AYUB 24 - Allah Wene Fano Wene Hupla Inane

¹ It afuni At inom hundik mene andi re wene higithogo pilingisoageluk he, Nenahalok At Allah nen wene ebe pilingisugun sambul a'nogo wenagaisogo fikhe lek nogo?

² Ap fena nen he it inanggweang wogolhouwogeluk he, kweang huli-huli warek mene a'nogo higilik lili'lagwi. Iren he domba hinasi laluk he it inanggo awi wuri'mo omanogo kwelakfakha weri'lagwi.

³ Wam keledai eak yenggerugwi suarek mene inanggo mene re kumbi fetenghogo wulak fisili'lagwi. Wam sapi hemi sogwe mene inanggo re it inoba palegengge werek mene omanogo onggo palogo iluk helili'lagwi.

⁴ Iren he ap inenggi lek mene inangge omanogo helogoin iluk hilingitunem kwe palinafu nen he, ningginu-ningginu it ap inangge lek mene omanogo re hina'lari'lagwi.

⁵ Andiba re ap enggi lek mene a'nogo re wam keledai maro mene nen o leimo engga filikwe omanogo nunggu mene faget he andoma nek were'ma heratarek higit, it inagainafuri inamburu nunggu mene faget herarik nikho.

⁶ It ekhe ineabu mene omanogo re iren anggolo-anggolo heligik, it kweang hilingiri'lagwi mene inagayo anggur enggen omanogo kabogetik, hilingiri'lagwi.

⁷ O hubanggo salogo nogogungge iluk, asu laberek mene inom, aselimut inom werek lek.

⁸ O tom oba nen he at ebe meiso kulu lagalogo watunem meiso nen tom a'ma lombo i kuluk werek.

⁹ It ap kwanirogo hilingiri'lagwi mene andi nen he yenggerugwi ineisugwi inagaisawi lek mene omanogo inomameba sebelinarek welagik, it ap inenggi lek mene omanogo inoba it inangge palek werek halok he ap a'nogo omalik he iren heligik, ili'lagwi.

¹⁰ Ap inenggi lek mene omanogo re nunggu mene halek legengge nili'lagwi, at a'nogo laluk yabumo omanogo gandum enggen palhunemen he sumburu aik fili'lago.

¹¹ E zaitun enggen oba nen he amusu keralhik, nen anggur enggen oba nen he i nunggu mene keralhik, hilingiri'lagwi, oba nen he it inebe i nele nen endawimo age mondogat lagagu kwelek a'nogo hilingiri'lagwi.

¹² O kota kwe omanogo re ap inebe weak-peakhogo logolik he nginugeri'lagwi, nen it inoumo werek mene nen he hilingninabi we'lep ago iluk inane kweri'lagwi, oba nen he iren samban ugu mene andi At Allah nen esanggo holi'lago lek, nen Aren it inane hologo hilingiri'lago legat.

¹³ Afuni fenakwe nen he selek a'nogo ninabit iluk he inom selei higit hilingfuluk logolik he, iren at inonggot engge, nen aren kwe yagaisugukwe a'nogo mu'luk lagi'legengge hilingiri'lagwi.

¹⁴ O hup hil mogolhu kwelek omanogo re at ap wa'ni a'nogo re nogoikherek oba nen feisakhogo menlagaresik he wulibi laluk ap inangge mondok lek mene omanogo inoasi wulibi'lagwi. Nen o oan wei igi'lek kwelek aremnogo re ap hinatarek mene nen hakhogo konu-konu lili'lagwi.

¹⁵ It afuni pailak hilinginabi'lagwi mene omanogo nen he o weak-weak hubasuageluk nenangot hikhi logolik werek, nen afuni nen ineilenggen nisanogoluk he inelokhe salogo werek.

¹⁶ Ap hinari'lagwi mene omanogo re hubanggo o meisaluk he, linggene re o selek se'ma omanogo herakfuluk he hina'lasi laluk werek.

¹⁷ Ap ariginik mene andi re o wei ugu halok he ailo mondok, oba nen he o mum oba re inailo mondok legat andi,” iluk isikhe.

Zofar en isikhe mene a'nogo

¹⁸ A'nogo isikhemo at Zofar en ikhi logolik he, ”Ap weak hilingiri'lagwi mene halok he i fu waga logolik woginapluk lagarek, it inanggweang he At Allah nen homan fikherek. At eabu anggur yabumo omanogo re yogondak afuni yabu ekhe hilingitu le'ma re inarek mondok lek.

¹⁹ Meiso es mene o hibi nen terenghogo lek agarek hak, it afuni weak hilingitarek mene andi re wa'lagu mene a'nogo helugunem he a'nogo lek ari'lagwi.

²⁰ At onggwarek agaisa nen ogore mondogat onggot agaba nen he, imbalo nen he at agap palhigik nunggu werek. At enu re afuni nen ogo ekhe ebet hogoin lek, At he afuni nen e mugusogo lakfagarek higit alomat lakhikhe anggikhi logogun.

²¹ A'nogo agu aple andi re aren it hemi sogwe mene omanogo sebelogo fisigik, nen it hemi ibili mene omanogo haferogo hilingfisigik, ili'lagwi andiba ari'lago.

²² Oba nen he At Allah nen he At omameba it ap inalong werek mene omanogo mugusogo wulaginabi'lago. Nen, At Allah nen hilingisigiluk hilingitunem he it ap nalek falekhogo hilingiri'lagwi mene re wathigik lili'lagwi.

²³ We Tuhan nen he at ebe fano logouwageluk herak fisugunem werek, oba nen he, Aren oboget higi'lek kagalek mondok werek.

²⁴ We horok elama faget enek endawimo agaiyekhogo werek oba nen he, hobuk he mondok-mondok lageluk werek. At ebere engga puk mene hakhogo a'luk werek, nen padi enggen oak oba nen palogo fugunem hakhogo hilingla'luk werek.

²⁵ A'nogo hilingitunem he, ap sa nen ekhe eberogo agu aple andi faget awia labelu hak nogo? Ap sa nen ekhe an nen nane eberogo igi mene andi sebelogo fou hak nogo?” iluk isikhe.