AYUB 30 - Allah Wene Fano Wene Hupla Inane

¹ Oba nen he yogondak it ap souge mene omanogo nen an inane asegen wo'nabi'lagwi! O attak it ineisugwi re an nanggo domba kagalek werek mene faget fisikhi lagagiba nen he, an nen it inoba na'ma seramet fisikhi lagagi.

² Iren an nobaget yabu hilingiti lagaukwa mene inomame mondok le'ma re, an nen yabu hilingisuageluk wogisa elo'lek welagaikhe.

³ It inebe re sumburu ouwak elo'lekhogo logolik he, o leimo afuni le'ma omanogo nen omanggen iringik mene omanogo ninggi lagaukwa.

⁴ O leimo omanogo nen he iren engga oaget sanokhogo waluk he, engga inom ebe inom mondogat ninggi lagaukwa.

⁵ It inebe re ap yogot wanhunem yei warogo wulaginafarek hak, yei wathigik wulaginafi lagaukwa.

⁶ It inebe re oumo helep elekwe omanogo inom, helep honggolek kwe omanogo inom inaiba femhogo welagaukwa.

⁷ O leimo enggama omanogo nen mene olo mene nen kou waterek hak inane kweti lagaukwa, nen it inebe re o somun-somun engga a'makwe omanogo esa logalogo welagaukwa.

⁸ It he afuni nen it inonggwarek inaiba nen mugusogo wulakfisasukwa mene hilingi'mo re, inenu legengge inebe weak-peakhogo welagaukwa.

⁹ Nen, yogondak he it omanogo we'luk he, an endo ya'nabi'lagwi, iren anggikhi logolik he an yi re it inaik hulumo hakhogo hilingnabi'lagwi.

¹⁰ Iren an kwelaknealuk he mondok inabit a'luk sebelogo nobagali'lagwi, an nelokhoma re wesi subet hili'lagwi.

¹¹ At Allah nen noba lebelekhogo nomame lek mene hilingnobagaikhemo re, iren ina'mage lagagu mene a'nogo mondogat hilingisi weri'lagwi.

¹² It ap o sel kwelapni omanogo nen he an wa'lasigin mene yi'nogo iluk iren wene melalek he an nelokhe fikhiren hou salik weri'lagwi.

¹³ Iren he an nebe legaphogo nobagauwogeluk he kwe pal nobagagunem, it a'nogo hilingitu kwelek andem ap misigen ogo ekhe kwe palinabi'lagwi lek.

¹⁴ I fu omamerogo waga logolik hilingiterek hak, an noba leget pa'leget omamerogo waganek mene a'nogo weaget nobagalik weri'lagwi.

¹⁵ Sogoi furogo lagarek hak an nebe fano welagi mene a'nogo mondogat lek agik, hena palogo lagarek hak an nagaiyek welagi mene a'nogo palogo lek agik ugunem he yogondak an nailo mene nek noba werek.

¹⁶ An enggin-fenggin hikhi lagi mene yi se asu lek hak hilingi'mo re, yogondak he an mondogat wa'lasigin mene horokse'ma hikhi lagi o.

¹⁷ O hubanggo re an noak elekwe mondok fato-fatongge hilingnafi logolik he, fululung etunem legasu lek hak hilingnabi'lago.

¹⁸ At Allah nen an nalonggopma hamborogo wo'nafemo re, an nasu laberek welagi mene a'nogo noba tiliphogo po-pongge hilingiri'lago.

¹⁹ An nebe fesimo hu'niikhemo re, ologoilong engge hugisagarek hak, hu'niikhemo welagi!

²⁰ Neisena Allah o, an he Hat hoba nane kwetunem he, Haren nane onggo yaganeti lagen lek, nen an samban hoba ugunem he Haren futnobagakhi lagen lek.

²¹ Haren an noba wiik-weakhogo hilingnafi logolik he, Hat henggi omameba an sebelnarek welagen.

²² Haren he an sogoi en furogo wo'narek loageluk hera'nobagagik, sogoi hokho mene anggele'ma indu wandungge wo'narek loageluk hilingnobagagik,” ikhi lagen.

²³ Haren it afuni ineluk werek mene wa'laluk lagaikharek oba mondogat kaboget fisikhi lagen oba andoma, wo'narek laga lagen mene andi re an mondok nelu o.

²⁴ Ap inebe mondogat alomat la'luk logolik, yi mene ti mene hilingisu elo'lek were'ma inendawi neelep agwi, iluk anggikhi logolik werek kwelek oma re, nenahalok Haren enggin mene nek it inoba lagen?

²⁵ An he it afuni enggin-fenggin inoba were'ma ninomat le agik, nen it ekhe inenggi lek logolik inelagaik were'ma, nendawirinafik ikhi lagagi.

²⁶ An he selek inom nagaiyek hugu mene inom weinam a'lep iluk nenangot hikhi lagi, oba nen he enggin mene inom, mum mene inom weinam ari'lago.

²⁷ A'nogo agunem he an nendawimo mondok heiselhi logolik werek kwelek enek he nomame lek ari'lago, yi sambul ti sambul lingge hundik hup hundik omanogo re ou-pou enek hikhi logolik welagi.

²⁸ O selek le'ma mondok mum hikhaksek werek kwelek he, kwe lagik-wagik ikhi lagi, an nebe it afuni hokhorogo kabokse'ma inelokhoma menla'luk lebetnea'ni iluk yagaisugu welagi.

²⁹ Naneba ikhi lagi mene re mondok nenawinggen ou asu hak, mene olomene enggama nen ane kweterek hak inom, nen sue sumu-sumu nen hururung ane ikherek hak inom, nelagaik nane ikhi lagi.

³⁰ Nagap he mondogat wul-palurogo hilingla'luk he nebe enggen wokhigik laga-lagi, nebene aganhan nen he, nebe mondogat endu na hak hilingnabi'lago.

³¹ Attak he pinggong inagaiyek oba watunem holhi lagagi, mene re yogondak he we le agik, fong watik hilingitu mene nek hilingi'mo holhi lagi.