AYUB 23 - Allah Wene Fano Wene Hupla Inane

Ayub en onggo isikhe wene

^1-2 A'nogo yagatikhe ba nen, at Ayub en onggo ikhi logolik mel isikhe, ”An nen nendawi fiti logolik anggolo hikhi lagi mene yi sebel ha re mondok elo'lek hilingnafu nen he, At Allah ba limanit palogo neneigeti logolik wene palhu welagi o.

³ We an At Allah ebe werek oba andoma nelu logoilepma nen he, an lelesik At ninom ambi asu mene agwi.

⁴ A'nogo ambi a'losik he an nawene yi pilingnom iluk At oba waluk kwi lelesik he, an nambeba nen nonggwarek nalong palikhi logolik he nane andomokhogo yi wene ti wene ikhi logoile.

⁵ An nen At ane ninggi'nogo yaganesigin, nen onggo ninggi'nogo igin andi re nelu a'lep anggikhi lagi.

⁶ At ebe along welagarek a'nogo an noba herogo sagali i wesigin a? Lego! We an nane ugu mene At esanggo holigin anggikhi lagi o.

⁷ An weak hilingiti'lek iluk andi re At elokhoma nenat nonggwarek nalong palageluk welagimo re, andiba an mondok-mondok andoma wene noba legengge logogin o.

^8-9 An nen at Allah herarik he o unggut-unggut timur, barat, selatan, utara, fikhit andoma lagiba nen he yi kwe ti kwe andoma At Allah welaga lek, nen an nebe At Allah ninom ambi ago legat.

¹⁰ Ariginik kwelek he an kwe laga-lagi mene a'nogo At mondogat elurek, nen an nen ikhi lagi mene andoma ogo At eluregat. Afuni emas eil fano mene yi emas ebe mene a, athe amu mene a? iluk halhagarek a'nogo hakhogo an ogo andi hak halogo nobagaumo nen he, an nendawimo weak mene legengge mondok pugunsek welagi mene a'nogo weinam asu hak.

¹¹ An nen At ane hologo mondok tiphogo nek hilingiti lagi, nen Aren kwe loageluk an nobaget fougetukwe a'nogo nen taganhogo wulibi laga-lagi lek.

¹² Aren awene melalek ugu mene re an nen hologo nek hilingiti lagi, an nonggwarek nendawimo anggaluk hilingiti lagi lek, we At endawimo anggikherek mene nek hilingiti lagi.

¹³ At Allah andi re mondok agaum eterek lek. Afuni nen At ekhe ane sagalogo fou lek hak. Nen, Aren he onggwarek endawimo agaiyek anggili'lago mene nek hilingiterek.

¹⁴ Aren an nobaget hilingnabigin mene hokhorogo wenggelhe mene andoma werek kwelek he, wene lenggalogo fikhe mene andoma mene hilingnobagaigeluk werek.

¹⁵ An nen At oba nailo anggikhi logolik he, noagelekwe leigeri'lago, an nen mondogat andoma wenggelik lagu-lagu re ekhe inom nailo ari'lago.

^16-17 An nambong siserogo welagi mene a'nogo re At Mondok Lego werek mene a'nogo nen weak-peakhogo nobagaikhemo re, an nen Allah ba nailo anggikhi lagi, nen o mum andi nen haningisogo kwela'nabi wagik, nelokhe sali wagik, ili'lagoba nen he, an nen o mum andi faget nailo anggikhi lagi lek.