanggo holugun mene inebe logoilebe. An nen mondogat igi andi eberogoat igi, iluk Allah enu hombuk palogo igi o. Neisena Allah Omame Hokho mene a'nogo nen nane onggo uago Ap ekhe wene noba fili'lago mene andi nen, wene andi an neilenggen hoagaluk mondogat lisu paluago.

³⁶ A'nogo palumo, wene a'nogo noba fagama o, iluk an nen nendawimo nagaiyek anggikhi logolik nomoloba wanhik, kware-kware higit nungguloba pugetik, igin o.

³⁷ An nen mondogat hilingiti lagi mene andi nungguloak uan asimbik nenggali lek Allah yagasi lagain o.

³⁸ Kweang it ekhe ineabu mene an nen sebeligik, nen at ebe onggwarek anggweang mene an nen mikhigik,

³⁹ afuni awi yari'lagwi mene inamburu lek werek kwelek, sumburu onggo figi'lek an enek helaluk ninggik, igimo halok,

⁴⁰ gandum enggen fulelhi'lek, alok awi mene fulelikhi logouwak he, jelai enggen mene fulelhi'lek, engga weak mene fulelikhi logouwak he,” iluk at Ayub en wene huli andibaat arat isikhe.