AYUB 27 - Allah Wene Fano Wene Hupla Inane

Ayub en isikhe wene

^1-2 Ayub ane isikhe mene a'nogo wurep lisogo ikhi logolik he yi'nogo isikhe, ”At Allah elu mondok werek mene a'nogo, Aren an nawene katokhogo palneri'lago lek mene a'nogo enuba hilingi'mo re,

³ an nen hombuk palhi lagi andi: At Allah nen set wo'netu were'ma inom, nen an nebe neluk logolik oba andem inom he,

⁴ an nambeba nen neranen wene ekhe wulabi wesigin mondok lego, nen namelinggen nen ap lalinafarek awene ekhe igin legaro.

⁵ Arigini'mo re an nen hit eberogo mene iluk u lek hak, an neluk logogin huli andi re an nen weak ekhe hilingiti lek iluk ninghikhi logogin.

⁶ An he nendawinggenma nen ogore mondok selekse'ma re, an ogo eberogo anggaluk senek welagi mene andi re a'nogo nek senek mondok logogin.

⁷ It ap an naselei mene andoma re ap wene sagalogo fuluk hilingiri'lagwi mene iluk unggum inoba fouwak, nen it an naweim mene andoma re ap ina'mageba hilingitarek mene iluk yei inoasuak.

⁸ At Allah nen ap obabut mondok weak mene ebe eluk faget awene umo nen he, at oba inendawinggen eberek logou mene ekhe logou hak nogo a?

⁹ At oba wene asi wesigin halok le agunem, At Allah nen ane elok holu hak nogo a?

¹⁰ Ebe eberogo mene re aren inagaiyek agarek mene a'nogo Allah nen wo'nelebe e, iluk endawinggen eberek logolik, aren samban Allah ba ninghogo ikhi logogin halok fano.

¹¹ An nen he hit hinoba At Allah omame mondok hokho werek mene a'nogo yagahisigik, At Lego Mondok werek mene a'nogo nen hilingisigin iluk wenggelhe mene a'nogo hineluet hinobagagik, igin.

¹² Oba nen he hit hinebe mondogat hineilenggen lombok hasigip enek. Meneat he nenahalok hiren komo wene ero lek mene nek ikhi lagep?” iluk isikhe.

Zofar en isikhe wene

¹³ A'nogo isikhemo at Zofar en ikhi logolik he, ”Ap wene melalek sagalogo fuluk hilingitarek mene inom, inendawi isigi'legengge inobaharo weak hilingitarek mene inom he, At Allah nen unggum yi'nogo wogisagain.

¹⁴ At againafuri hokhorek halok he it inebe mondogat weim oba nen wa'lasugun, nen at againafuri inom ombawi tagomangge mene inom ineluk logolik he nunggungge inelagaikhogo nek logogun.

¹⁵ Agaila'lak ineluk logogun mene omanogo re ou en wathigik logoin, nen it inagagwi sogwe omanogo nen he it inobaget le asugun mondok lek.

¹⁶ Aben angge perak andoma kabok-kabok engge kabogerik lagagik, asu sap-sabengge kabogetik, hilingiti logogin andi re fano,

¹⁷ oba nen he su inom perak inom andi re it ap higithogo nek hilingitarek mene inangge asigin.

¹⁸ Ap kwanirogo nek hilingitarek mene inawi re agelesangge eluk-elugengge awi wuriksek le'ma weak-weak forogo lagarek andi hak tendelogo lili'lago, o we elama faget aben o sabu wutarek hakhogo wurik.

¹⁹ At he ap enggi werek mene hakhogo wengik logolik werek, oba nen he aren nekhengge oak waganogo hilingisu lek hak. At ebe nogoguba omanogo nen menlagunemen he at angge yi mene ti mene omanogo mondogat linggi-longgo ugunem hikherek.

²⁰ I fu founalogo sebeli wagarek hak inailo mene oba asi weri'lago. Sogoi o hubanggo waga logolik he funhogo lisogo waluk lagarek.

²¹ Sielu mo ero fikhit en funha waga logolik he at ebe ailoba were'ma omanogo nen funhogo waluk lagarek.

²² Endawirati'lek a'nogo oba asi wagunem, ningginik-ningginik koma hina'lasi lak iluk he leil warik nikherek.

²³ At ebe watu mene a'nogo faget he afuni nen agaiserogo inenggi tabetarek. Ekhema-ekhema nen he at a'nogoba inane weak oba fagarek,” iluk sikhe.